قازاقستاندا الەۋمەتتىك وسال وتباسىلاردىڭ بالالارىن مەملەكەت ەسەبىنەن مەكتەپكە دايىنداۋ شارالارى باستالدى.

وقۋ-اعارتۋ مينيسترلىگى ۇسىنعان اقپاراتقا سايكەس، بيىل جاڭا وقۋ جىلى قارساڭىندا 500 مىڭنان استام ادامعا - جەتىم، اتا-انا قامقورلىعىنسىز قالعان، از قامتىلعان جانە اتاۋلى الەۋمەتتىك كومەك الاتىن وتباسى بالالارىنا قارجىلاي كومەك بەرىلەدى.

مينيسترلىك حابارلاۋىنشا، ومىرلىك قيىن جاعدايعا تاپ بولعان بالالار دا نازاردان تىس قالمايدى.

جالپىعا بىردەي ءبىلىم بەرۋ قورىنان اتا-انالاردىڭ ەسەپشوتتارىنا ءاربىر بالا ءۇشىن 46 228 تەڭگە اۋدارىلادى. وسى اقشاعا مەكتەپ فورماسىن، اياق كيىم جانە كەڭسە تاۋارلارىن ساتىپ الۋعا مۇمكىندىك بولادى.

ايتا كەتەيىك، بىلتىر دا 500 مىڭنان استام بالانىڭ اتا-اناسىنا 22,2 ملرد تەڭگە اۋدارىلدى. سول كەزدە ءاربىر بالاعا 45 مىڭ تەڭگەدەن شىققان.

Abai.kz