اۋىل شارۋاشىلىعى ءمينيسترى ايداربەك ساپاروۆ قازاقستانداعى قحر-نىڭ توتەنشە جانە وكىلەتتى ەلشىسى حان چۋنلينمەن كەزدەسۋ وتكىزدى.

كەزدەسۋ بارىسىندا تاراپتار اگرارلىق سالاداعى ەكىجاقتى ىنتىماقتاستىقتىڭ قازىرگى جاعدايى مەن بولاشاعىن تالقىلادى. مينيستر اۋىل شارۋاشىلىعى سالاسىنداعى ارىپتەستىك تۇراقتى وڭ ديناميكانى كورسەتىپ وتىرعانىن اتاپ ءوتتى.

2024 جىلى ەكى ەل اراسىنداعى اۋىل شارۋاشىلىعى ونىمدەرىنىڭ تاۋار اينالىمى 10%-عا ءوسىپ، 1,4 ملرد اقش دوللارىن قۇرادى. 2025 جىلدىڭ العاشقى بەس ايىندا ءوسىم 36%-دى قۇراپ، 736,9 ملن دوللارعا جەتتى. قازاقستاننان قىتايعا ەكسپورتتىڭ، سونداي-اق قىتايدان يمپورتتىڭ دا ارتۋى اگرارلىق ساۋدانىڭ تەڭگەرىمدى ءارى ءوزارا ءتيىمدى قۇرىلىمىنا دالەل بولۋدا.

2024 جىلدىڭ قورىتىندىسى بويىنشا قىتايعا اۋىل شارۋاشىلىعى ونىمدەرىنىڭ ەكسپورتى 1,1 ملرد اقش دوللارىن قۇراپ، 4%-عا ارتتى. ال 2025 جىلدىڭ قاڭتار–مامىر ايلارىندا ەكسپورت 35%-عا ءوسىپ، 513,4 ملن دوللارعا جەتتى. نەگىزگى ەكسپورتتىق پوزيتسيالارعا مال ازىعى (+485%، 1,2 ملن توننا), وسىمدىك مايلارى (+26%، 173,3 مىڭ توننا) جانە بيداي كىرەدى.

«ءبىز ءۇشىن نەگىزگى ماسەلەلەردىڭ ءبىرى – سيىر ەتى، قوي ەتى جانە قوسالقى ونىمدەردى ەكسپورتتاۋعا قاتىستى جاڭارتىلعان حاتتامالارعا قول قويۋ. 2025 جىلدىڭ مامىر ايىندا قحر-نىڭ باس كەدەن باسقارماسىمەن قازاقستانداعى قىزىلشا جومىن وندىرەتىن كاسىپورىندارعا بىرلەسكەن ينسپەكتسيا جۇرگىزۋ، سونداي-اق اكتوبە، قاراعاندى، شىعىس قازاقستان جانە اباي وبلىستارىن تەكسەرۋ ارقىلى قىتايعا بيداي مەن ارپا جەتكىزىلەتىن وڭىرلەردىڭ گەوگرافياسىن كەڭەيتۋ تۋرالى كەلىسىمگە قول جەتكىزىلدى. ءبىز وسى جىلدىڭ تامىز ايىندا قۇس شارۋاشىلىعى كاسىپورىندارىن قحر تالاپتارىنا سايكەستىگى تۇرعىسىنان تەكسەرۋ جۇرگىزۋدى ۇسىنامىز»، – دەدى ايداربەك ساپاروۆ.

كەزدەسۋ بارىسىندا ينۆەستيتسيالىق ىنتىماقتاستىققا ەرەكشە نازار اۋدارىلدى. قازىرگى تاڭدا قازاقستاندا قىتاي كاپيتالىنىڭ قاتىسۋىمەن جالپى قۇنى شامامەن 2,8 ملرد اقش دوللارىن قۇرايتىن اۋىل شارۋاشىلىعى سالاسىنداعى 4 ءىرى جوبا جۇزەگە اسىرىلۋدا. بۇل قىتاي ينۆەستورلارى تاراپىنان جوعارى سەنىمنىڭ بار ەكەنىن جانە ستراتەگيالىق ارىپتەستىكتى تەرەڭدەتۋگە قوسىمشا ىنتالاندىرۋ جاسايتىنىن كورسەتەدى.

ءوز كەزەگىندە قحر-نىڭ توتەنشە جانە وكىلەتتى ەلشىسى حان چۋنلين ەكى ەل اراسىنداعى اۋىل شارۋاشىلىعى سالاسىنداعى ءوزارا ءىس-قيمىل دەڭگەيىنىڭ جوعارى ەكەنىن اتاپ ءوتىپ، قىتاي تاراپىنىڭ ءوزارا ساۋدا كولەمىن ارتتىرۋعا جانە ينۆەستيتسيالار، سانيتاريالىق-ۆەتەريناريالىق باقىلاۋ مەن اگرارلىق يننوۆاتسيالار باعىتىندا ىنتىماقتاستىقتى كەڭەيتۋگە مۇددەلىلىك تانىتىپ وتىرعانىن جەتكىزدى.

كەزدەسۋ سوڭىندا تاراپتار اگرارلىق سالاداعى جان-جاقتى جانە ءوزارا ءتيىمدى ىنتىماقتاستىقتى ودان ءارى دامىتۋعا دايىن ەكەندەرىن راستادى.

Abai.kz