Power Central Asia + China فورۋمى مۇناي-گاز حيمياسى مەن «جاسىل» ەنەرگەتيكا سالاسىندا ستراتەگيالىق جوبالاردى ىسكە قوسادى.

بۇگىن استانادا Power Central Asia + China العاشقى وڭىرلىك ەنەرگەتيكالىق فورۋمى باستالدى. حالىقارالىق شارا قر ەنەرگەتيكا مينيسترلىگى مەن «ينفراقۇرىلىم جانە يننوۆاتسيالىق دامۋعا جاردەمدەسۋ قاۋىمداستىعىنىڭ» (اسير) ۇيىمداستىرۋىمەن وتۋدە. «ورتالىق ازيا – قىتاي» ءسامميتى اياسىندا ۇيىمداستىرىلعان باسقوسۋدا ۇكىمەتتىك جانە ىسكەرلىك توپ وكىلدەرى ەنەرگەتيكا، ونەركاسىپ جانە جوعارى تەحنولوگيالار سالاسىنداعى ستراتەگيالىق باستامالاردى تالقىلاپ، ىسكە قوسۋدى جوسپارلاۋدا.

فورۋمنىڭ باستى ماقساتى – مەملەكەت باسشىلارى  قول جەتكىزگەن ەكى ەل اراسىنداعى ساياسي ىنتىماقتاستىق پەن كەلىسىمدەردى ىسكە اسىرۋ. ناتيجەسىندە ەلىمىزدىڭ ەنەرگەتيكالىق قاۋىپسىزدىگىن نىعايتاتىن، شيكىزاتتى تەرەڭ وڭدەۋدى جەدەلدەتەتىن جانە ءتيىمدى ەنەرگەتيكالىق ەكونوميكاعا كوشۋگە جاعداي جاسايتىن ستراتەگيالىق جوبالار جۇزەگە اسىپ، ءىرى ينۆەستيتسيالىق كەلىسىمدەر جاسالادى.

فورۋمنىڭ نەگىزگى باعىتتارى

قر ەنەرگەتيكا ءمينيسترى ەرلان اقكەنجەنوۆ جيىندى اشىپ، ءوز سوزىندە فورۋمنىڭ نەگىزگى باسىمدىقتارىن اتاپ ءوتتى:

«ەنەرگەتيكالىق ىنتىماقتاستىق – قازاقستان مەن قىتاي اراسىنداعى ارىپتەستىكتىڭ وزەگى. بۇگىندە ءبىز «التىن وتىز جىلدىققا» قادام باسا وتىرىپ، مەملەكەتارالىق بايلانىستى دامىتۋ تاريحىندا جاڭا دەڭگەيگە كوتەرىلىپ جاتىرمىز. نەگىزگى باستامالار قاتارىندا – شىمكەنت مۇناي وڭدەۋ زاۋىتىن جاڭعىرتۋ، اقتوبە وبلىسىندا كارباميد وندىرەتىن زاۋىت سالۋ، سونداي-اق جاڭارتىلاتىن ەنەرگيا كوزدەرى سالاسىندا اۋقىمدى جوبالاردى ىسكە اسىرۋ بار. بۇل – ارتاراپتاندىرىلعان، تەحنولوگيالىق ەكونوميكا قۇرۋعا باعىتتالعان قادامدار».

فلاگماندىق جوبالار مەن كەلىسىمدەر

پلەنارلىق سەسسيا بارىسىندا قازاقستان مەن قىتاي وكىلدەرى ستراتەگيالىق كەلىسىمدەر ارقىلى جۇزەگە اسىرىلاتىن جوبالاردى تانىستىردى:

شىمكەنت ءموز-ءىن جاڭعىرتۋ: قر ەنەرگەتيكا مينيسترلىگى، «قازمۇنايگاز» اق مەن CNPC زاۋىت قۋاتىن جىلىنا 12 ملن تونناعا دەيىن ارتتىرۋعا باعىتتالعان نەگىزدەمەلىك كەلىسىمگە قول قويادى. ناتيجەسىندە ەلىمىزدىڭ شيكىزات وڭدەۋ، مۇناي ونىمدەرىن ەكسپورتتاۋ الەۋەتى ارتادى.

