پويىزدىڭ قاۋىپسىزدىگى – ءماشينيستىڭ كاسىبيلىگىندە. مىڭداعان جولاۋشىنىڭ ءومىرى مەن ءبىرر قالادان ەكىنشى قالاعا جۇكتىڭ جەتۋى وسى ماماننىڭ قولىندا. ول تەمىر جولدىڭ ءتارتىبىن ءجىتى قاداعالايتىن، كوزگە كوپ كورىنبەيتىن، بىراق ۇلكەن جاۋاپكەرشىلىكتى ارقالايتىن مامان. سونداي جانداردىڭ ءبىرى ماشينيست ەركىن سوۆەتحانوۆپەن سۇحباتتاسقان ەدىك.

- ءماشينستىڭ جۇمىس كۇنى قالاي باستالادى؟

- ءماشينيستىڭ جۇمىس كۇنى ارنايى تارتىپپەن باستالادى. بىزگە جۇمىسقا شىعۋ ۋاقىتى تۋرالى الدىن الا، ياعني ەكى ساعات بۇرىن حابار بەرىلەدى. سول كەزدە قاي باعىتقا باراتىنىمىز ناقتى ايتىلادى. الدىمەن دەپوعا كەلىپ، ء"جۇرۋ باعىتى" دەپ اتالاتىن رەسمي قۇجاتتى الامىز. قۇجاتتا ساپار مارشرۋتى مەن قوزعالىس ءتارتىبى كورسەتىلەدى. سودان كەيىن مىندەتتى تۇردە مەديتسينالىق تەكسەرىستەن وتەمىز قان قىسىمى، جۇرەك سوعىسى، جالپى جاعدايىمىز قارالادى. ياعني، ساپار قاۋىپسىزدىگى ءۇشىن وتە ماڭىزدى كەزەڭ. مەديتسينالىق تەكسەرىستەن كەيىن وزىمىزبەن بىرگە الىپ شىعاتىن ارنايى جابدىقتارىمىزدى الامىز. وسىدان سوڭ لوكوموتيۆتى قابىلداۋ پروتسەسى باستالادى. لوكوموتيۆتىڭ تەحنيكالىق جاي-كۇيىن تەكسەرەمىز. تەجەگىش جۇيەسى، جارىق شامدارى، قوزعالتقىشتاردىڭ جۇمىس ىستەۋى جانە باسقا دا ماڭىزدى جۇيەلەر مۇقيات قارالادى. بارلىعى تالاپقا ساي بولسا، جۇمىسقا كىرىسەمىز.

- نەگە بۇل ماماندىقتى تاڭدادىڭىز؟

- وتباسىم تەمىرجولشىلار اۋلەتى دەسەم قاتەلەسپەيمىن. اكەم ءومىر بويى وسى سالادا ەڭبەك ەتتى، ال انام تەمىرجولدا وپەراتور بولىپ جۇمىس ىستەگەن. ۇيدە كۇند تەمىرجول تۋرالى اڭگىمە ايتىلاتىن. پويىزدار قوزعالىسى، ۆاگوندار، ديسپەتچەرلىك بايلانىس، تەحنيكالىق قيىندىقتار مەن جەتىستىكتەر جايلى. بالالىق شاعىمدا سول اڭگىمەلەردى تىڭداپ وسكەن سوڭ وسى ماماندىقتى تاڭدادىم. قازىر ءوز ماماندىعىمدى شىن جۇرەگىممەن جاقسى كورەمىن. ماشينيست بولۋ – جاي عانا ماماندىق ەمەس، بۇل – مىنەز، ءتارتىپ، ءومىر سالتى.

- قازىرگى تەمىرجول جۇيەسىنىڭ تسيفرلانۋىنا قاتىستى نە ايتاسىز؟

بۇرىن لوكوموتيۆتەردە ءبارى قولمەن باسقارىلاتىن. قازىر زاماناۋي تەحنولوگيا كەلدى. بۇگىندە ورتالىقتاندىرىلعان باقىلاۋ، مونيتورلار، اۆتوماتتى تىركەۋ جۇيەلەرى جۇمىس ىستەيدى. جۇمىستىڭ كوپ بولىگى تسيفرلىق جۇيەگە كوشىپ جاتىر.

- ماشينيست ماماندىعىنىڭ قيىندىقتارى قانداي؟

ماشينيست بولۋ ۇلكەن جاۋاپكەرشىلىك. ءبىز كەيدە 12 ساعات بويى رەلستە جۇرەمىز. شارشاساڭ دا، رەلستەن اۋىتقۋعا بولمايدى. ءار شەشىمىڭ ناقتى، جىلدام ءارى دۇرىس بولۋى كەرەك. سول ءۇشىن دە ماشينيستكە تەك بىلىكتىلىك ەمەس، ىشكى دايىندىق جانە جاۋاپكەرشىلىك ماڭىزدى.

- سۇحبات بەرگەنىڭىزگە راحمەت!

Abai.kz