قازاقستان اراب ەلدەرىنىڭ تۋريستىك نارىعىندا ءوز ورنىن نىقتاپ كەلەدى. 28 ءساۋىر مەن 1 مامىر ارالىعىندا دۋبايدا ءوتىپ جاتقان Arabian Travel Market حالىقارالىق كورمەسىندە ەلىمىزدىڭ تۋريستىك الەۋەتىن 30-عا جۋىق كومپانيا تانىستىرىپ جاتىر.

اۋدانى 73,5 شارشى مەتر بولاتىن ۇلتتىق ستەندتە الماتى، استانا جانە بايقوڭىر باعىتتارى ەرەكشە كورسەتىلدى. كورمەگە كەلۋشىلەرگە مادەني جانە گاسترونوميالىق تۋرلاردان باستاپ عىلىمي-تانىمدىق باعىتتارعا دەيىن ءتۇرلى تۋريستىك ونىمدەر ۇسىنىلۋدا. ءىس-شارا شەتەلدىك تۋروپەراتورلارمەن، تۋريستىك جانە اۋە كومپانيالارىمەن ىنتىماقتاستىقتى ارتتىرۋعا مۇمكىندىك بەرەدى.

قر ۇقك شەكارا قىزمەتىنىڭ مالىمەتىنشە، 2024 جىلى بەس اراب ەلىنەن كەلگەن تۋريستەر سانى 62%-عا ءوستى. وماننان كەلگەندەر سانى 80%-عا ارتىپ، 15 مىڭنان استى. بىرىككەن اراب امىرلىكتەرىنەن كەلگەن تۋريستەر 40%-عا كوبەيىپ، 14,7 مىڭ ادامعا جەتتى. ساۋد ارابياسىنان 9 مىڭنان استام تۋريست كەلگەن ء(وسىم — 47%), ال قاتاردان كەلگەندەر سانى 1,5 ەسەگە، باحرەيننەن كەلگەندەر سانى 4 ەسەگە ارتقان.

تۋريستەر اعىنىنىڭ ۇلعايۋىنا ءباا ازاماتتارى ءۇشىن ەنگىزىلگەن ۆيزاسىز رەجيم، ءىرى قالالار اراسىنداعى تۇراقتى اۋە رەيستەرى جانە حالىقارالىق كورمەلەرگە بەلسەندى قاتىسۋ ىقپال ەتتى. بۇل شارالار قازاقستاننىڭ ساياحات ءۇشىن تارتىمدى باعىت رەتىندەگى ءيميدجىن كۇشەيتىپ وتىر.

ايتا كەتسەك، 2023 جىلى TravelScapes باسىلىمى قازاقستاندى تاياۋ شىعىس ساياحاتشىلارى ءۇشىن ەڭ ۇزدىك باعىتتاردىڭ ءبىرى دەپ تانىعان بولاتىن. بيىل ورازا ايت مەرەكەسىندە قازاقستان اراب ەلدەرىنەن كەلگەن تۋريستەر ءۇشىن ەڭ تانىمال باعىتتاردىڭ قاتارىنان كورىندى.

Arabian Travel Market — الەمدەگى تۋريزم سالاسىنداعى ەڭ بەدەلدى ءىس-شارالاردىڭ ءبىرى. بيىل 32-رەت ۇيىمداستىرىلعان كورمە «جاھاندىق ساياحاتتار: بايلانىستى نىعايتۋ ارقىلى بولاشاق ءتۋريزمدى دامىتۋ» تاقىرىبىندا ءوتىپ جاتىر. ءىس-شاراعا الەمنىڭ 161 ەلىنەن 2 800-دەن استام كومپانيا قاتىسۋدا. كورمەنى 55 مىڭعا جۋىق ادام تاماشالايدى دەپ كۇتىلۋدە.

Abai.kz