كوكشەتاۋدا از قامتىلعان ازاماتتارعا كومەكتەسۋدىڭ جاڭا تەتىگى ىسكە قوسىلماق. قالادا پيلوتتىق رەجيمدە تسيفرلىق ازىق-تۇلىك ۆاۋچەرلەرى بەرىلە باستايدى. بۇل – اقشالاي تولەم ەمەس، بىراق الەۋمەتتىك ماڭىزى بار ازىق-تۇلىكتى تومەندەتىلگەن باعامەن الۋعا مۇمكىندىك بەرەتىن زاماناۋي تسيفرلىق شەشىم. جوبا الداعى كۇندەرى رەسمي تۇردە باستاۋ الادى.

جاڭا فورماتتاعى كومەك اتاۋلى الەۋمەتتىك كومەك (ااك) الۋشىلارعا ارنالعان. ەڭ باستى ەرەكشەلىگى — ۆاۋچەردى الۋ ءۇشىن ەشقانداي ءوتىنىش نە قۇجات جيناۋدىڭ قاجەتى جوق. قاتىسۋشىلار ءتىزىمى Smart Data Ukimet جۇيەسى ارقىلى اۆتوماتتى تۇردە قالىپتاسادى. ازاماتتار تەك SMS-حابارلاما ارقىلى ءوز كەلىسىمىن بەرەدى، كەيىن eGov Mobile قوسىمشاسىنداعى «الەۋمەتتىك ءاميان» بولىمىندە ۆاۋچەر پايدا بولادى.

تسيفرلىق ۆاۋچەرلەردى ارنايى سەرىكتەس دۇكەندەردە پايدالانۋعا بولادى. بۇل دۇكەندەر حالىققا الەۋمەتتىك ماڭىزى بار ازىق-تۇلىك تۇرلەرىن كوتەرمە باعامەن — ۇستەمە اقىسىز ۇسىنادى. ال ساۋدا ورىندارى ءۇشىن جوبا شەڭبەرىندە اينالىم قاراجاتىن قولداۋعا ارنالعان جەڭىلدەتىلگەن قارىز تەتىگى قاراستىرىلعان. بۇل – باعانىڭ تۇراقتىلىعىن ساقتاۋعا مۇمكىندىك بەرەدى.

جوبا تولىعىمەن تسيفرلىق تۇردە جۇزەگە اسادى: ۆاۋچەردى گەنەراتسيالاۋ، دۇكەندە تولەم جاساۋ — بارلىعى QR-كودتار، قوسىمشالار جانە ەلەكتروندىق دەرەكتەر بازاسى ارقىلى ىسكە اسادى.

يگىلىكتى باستاما ساۋدا جانە ينتەگراتسيا مينيسترلىگى، ەڭبەك جانە حالىقتى الەۋمەتتىك قورعاۋ مينيسترلىگى، اۋىل شارۋاشىلىعى مينيسترلىگى، تسيفرلىق دامۋ مينيسترلىگى جانە اقمولا وبلىسى اكىمدىگىنىڭ بىرلەسۋىمەن جۇزەگە اسۋدا.

جوبانىڭ باستى ماقساتى — كومەكتى ناقتى مۇقتاج ازاماتتارعا جىلدام ءارى ىڭعايلى تۇردە جەتكىزۋ. تسيفرلىق ۆاۋچەرلەر الەۋمەتتىك قولداۋدىڭ تيىمدىلىگىن ارتتىرىپ، كوكشەتاۋ تۇرعىندارىنا ناقتى كومەك بولماق.

Abai.kz