قاراعاندى وبلىسىنىڭ ساران قالاسى ەكونوميكانى ءارتاراپتاندىرۋدىڭ تابىستى ۇلگىسىنە اينالدى. يندۋستريالىق ايماقتى دامىتۋدىڭ ارقاسىندا ساران مونوقالالار ساناتىنان شىقتى.

– بىزدە Saran يندۋستريالىق ايماعى ناتيجەلى جۇمىس ىستەپ تۇر. وسىنىڭ ارقاسىندا ءبىز جاڭا جۇمىس ورىندارىن اشىپ، ەكونوميكانى ءارتاراپتاندىرا وتىرىپ، ساراندى مونوقالالار مارتەبەسىنەن شىعارا الدىق. پرەمەر-ءمينيستردىڭ تاپسىرماسى بويىنشا ءبىز وسى وڭ تاجىريبەنى ەندى وبلىستىڭ باسقا قالالارىنا دا كەڭەيتىپ جاتىرمىز، – دەپ اتاپ ءوتتى قاراعاندى وبلىسىنىڭ اكىمى ەرماعانبەت بولەكپاەۆ وڭىرلىك كوممۋنيكاتسيالار قىزمەتىنىڭ الاڭىندا.

بيىل قاراعاندىدا، ساراندا جانە تەمىرتاۋدا ءۇش شاعىن ونەركاسىپتىك ايماق ىسكە قوسىلۋى ءتيىس. ولاردىڭ ءبىرى «كارمەت سەرۆيس» بازاسىندا قۇرىلادى جانە 20 مىڭ شارشى مەتردى الادى.

بۇدان باسقا، QARMET 2030 جىلعا دەيىن 1,6 ترلن تەڭگەگە جاڭعىرتۋ باعدارلاماسىن ىسكە اسىرۋدا. تەك بيىل عانا ينۆەستيتسيا 294,7 ملرد تەڭگەنى قۇرايدى.

شاعىن ونەركاسىپتىك ايماقتار بالقاشتا دا، «قازاقمىس» كورپوراتسياسىنىڭ ەركىن ونەركاسىپتىك اۋماقتارىندا دا داميتىن بولادى.

ساراندا يندۋستريالىق ايماق جانە الەۋمەتتىك وسال ساناتتاعى كاسىپورىندار قىزمەتكەرلەرىن تۇرعىن ۇيمەن قامتاماسىز ەتۋ ءۇشىن سوڭعى جىلدارى بيۋدجەت ەسەبىنەن، سونداي-اق جەكە ينۆەستيتسيالاردى تارتۋ ارقىلى 22 كوپپاتەرلى ءۇي جوندەلدى. بار-جوعى قاراعاندى وبلىسى بويىنشا 2025 جىلدىڭ سوڭىنا دەيىن 545 000 م² تۇرعىن ءۇيدى تاپسىرۋ جوسپارلانعان.

وبلىستا ينجەنەرلىك ينفراقۇرىلىمدى جوندەۋ مەن سالۋعا ەرەكشە كوڭىل بولىنەدى. پرەزيدەنتتىڭ تاپسىرماسى بويىنشا تۇرعىنداردى ساپالى سۋمەن قامتاماسىز ەتۋ جۇمىستارى جۇرگىزىلۋدە. 36 نىسان سالىنىپ، جاڭعىرتىلۋدا.

– بۇل 200 مىڭنان استام اۋىل تۇرعىنى ءۇشىن تازا سۋعا قولجەتىمدىلىكتى جاقسارتۋعا مۇمكىندىك بەرەدى. ارنايى مەملەكەتتىك قور قاراجاتىنا قوسىمشا سۋ تارتقىشتار مەن جەلىلەر بويىنشا 11 جوبا ىسكە اسىرىلۋدا، – دەپ حابارلادى ەرماعانبەت بولەكپاەۆ.

قاراعاندى، تەمىرتاۋ، بالقاش جانە اقتوعاي اۋداندارىندا قازاندىقتاردى جاڭعىرتۋ جانە سالۋ، جىلۋ جەلىلەرىن اۋىستىرۋ بويىنشا التى جوبا جۇمىس ىستەۋدە. ەنەرگيا بلوكتارى مەن جىلۋ كوزدەرىنىڭ تۋربينالارىنا كۇردەلى جانە اعىمداعى جوندەۋ جۇمىستارى جۇرگىزىلەدى. وسىنىڭ ءبارى الداعى جىلىتۋ ماۋسىمىندا جىلۋمەن جابدىقتاۋدىڭ سەنىمدىلىگىن ارتتىرۋى ءتيىس.

قاراعاندى مەن تەمىرتاۋدا گازداندىرۋ جالعاسۋدا. قازىردىڭ وزىندە 5266 ءۇي گازعا قوسىلعان، تاعى 4323 ءۇيدىڭ تەحنيكالىق مۇمكىندىگى بار.

Abai.kz