2025 جىلعى 19 مامىردا استانا قالاسىنداعى قازاقستان رەسپۋبليكاسى ۇلتتىق مۋزەيىنىڭ قابىرعاسىندا تۇركسوي مۋزەيلەر بىرلەستىگىنىڭ ۇيلەستىرۋشىلەرى اراسىندا مۋزەيلىك جادىگەرلەردى رەستاۆراتسيالاۋ جانە كونسەرۆاتسيالاۋ ماسەلەلەرىنە ارنالعان وتىرىس وتەدى. ءىس-شارا ساعات 14:30-دان 17:00-گە دەيىن ۇيىمداستىرىلادى. جيىنعا تۇركىتىلدەس ەلدەردىڭ جەتەكشى مۋزەيلەرىنىڭ وكىلدەرى قاتىسادى.

2025 جىلى ۇلتتىق مۋزەي ديرەكتورى بەرىك ابدىعاليۇلى تۇركسوي-عا مۇشە ەلدەردىڭ مەملەكەتتىك مۋزەيلەرى ديرەكتورلارى كەڭەسىنىڭ توراعاسى قىزمەتىن اتقارادى. وسىعان وراي، ۇلتتىق مۋزەي الاڭىندا اقتاۋ قالاسىنىڭ تۇركى الەمىنىڭ 2025 جىلعى مادەني استاناسى بولىپ جاريالانۋىنا بايلانىستى ازىرلەنگەن مادەني باعدارلاما اياسىندا ارنايى وتىرىس ۇيىمداستىرىلىپ وتىر.

جيىن جۇمىسىنا قاتىساتىندار:

- دجاۆيد موۆسيۋمليۋ – تۇركسوي حالىقارالىق ۇيىمىنىڭ تۇركىتىلدەس قاۋىمداستىقتارمەن بايلانىس دەپارتامەنتىنىڭ باسشىسى، تۇركسوي مۋزەيلەر بىرلەستىگىنىڭ باس ۇيلەستىرۋشىسى (تۇركيا);

- ازامات بەلقايىروۆ – قر مادەنيەت جانە اقپارات مينيسترلىگى مادەنيەت كوميتەتى توراعاسىنىڭ ماندەتىن اتقارۋشى;

- تۇركيا، تۇرىكمەنستان، وزبەكستان، ازەربايجان، قىرعىزستان، مولدوۆا (گاگاۋزيا) جانە سولتۇستىك كيپردىڭ مۋزەي وكىلدەرى

- قازاقستاننىڭ رەسپۋبليكالىق جانە وڭىرلىك مۋزەيلەرىنىڭ باسشىلارى

كەزدەسۋ بارىسىندا 2024 جىلعى جۇمىستاردىڭ قورىتىندىسى جاسالىپ، 2025–2026 جىلدارعا ارنالعان نەگىزگى باستامالار تانىستىرىلادى. ەرەكشە نازار مۋزەيلىك ارتەفاكتىلەردى ساقتاۋ جانە قالپىنا كەلتىرۋ ماسەلەلەرىنە اۋدارىلادى. وسى باعىتتا «وستروۆ كرىم» زەرتحاناسىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى قىرىم التىنبەكوۆ بايانداما جاساپ، رەستاۆراتسيا سالاسىنداعى پراكتيكالىق تاجىريبەسىمەن جانە تابىستى جوبالارىمەن بولىسەدى.

تۇركسوي ەلدەرىنىڭ وكىلدەرى ءوز مەكەمەلەرىنىڭ تاجىريبەسىن ورتاعا سالىپ، مۋزەي سالاسىنداعى وزەكتى ماسەلەلەردى تالقىلايدى جانە كاسىبي ىنتىماقتاستىقتى ودان ءارى دامىتۋ جولدارىن ايقىندايدى.

كۇن تارتىبىندەگى نەگىزگى ۇسىنىستار: بىرلەسكەن كورمەلەر ۇيىمداستىرۋ، رەستاۆراتسيالىق مەكتەپتەر مەن ماماندار الماسۋ باعدارلامالارىن وتكىزۋ، عىلىمي باسىلىمدار شىعارۋ، مادەني مۇرانى ساقتاۋ مەن دارىپتەۋ ءۇشىن تسيفرلىق تەحنولوگيالاردى پايدالانۋ.

جيىن سوڭىندا قورىتىندى جاسالىپ، نەگىزگى كەلىسىمدەر مەن ۇسىنىستار بەكىتىلەدى، سونداي-اق بىرلەسكەن جوبالاردى ىسكە اسىرۋعا جاۋاپتى تاراپتار ايقىندالادى.

Abai.kz