ونەركاسىپ جانە قۇرىلىس باعىتىنداعى جاڭا ماماندىقتار اتلاسىندا 75 ماماندىق قامتىلعان. بۇل تۋرالى ۇكىمەت وتىرىسىندا ونەركاسىپ جانە قۇرىلىس ۆيتسە-ءمينيسترى يران شارحان مالىمدەدى.

ونىڭ ايتۋىنشا، مينيسترلىك قاداعالايتىن سالالار بويىنشا كادرلارعا قاجەتتىلىك شامامەن - 40 مىڭ ادام. قازىرگى تاڭدا اتلاسقا ەنگىزىلگەن 75 جاڭا ماماندىق وسى سۇرانىستى قامتۋعا باعىتتالعان.

مىسالى، مەتاللۋرگيا جانە كەن ءوندىرۋ سەكتورىندا – روبوتتاندىرىلعان كەن تەحنيكاسىنىڭ وپەراتورى، ءوندىرۋشى جانە مەتاللۋرگيالىق ونەركاسىپتىڭ سمارت-جۇيەلەرىن ازىرلەۋشى; ماشينا جاساۋ سالاسىندا – ۆيرتۋالدى پروتوتيپتەۋ بويىنشا مامان; قۇرىلىس سالاسىندا – تسيفرلىق جوبالاۋشى، Big Data اناليتيگى، "اقىلدى ءۇي" جوبالاۋشىسى بار. سونىمەن قاتار، 40-تان استام ماماندىق بيزنەس-پروتسەستەردى اۆتوماتتاندىرۋ بارىسىندا ترانسفورماتسيادان ءوتتى، – دەدى يران شارحان.

بيىل وڭدەۋ ونەركاسىبى سالاسىنداعى 190 ينۆەستيتسيالىق جوبا اياسىندا ماشينا جاساۋ سالاسىندا تاعى 8 جاڭا ماماندىق پايدا بولادى. ولاردىڭ قاتارىندا – 3D-باسىپ شىعارۋ جانە دانەكەرلەۋ ينجەنەرى، روبوتتاندىرىلعان بوياۋ جۇيەلەرىنىڭ وپەراتورى جانە باسقا دا ماماندىقتار بار.

وسىلايشا قوعامدا قالىپتاسقان ءداستۇرلى جۇمىسشى ماماندىقتارىنىڭ بەينەسى وزگەرىپ، قول ەڭبەگى بىرتىندەپ اۆتوماتتاندىرىلعان جۇيەلەرمەن الماستىرىلىپ جاتىر.

ەسكە سالايىق، بۇعان دەيىن مينيسترلىك ەندى جۇمىس ىزدەۋگە بار بولعانى 5 مينۋت كەتەتىنىن ايتتى.