قىزىلوردا وبلىسىندا دۇنيەگە كەلگەن جاكەن ەرمەك بالا كەزىنەن جىلقىعا جاقىن بولىپ ءوستى. ناعاشى اتاسىنىڭ ىقپالىمەن ول ات قۇلاعىندا ويناپ، ناعىز شاباندوز رەتىندە قالىپتاستى.  

2014 جىلى ەرمەك كوكپارعا قىزىعىپ، كاسىبي تۇردە اينالىسا باستادى. كوكپار – تەك كۇش پەن جىلدامدىقتى عانا ەمەس، سونداي-اق ەپتىلىك پەن توزىمدىلىكتى قاجەت ەتەتىن سپورت. ول كوماندالاستارىمەن بىرگە تالاي دودالارعا قاتىسىپ، تاجىريبە جيناقتايدى. 

بىردە كوكپار ويىنى كەزىندە ەرەكشە وقيعا ورىن الادى. تارتىستى ساتتە ەرمەكتىڭ اتى ويلاماعان جەردەن شالىنىپ، كولدەنەڭ تۇرىپ قالادى. ول اتپەن بىرگە قۇلاپ تۇسەدى. اتى قايتا كوتەرىلگەندە، ەرمەكتىڭ اياعى ۇزەڭگىدەن شىقپاي قالىپ، ات ونى سۇيرەتىپ الا جونەلەدى. بۇل كورىنىستى كورگەندەر قاتتى الاڭدادى، بىراق ەرمەك سۋىققاندى ساقتاپ، دەنەسىن بوس ۇستاپ، ۇزەڭگىدەن اياعىن سۋىرىپ ۇلگەرەدى.  

بۇل وقيعا ونىڭ كوكپارعا دەگەن قىزىعۋشىلىعىن ارتتىرا ءتۇستى. ول جىلقىعا ءمىنۋدىڭ تەك كۇش ەمەس، شەبەرلىك پەن ەپتىلىكتى دە قاجەت ەتەتىنىن جاقسى ءتۇسىندى. 

2019 جىلى جاكەن ەرمەك ىشكى ىستەر ورگاندارىنا قىزمەتكە ورنالاسىپ، بۇگىندە استانا قالاسى پوليتسيا دەپارتامەنتىندە پاترۋلدىك پوليتسيا پولكىنىڭ قىزمەت ينسپەكتورى بولىپ ەڭبەك ەتۋدە. ول ءوز ىسىنە جاۋاپكەرشىلىكپەن قاراپ، قوعامدىق ءتارتىپتى ساقتاۋ مەن ازاماتتاردىڭ قاۋىپسىزدىگىن قامتاماسىز ەتۋ جولىندا ايانباي ەڭبەك ەتىپ كەلەدى. 

كوكپار مەن پوليتسيا قىزمەتىنىڭ اراسىندا ۇلكەن ۇقساستىق بار – ەكەۋى دە باتىلدىقتى، شاپشاڭدىقتى جانە جاۋاپكەرشىلىكتى قاجەت ەتەدى. جىلقى ۇستىندە شىڭدالعان پوليتسيا اعا لەيتەنانتى بۇل قاسيەتتەرىن قىزمەت بارىسىندا دا پايدالانادى. 

جاكەن ەرمەك – ۇلتتىق ءداستۇردى ۇلىقتاپ، ەرلىك پەن ادالدىقتى بويىنا سىڭىرگەن ازامات. ول جاستاردى پاتريوتتىق رۋحتا تاربيەلەۋگە، ۇلتتىق سپورتقا باۋلۋعا جانە قوعامعا ادال قىزمەت ەتۋگە شاقىرادى.  

بۇگىندە ول قىزمەتىن ابىرويمەن اتقارىپ، ەل تىنىشتىعى جولىندا ايانباي ەڭبەك ەتۋدە. ونىڭ ءومىر جولى – ۇلتتىق سپورت پەن ءتارتىپ ساقتاۋدىڭ ۇيلەسىم تاپقان كورىنىسى. 

Abai.kz