ۇلتتىق Aitu مەسسەندجەرىندە وتباسىلىق چاتتاردىڭ مۇمكىندىگى كەڭەيتىلەدى.

الداعى ۋاقىتتا قازاقستاندىقتار تۋىستارىنا ۇلتتىق داستۇرلەرگە بايلانىستى كورىمدىك، ءسۇيىنشى، اسار جانە ساداقا سياقتى اقشالاي اۋدارىمداردى قوسىمشا ارقىلى جىبەرە الادى. بۇل تۋرالى ۇكىمەت وتىرىسىندا BTS Digital كومپانياسىنىڭ باسشىسى ماقسات نۇريدەنۇلى مالىمدەدى.

ونىڭ ايتۋىنشا، بۇگىندە ۇلتتىق Aitu مەسسەندجەرىندە 6,8 ميلليون پايدالانۋشى تىركەلگەن. پلاتفورمانىڭ اي سايىنعى بەلسەندى اۋديتورياسى 1 ميلليون ادامدى، ال كۇندەلىكتى قولدانۋشىلارى 100 مىڭ ادامدى قۇرايدى.

كومپانيا باسشىسى تىركەلگەن پايدالانۋشىلار سانى مەن تۇراقتى اۋديتوريا اراسىندا ايىرماشىلىق بار ەكەنىن اتاپ ءوتتى. ونىڭ سوزىنشە، بۇعان دەيىن Aitu تەك مەسسەندجەر قىزمەتىن اتقارعان. ەندىگى ماقسات – پايدالانۋشىلاردىڭ قوسىمشاعا كۇن سايىن قايتا ورالۋىنا سەبەپ بولاتىن جاڭا مۇمكىندىكتەردى ەنگىزۋ.

ءبىز ۇلتتىق ءداستۇرىمىزدى، ءتىلىمىزدى جانە ءومىر سالتىمىزدى ەسكەرەتىن ۇلتتىق مەسسەندجەردى دامىتىپ جاتىرمىز. سوندىقتان وندا ءار وتباسىعا پايدالى بولاتىن جاڭا فۋنكتسيالار پايدا بولادى. بۇگىندە قازاقستاندا 8 ميلليوننان استام وتباسى بار جانە ولاردىڭ باسىم كوپشىلىگىنىڭ تۋىستارمەن بايلانىساتىن ورتاق چاتى بار. ماسەلەن، مۇنداي چاتتاردا فوتوسۋرەتتەردى ساقتاۋعا، ماڭىزدى وقيعالاردىڭ كۇنتىزبەسىن جۇرگىزۋگە، ەسكە سالعىشتار الۋعا جانە ءتۇرلى ءىس-شارالاردى ۇيىمداستىرۋعا مۇمكىندىك بولادى، – دەدى ماقسات نۇريدەنۇلى.

ونىڭ ايتۋىنشا، Aitu ارقىلى قازاقستاندىقتارعا ۇيرەنشىكتى ۇلتتىق داستۇرلەرگە بايلانىستى اقشالاي اۋدارىمداردى جۇزەگە اسىرۋعا بولادى. اتاپ ايتقاندا، قوسىمشادا كورىمدىك، ءسۇيىنشى، اسار جانە ساداقا جىبەرۋ فۋنكتسياسى ىسكە قوسىلادى.

سونىمەن قاتار سەرۆيستى دامىتۋدىڭ تاعى ءبىر باعىتى – تسيفرلىق شەجىرە. پايدالانۋشىلار ءوز اۋلەتىنىڭ تاريحىن ىڭعايلى فورماتتا ساقتاپ، تولىقتىرا الادى.

كومپانيا باسشىسى قازاق ءتىلىن دامىتۋعا دا ەرەكشە كوڭىل ءبولىنىپ جاتقانىن ايتتى. قوسىمشادا قازاق جانە ورىس تىلدەرى اراسىندا اۆتوماتتى اۋدارما جاساۋ مۇمكىندىگى قولجەتىمدى بولادى.

بۇدان بولەك، مەسسەندجەردە eGov قىزمەتتەرىنە سۇرانىس جىبەرۋگە ارنالعان ارنالار، تۇرعىن ءۇي، اۋدان جانە مەكتەپ چاتتارى اشىلادى. سونداي-اق پايدالانۋشىلار ساۋالناما جۇرگىزىپ، ەسەپتەگىش قۇرالدارىنىڭ كورسەتكىشتەرىن جولداي الادى. دارىگەرلەرمەن، پوليتسيا قىزمەتكەرلەرىمەن جانە باسقا دا مەملەكەتتىك قىزمەتشىلەرمەن راستالعان بايلانىس ارنالارى ىسكە قوسىلادى.

جىل سوڭىنا دەيىن اي سايىنعى بەلسەندى اۋديتوريانى 1,5 ميلليون پايدالانۋشىعا دەيىن جەتكىزۋدى جوسپارلاپ وتىرمىز. ال كەلەسى جىلى بۇل كورسەتكىش 3,8 ميلليوننان اسادى دەپ بولجاپ وتىرمىز، – دەدى ماقسات نۇريدەنۇلى.

Abai.kz