شوكولادقا قاتىستى رەزونانس تۋدىرعان ۆيدەودان كەيىن ساۋدا مينيسترلىگىنىڭ ۋاكىلەتتى ورگانىمەن بىرلەسىپ تەكسەرۋ جۇرگىزدى.

شوكولادتىڭ بەتىندە پايدا بولعان اق داققا قاتىستى رەزونانس تۋدىرعان ۆيدەودان كەيىن ماماندار «راحات» كومپانياسىنىڭ ءونىمىن باقىلاۋ ماقساتىندا ساتىپ الىپ، تەكسەرۋ جۇرگىزدى. ناتيجەسىندە قازاقستاندىق شوكولاد وندىرىسىندە زاڭبۇزۋشىلىق انىقتالعان جوق. بۇل تۋرالى ۇكىمەتتەگى بريفينگتە اۋىل شارۋاشىلىعى ۆيتسە-ءمينيسترى ازات سۇلتانوۆ مالىمدەدى. 

تەكسەرۋ ساۋدا جانە ينتەگراتسيا مينيسترلىگىنىڭ ۋاكىلەتتى ورگانىمەن بىرلەسىپ جۇرگىزىلگەن.

«شوكولادقا قاتىستى رەزونانس تۋدىرعان ۆيدەودان كەيىن ساۋدا مينيسترلىگىنىڭ ۋاكىلەتتى ورگانىمەن بىرلەسىپ تەكسەرۋ جۇرگىزدىك. “راحات” كومپانياسىنىڭ شوكولادىن باقىلاۋ ماقساتىندا ساتىپ الدىق»، – دەدى ازات سۇلتانوۆ.

ونىڭ ايتۋىنشا، شوكولادتىڭ بەتىندە اق داق ەكى سەبەپتەن پايدا بولۋى مۇمكىن. ءبىرىنشىسى – ءونىمدى ساقتاۋ تەمپەراتۋراسى بۇزىلعان كەزدە پايدا بولاتىن مايلى اعارۋ.

«شوكولادتى توڭازىتقىشتا ساقتاۋعا بولمايدى. ونى ساقتاۋعا قولايلى تەمپەراتۋرا – پليۋس 18-دەن پليۋس 21 گرادۋسقا دەيىن. شوكولادتى توڭازىتقىشقا سالىپ، كەيىن قايتا شىعارعان كەزدە كاكاو بۇرشاقتارىنىڭ مايى ءبولىنىپ، بەتىندە اق قابات پايدا بولادى»، – دەپ ءتۇسىندىردى ۆيتسە-مينيستر.

ەكىنشى ىقتيمال سەبەپ – قانتتىڭ اعارۋى. ول ىلعالدىلىق جوعارىلاعان كەزدە پايدا بولادى. مۇنداي جاعدايدا قانت كريستالدانىپ، شوكولادتىڭ بەتىندە اق داق تۇزىلەدى.

ازات سۇلتانوۆ مۇنداي داق ءونىمنىڭ دامدىك ساپاسىنا اسەر ەتپەيتىنىن جانە مەملەكەتتىك ستاندارتتارعا سايكەس رۇقسات ەتىلەتىنىن اتاپ ءوتتى.

«تاعى دا اتاپ وتكىم كەلەدى، مۇنداي اعارۋ شوكولادتىڭ دامدىك ساپاسىنا ەش اسەر ەتپەيدى. بىرىنشىدەن، وسىنى ايتۋ كەرەك. ەكىنشىدەن، بۇل مەملەكەتتىك ستاندارتتارعا سايكەس كەلەدى، ياعني گوست تالاپتارىندا قاراستىرىلعان»، – دەيدى ول.

ۆيتسە-مينيستر وتاندىق كونديتەرلىك ونەركاسىپتىڭ دامۋىنا دا توقتالدى. قوستاناي وبلىسىندا «بايان سۇلۋ» فابريكاسى ءونىم تۇرلەرىن ەداۋىر كەڭەيتۋگە مۇمكىندىك بەرەتىن جاڭا جوبانى جۇزەگە اسىرىپ جاتىر.

«قازاقستاندىق شوكولادتىڭ تەك “راحات” كومپانياسىمەن عانا شەكتەلمەيتىنىن ماقتان تۇتۋىمىز كەرەك. “بايان سۇلۋ” فابريكاسىنىڭ ونىمدەرى دە بار. ولار سىرتقى نارىقتاردا ۇلكەن سۇرانىسقا يە»، – دەدى ازات سۇلتانوۆ.

«قازىرگى ۋاقىتتا قازاقستانداعى فابريكالاردا شوكولاد ءوندىرۋ كەزىندە قانداي دا ءبىر زاڭبۇزۋشىلىق انىقتالماعانىن مالىمدەيمىن»، – دەپ تۇيىندەدى ۆيتسە-مينيستر.

Abai.kz