جامبىل وبلىسىندا قىتايدىڭ Fufeng Group كومپانياسى جۇگەرىنى تەرەڭ وڭدەيتىن زاۋىت سالۋدا. جوبا قۇنى – 800 ملن دوللار. زاۋىت جىلىنا 1 ملن توننا جۇگەرى وڭدەپ، ليزين، ناتري گلۋتاماتى، كسانتان ساعىزى جانە امينقىشقىلدار وندىرەدى. بۇل ونىمدەر شيكىزاتتان 10–15 ەسە قىمبات.

جوبانىڭ ءبىرىنشى كەزەڭى 2025 جىلدىڭ ءتورتىنشى توقسانىندا، تولىق ىسكە قوسىلۋى 2026 جىلى جوسپارلانعان. ءونىم ەۋروپا، سولتۇستىك افريكا مەن تاياۋ شىعىسقا ەكسپورتتالادى.

سونىمەن قاتار زاۋىت جانىندا كراحمال، اشىتقى، تازارتۋ قوندىرعىلارى، بولاشاقتا تۇز قىشقىلى مەن سۇيىق اممياك ءوندىرىسى دە كوزدەلگەن.

شىمكەنتتە قىتايلىق Shaanxi Construction Engineering كومپانياسى تاۋلىگىنە 1000 توننا قالدىق وڭدەيتىن زاۋىت سالۋدى جوسپارلاپ وتىر.

جوبالار اۋىل شارۋاشىلىعى مەن ەكولوگيا سالاسىنداعى قوسىلعان قۇندى ارتتىرۋعا جانە ەكسپورت الەۋەتىن كەڭەيتۋگە باعىتتالعان.

Abai.kz