تالعاردا حالىقارالىق FIFA ستاندارتتارىنا ساي كەلەتىن زاماناۋي فۋتبول اكادەمياسىنىڭ ىرگەتاسى قالاندى. 

قازاقستان فۋتبول فەدەراتسياسىنىڭ مالىمەتىنشە، جوبا جەكە ينۆەستورلاردىڭ قاراجاتى ەسەبىنەن جۇزەگە اسىرىلادى.

قفف پرەزيدەنتى مارات وماروۆتىڭ ايتۋىنشا، اكادەميادا جاس فۋتبولشىلارعا جۇيەلى تۇردە زاماناۋي فۋتبول تالاپتارىنا ساي دايىندالۋعا بارلىق جاعداي جاسالادى. جوبا – بالالار مەن جاسوسپىرىمدەر سپورتىن دامىتۋداعى ماڭىزدى قادام.

- ىرگەتاسى قالانعان فۋتبول اكادەمياسى – قازاقستان فۋتبول فەدەراتسياسىنىڭ اۋقىمدى جانە ستراتەگيالىق ماڭىزى زور العاشقى جوباسى. ول ەلىمىزدەگى جاس فۋتبولشىلاردى دايارلاۋ جۇيەسىن وزگەرتىپ، جاڭا كوزقاراسپەن قاراۋعا مۇمكىندىك بەرەدى، - دەدى قفف پرەزيدەنتى مارات وماروۆ.

اكادەميانىڭ جالپى اۋماعى – 5 520 شارشى مەتر. ول ءۇش نەگىزگى بلوكتان تۇرادى: سپورتتىق، اكىمشىلىك-تۇرمىستىق جانە جاتاقحانا.

قازاقستان فۋتبول فەدەراتسياسىنان اتاپ وتكەندەي، اكادەميانىڭ قۇرىلىسى – كەزەكتى سپورتتىق جوبا عانا ەمەس. بۇل – ادامي كاپيتالعا، بالالاردىڭ بولاشاعى مەن سپورت الەۋەتىن ارتتىرۋعا باعىتتالعان ۇزاقمەرزىمدى ينۆەستيتسيا.

مۇندا جاس تالانتتاردى انىقتاپ، ولاردى دامىتۋعا جۇيەلى نەگىز قالىپتاستىرىپ، كاسىبي دايىندىقپەن قاتار، وندا تۇرۋعا، ءبىلىم الۋعا جانە فۋتبول قاۋىمداستىعىنا بەيىمدەلۋگە قاجەتتى جاعداي جاسالادى.

بۇعان دەيىن تۋريزم جانە سپورت مينيسترلىگى ءبىر بالالار فۋتبول الاڭىن سالۋعا قانشا قارجى كەرەك ەكەنىن ايتقان بولاتىن.

مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءتورتىنشى وتىرىسىندا الداعى ەكى جىلدا ءاربىر وبلىس، اۋدان ورتالىعىندا، كەنت پەن اۋىلدا بالالارعا ارنالعان فۋتبول الاڭى بولۋعا ءتيىس ەكەنىن تاپسىرعان ەدى.

Abai.kz