قانداس دەگەنىمىز كىم؟ حالىقارالىق تىلدە رەپاتريانت، ياعني ءوزىنىڭ اتا-باباسىنىڭ جەرىنە، تاريحي وتانىنا ورالۋشى دەگەن قۇقىقتىق ساناتتى بىلدىرەتىن ءسوز. 

ەلىمىز تاۋەلسىزدىگىن العاننان بەرى كەلىپ جاتقان قانداستارىمىز، وسىنداعى ساناسىندا جارتىلاي بولسا دا قۇلدىق تابى بار جەرگىلىكتى قازاقتارعا بايىرعى قازاقتىڭ سالت-ءداستۇرىن، ادەپ-عۇرپىن، كونە قازاق مادەنيەتىن اكەلۋدە دەسەك قاتە ايتپاعاندىعىمىز. ءبىر سوزبەن ايتقاندا، قانداس دەگەن ۇعىم – ەل تاۋەلسىزدىگىنىڭ ارقاسىندا قوعامدا پايدا بولعان جاڭا قازاق رەسۋرسى، ادام كاپيتالى، اتامەكەنىندە وتىرعان حالقىمىزدى جانە ونىڭ ساناسىن وتارسىزداندىرۋعا قارسى كەرەمەتتەي قۇرال دەپ ايتۋعا ابدەن بولادى.

كەزىندەگى ەكس-پرەزيدەنتتىڭ جۇيەلى ساياساتىنىڭ ارقاسىندا ەلگە ءبىر ميلليوننان استام قانداستارىمىز ورالدى. «ەلگە ەل قوسىلسا - قۇت» دەگەن وسى. قازىر، ەلىمىزدىڭ ابىرويىن كوتەرەتىن، كۇش-قۋاتىن ارتتىراتىن، كەزىندەگى مۇنداي عالامات جۇمىستاردىڭ ءبىرى دە جوق. وكىنىشتى-اق!

قانداس – قازاق ءتىلىن تۇتىنۋشى، قازاقى داستۇردەگى كاسىپ-ءناسىپتى جاڭعىرتۋشى، دەمەك ول رەسپۋبليكاداعى ورىستانعان قوعامدى قازاقتاندىرۋشى سونى كۇش دەۋگە بولادى. اتا قازاقتىڭ «ەنشىسى بولىنبەگەن ەلمىز»، «تىرناقتى ەتىنەن ايىرۋعا بولمايدى» دەگەن سوزدەرىندە تەرەڭ ۇعىم جاتىر. سولاي عوي!

ۇلى كوش - قازاقستان ەگەمەندىگىن الىسىمەن، 1991 جىلى ناۋرىزدا موڭعوليا قازاقتارىنان باستالدى. شەكارا سىزىعىنان بەرى اتتاپ وتكەن اعايىندار سول كەزدەگى ەكونوميكالىق داعدارىستى دا، قيىنشىلىقتى دا، تاپشىلىقتى دا كورگەن بولاتىن.

مىنە، سول سەبەپتى وسى كۇندەرى قانداس دەگەن ۇعىم - ناعىز پاتريوت، وتانشىل، قازاقى سالت-ءداستۇردى جاڭعىرتۋشى، انا ءتىلدىڭ جاناشىرى دەگەن كەڭ ايادا قوعامدىق سانا قالىپتاستى. قانداس اعايىنداردى قولداۋ - باۋىرمالدىق پەن مەيىرباندىلىقتى، كىسىلىكتى، قازاقى دارحاندىق پەن نامىسىمىزدى قولداۋ دەپ تۇسىنەيىك. قانداستاردى ەلگە قايتارۋ - تاۋەلسىزدىك بەرگەن ولجانىڭ ەڭ ۇلكەنى دەپ ايتۋعا بولادى!

بەيسەنعازى ۇلىقبەك،

قازاقستان جۋرناليستەر وداعىنىڭ مۇشەسى

Abai.kz