قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆقا

ۇندەۋ

قۇرمەتتى قاسىم-جومارت كەمەلۇلى!

قازاقستان تاۋەلسىز مەملەكەت رەتىندە ءوزىنىڭ تاريحي جادىن جاڭعىرتىپ، حالقىمىزدىڭ ازاتتىق جولىنداعى كۇرەسىنىڭ ەلەۋلى كەزەڭدەرىنە لايىقتى باعا بەرۋى — تاۋەلسىزدىكتىڭ تابيعي ءارى ماڭىزدى تالاپتارىنىڭ ءبىرى دەپ ەسەپتەيمىز.

حح عاسىردىڭ سوڭىندا قازاقستاننىڭ تاۋەلسىزدىك الۋ قارساڭىندا ورىن العان «جەلتوقسان — ۇلتتىق سيپاتتاعى كوتەرىلىس»، «جاڭاوزەن — الەۋمەتتىك-ەتنوساياسي قاقتىعىس»، «ورال — اۋماقتىق-ساياسي سيپاتتاعى ازاماتتىق قارسىلىق» وقيعالارى قازاق حالقىنىڭ ازاتتىققا ۇمتىلىسىنىڭ ءارتۇرلى سيپاتتاعى تاريحي كورىنىستەرى بولدى دەپ سانايمىز.

وسى وقيعالاردىڭ ىشىندە 1991 جىلعى قىركۇيەكتەگى ورال وقيعاسىنىڭ ورنى ەرەكشە. ويتكەنى بۇل وقيعا قازاق حالقىنىڭ تاۋەلسىز مەملەكەت قۇرۋعا ساياسي جانە ازاماتتىق تۇرعىدان دايىن ەكەنىن كورسەتكەن تاريحي كۇرەس بولدى. جەر اۋماعى جونىنەن الەمدە 9-ورىن الاتىن قازاقستاننىڭ اۋماقتىق تۇتاستىعىن سەپاراتيستىك پيعىلداعى كۇشتەردىڭ ىقتيمال ارەكەتتەرىنەن قورعاۋعا باعىتتالعان بۇل ازاماتتىق قارسىلىقتىڭ تاريحي ءمانى ەرەكشە بولدى. ول قازاقستاننىڭ تاۋەلسىز مەملەكەت رەتىندە قالىپتاسۋىنا تاريحي العىشارتتاردىڭ بىرىنە اينالدى. وتانشىل ازاماتتاردىڭ بۇل ازاماتتىق قارسىلىعى قازاقستاننىڭ باتىس وڭىرلەرىنىڭ اۋماقتىق تۇتاستىعىن قورعاۋمەن قاتار، ەلدىڭ وزگە دە وڭىرلەرىنە تارالۋى ىقتيمال اۋماقتىق-ساياسي قاتەرلەردىڭ الدىن الۋعا باعىتتالعان ازاماتتىق جەڭىسكە ۇلاستى.

ورالداعى وقيعا قازاق حالقىنىڭ ءوز جەرىنىڭ تۇتاستىعىن قورعاۋعا جانە تاۋەلسىز مەملەكەت قۇرۋعا ساياسي تۇرعىدان دايىن ەكەنىن كورسەتكەن تاريحي كەزەڭ رەتىندە باعالانۋعا ءتيىس دەپ ەسەپتەيمىز. وسى تۇرعىدان العاندا، 1991 جىلعى 15 قىركۇيەك — تاريحي جادىمىزدا لايىقتى ورىن الۋى قاجەت كۇن.

الايدا بۇل داتا بۇگىنگى كۇنگە دەيىن ەلىمىزدىڭ تاۋەلسىزدىك تاريحىنداعى ايتۋلى وقيعا رەتىندە كەڭىنەن تانىلىپ، مەملەكەتتىك دەڭگەيدە ءتيىستى باعاسىن العان جوق. تاريحي وقيعالاردى ءادىل باعالاۋ — وتكەندى عانا ەسكە الۋ ەمەس، سونىمەن بىرگە قازىرگى جانە كەلەشەك ۇرپاققا ەلدىڭ تاۋەلسىزدىگى مەن اۋماقتىق تۇتاستىعىنىڭ قانداي تاريحي جولمەن كەلگەنىن ۇقتىرۋ مەن ءسىڭىرۋ.

وسىعان بايلانىستى 1991 جىلعى 15 قىركۇيەكتە بولعان ورال وقيعاسىنىڭ 35 جىلدىعىن 2026 جىلى مەملەكەتتىك دەڭگەيدە اتاپ ءوتۋدى ۇسىنامىز. بۇل ۇسىنىسىمىزدىڭ ماقساتى — قانداي دا ءبىر ساياسي تارتىستى قايتا جاڭعىرتۋ ەمەس، قازاقستان تاۋەلسىزدىگىنىڭ قالىپتاسۋ جولىنداعى تاريحي وقيعالارعا ءادىل باعا بەرۋ جانە تاريحي جادتى تولىقتىرۋ.

وسىعان وراي سىزدەن:

1. 2026 جىلى 1991 جىلعى ورال وقيعاسىنىڭ 35 جىلدىعىنا بايلانىستى مەملەكەتتىك دەڭگەيدە ءتيىستى ءىس-شارالار وتكىزۋدى;

2. 1991 جىلعى 15 قىركۇيەكتىڭ قازاقستاننىڭ تاۋەلسىزدىك تاريحىنداعى ورنىن ارنايى تاريحي-ساياسي جانە قۇقىقتىق تۇرعىدان زەردەلەپ، ورال وقيعاسىنا ءتيىستى باعا بەرۋ ماسەلەسىن قاراستىرۋدى;

3. ورال وقيعاسىنا قاتىسۋشىلاردىڭ كۋالىكتەرى مەن وسى كەزەڭگە قاتىستى تاريحي ماتەريالداردى جيناقتاپ، عىلىمي تۇرعىدان زەرتتەۋدى;

4. ورال وقيعاسىنىڭ قازاقستاننىڭ تاۋەلسىزدىك تاريحىنداعى ورنىن ءتيىستى دەڭگەيدە ناسيحاتتاۋ ماسەلەسىن قاراستىرۋدى سۇرايمىز.

ءبىز قازاقستاننىڭ تاۋەلسىزدىگىنە الىپ كەلگەن تاريحي جولدىڭ بارلىق كەزەڭدەرى حالىقتىڭ جادىندا ساقتالۋى كەرەك دەپ ەسەپتەيمىز.

1991 جىلعى ورال وقيعاسىنىڭ 35 جىلدىعىن اتاپ ءوتۋ — سول وقيعاعا قاتىسقان ازاماتتاردىڭ عانا ەمەس، قازاقستاننىڭ تاۋەلسىزدىك تاريحىن قۇرمەتتەۋدىڭ ماڭىزدى قادامى بولار ەدى.

سىزدەن وسى ۇسىنىسىمىزدى قولداپ، ونى مەملەكەتتىك ورگانداردىڭ قاراۋىنا ۇسىنىپ، ناتيجەسى بويىنشا ءتيىستى شەشىم قابىلداۋ جونىندە تاپسىرما بەرۋىڭىزدى سۇرايمىز.

قۇرمەتپەن،
1991 جىلعى ورال وقيعاسىنا قاتىسۋشى ازاتكەرلەر

استانا، 2026 جىلعى تامىز

Abai.kz