ەكونوميكالىق ىنتىماقتاستىق جانە دامۋ ۇيىمى (ەىدۇ) قازاقستاننىڭ ءتيىستى ستاتيستيكالىق پراكتيكا جونىندەگى ۇسىنىمعا قوسىلعانىن رەسمي تۇردە راستادى. بۇل – ەىدۇ-نىڭ ستاتيستيكا سالاسىنداعى العاشقى قۇقىقتىق قۇجاتى جانە قازاقستان تمد وڭىرىندەگى وسى قۇجاتقا قوسىلعان العاشقى ەل اتاندى.

اتالعان ۇسىنىم – رەسمي ستاتيستيكانىڭ تاۋەلسىزدىگىن، وبەكتيۆتىلىگىن، اشىقتىعى مەن ساپاسىن قامتاماسىز ەتۋگە باعىتتالعان 12 قاعيداتتى قامتيتىن حالىقارالىق ستاندارت. وعان قوسىلۋ – قازاقستاننىڭ ۇلتتىق ستاتيستيكالىق جۇيەسى ەىدۇ-نىڭ نەگىزگى تالاپتارىنا ساي كەلەتىنىن جانە ۇزدىك حالىقارالىق تاجىريبەگە سايكەس دامىپ جاتقانىن بىلدىرەدى.

ەىدۇ شەشىمى 2023–2025 جىلدارعا ارنالعان قازاقستاننىڭ ۇلتتىق ستاتيستيكالىق جۇيەسىنە جۇرگىزىلگەن جان-جاقتى شولۋ ناتيجەسىندە قابىلداندى. قۇجاتتا ستاتيستيكانى تسيفرلاندىرۋ، زاماناۋي ءادىسنامالاردى ەنگىزۋ جانە پايدالانۋشىلاردىڭ دەرەكتەرگە دەگەن سەنىمىن ارتتىرۋ باعىتىندا ەلدىڭ قول جەتكىزگەن ناتيجەلەرى اتاپ وتىلگەن.

«بۇل – قازاقستاننىڭ ستاتيستيكالىق جۇيەسىنە بەرىلگەن ماڭىزدى باعا. ول رەسۋرستاردىڭ جەتكىلىكتىلىگى، قۇپيالىلىقتى ساقتاۋ، تۇراقتى قۇقىقتىق جانە ينستيتۋتسيونالدىق نەگىزدىڭ بولۋى، سونداي-اق جاڭا جانە بالامالى دەرەككوزدەردى پايدالانۋ سياقتى تالاپتارعا ساي كەلەتىنىن راستايدى. قۇجاتتا ستاتيستيكا ساپاسىنىڭ تالداۋ مەن باسقارۋشىلىق شەشىمدەردىڭ ساپاسىنا تىكەلەي اسەر ەتەتىنى اتاپ كورسەتىلگەن. ءبىز وسى مەجەنى ساقتاپ قالۋعا جانە ودان ءارى جەتىلدىرە بەرۋگە نيەتتىمىز»، – دەدى قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ.

ەىدۇ باس حاتشىسى ماتياس كورمانن: «ءبىز ىنتىماقتاستىعىمىزدى جالعاستىرىپ، ءسىزدىڭ ەلىڭىزدە جوعارى ساپالى ءارى ينستيتۋتسيونالدىق تۇرعىدان سەنىمدى ستاتيستيكالىق جۇيەنى دامىتۋداعى ۇمتىلىسىڭىزدى قولداۋعا نيەتتىمىز»، – دەپ اتاپ ءوتتى.

قازاقستان ەىدۇ ءتيىستى ستاتيستيكالىق پراكتيكا بويىنشا ۇسىنىم ستاندارتتارىنا سايكەس دەپ تانىلعان 44-ءشى جانە ۇيىمنىڭ سىرتقى ارىپتەستەرى اراسىندا ءبىرىنشى ەل بولدى.

ايتا كەتەيىك، قازاقستاننىڭ اتالعان ۇسىنىمعا قوسىلۋ جۇمىسى قر سىرتقى ىستەر مينيسترلىگىنىڭ قولداۋىمەن جۇزەگە اسىرىلدى.

Abai.kz