مۇناي-گاز حيمياسى سالاسى:

ءبىر ۋاقىتتا گاز-حيميا ونەركاسىبىن دامىتۋدىڭ جاڭا كەزەڭى باستالدى — اقتوبە وبلىسىندا كارباميد ءوندىرۋ جوباسىن ىسكە اسىرۋعا قاتىستى نەگىزدەمەلىك كەلىسىمگە قول قويىلدى. بۇل قۇجات قازاقستان رەسپۋبليكاسىنىڭ ەنەرگەتيكا مينيسترلىگى، «قازمۇنايگاز» ۇك» اق، CNPC جانە اقتوبە وبلىسى اكىمدىگىنىڭ قاتىسۋىمەن جاسالعان. جوبا اگرارلىق سەكتور مەن قازاقستاننىڭ گاز-حيميا سالاسى ءۇشىن ماڭىزدى مانگە يە.

گاز سالاسى:

تەرەڭ وڭدەۋ جوبالارىمەن قاتار، تاراپتار گازدى بارلاۋ جانە ءوندىرۋ سالاسىنداعى ىنتىماقتاستىقتى تەرەڭدەتۋگە ۋاعدالاستى. «سولتۇستىك-1» جوباسىن قولداۋ جونىندەگى ۇشجاقتى مالىمدەمەگە قول قويىلدى. بۇل مالىمدەمەگە قازاقستان رەسپۋبليكاسىنىڭ ەنەرگەتيكا مينيسترلىگى، «QazaqGaz» ۇك» اق جانە CNPC قول قويدى جانە ول كومىرسۋتەك سالاسىنداعى ىنتىماقتاستىقتى نىعايتۋعا باعىتتالعان. «جاسىل» ەنەرگەتيكا: فورۋم جاڭا باستامالارعا جول اشادى.

ماسەلەن، ەنەرگيا جيناقتاۋ قۇرىلعىسىمەن جابدىقتالعان «ساۋران» كۇن ەلەكتر ستانتسياسىنىڭ قۇرىلىسى، China Southern Power Grid كومپانياسىمەن گيدرواككۋمۋلياتسيالىق ستانتسيالار سالۋ جانە China Energy International كومپانياسىمەن سۋتەگى ەنەرگەتيكاسى سالاسىندا ىنتىماقتاستىق تۋرالى مەموراندۋمدارعا قول قويۋ جوسپارلانعان.

تەحنولوگيالىق ىنتىماقتاستىق جانە ءوندىرىستى جەرگىلىكتەندىرۋ

قىتايلىق PowerChina, Huawei جانە Longi كورپوراتسيالارى قازاقستان اۋماعىندا وزىق تەحنولوگيالاردى ەنگىزىپ قانا قويماي، ولاردى جەرگىلىكتەندىرۋگە دە دايىن ەكەندىكتەرىن جەتكىزدى. فورۋم اياسىندا زەرتتەۋ جانە دامۋ (R&D) ورتالىقتارىن قۇرۋ، تسيفرلىق شەشىمدەردى ەنگىزۋ جانە جوعارى تەحنولوگيالىق وندىرىستەردى دامىتۋ جونىندە بىرقاتار كەلىسىمدەر جاسالادى.

قورىتىندى جانە تىڭ جوبالار باستاۋى

فورۋمداعى شەشۋشى ءسات – ەنەرگەتيكا سالاسىنىڭ جەتەكشى وكىلدەرى مەن ينۆەستورلاردىڭ كەلىسىمدەر توپتاماسىنا رەسمي قول قويۋ ءراسىمى. نەگىزگى قۇجاتتاردىڭ قاتارىندا شىمكەنت ءموز-ءىن جاڭعىرتۋ، گاز-حيميا ءوندىرىسىن قۇرۋ جانە جاڭارتىلاتىن ەنەرگيا كوزدەرى تەحنولوگيالارىن ەنگىزۋ جونىندەگى كەلىسىمدەر بار.

Power Central Asia + China فورۋمى قازاقستان مەن قىتاي اراسىنداعى ەنەرگەتيكا سالاسىنداعى ارىپتەستىكتىڭ ستراتەگيالىق ماڭىزدىلىعىن كورسەتتى. قول قويىلعان كەلىسىمدەر مەن اۋقىمدى جوبالار وڭىرلىك ەنەرگەتيكالىق قاۋىپسىزدىك پەن تۇراقتى ەكونوميكانىڭ نەگىزى بولماق.

Abai.kz