2025 جىلدىڭ 14 شىلدەسىندە مەملەكەت باسشىسى مىندەتتى الەۋمەتتىك مەديتسينالىق ساقتاندىرۋ ء(مامس) تۋرالى زاڭعا ەنگىزىلگەن ماڭىزدى وزگەرىستەرگە قول قويعانى بەلگىلى.

جاڭاشىلدىقتىڭ باستى ءمانى – بيۋدجەت مۇمكىندىكتەرى مەن حالىقتىڭ قاجەتتىلىكتەرىن ەسكەرە وتىرىپ، بىرىڭعاي بازالىق مەملەكەتتىك مەديتسينالىق كومەك پاكەتىنىڭ قۇرىلۋى. بۇل قادام دەنساۋلىق ساقتاۋ جۇيەسىن تۇراقتى، ءادىل جانە قولجەتىمدى ەتۋگە باعىتتالعان.

نەگىزگى ماقسات – ءبىرتۇتاس ءارى اشىق جۇيە

دەنساۋلىق ساقتاۋ ۆيتسە-ءمينيسترى ءلاززات شومانوۆانىڭ ايتۋىنشا، رەفورما مەملەكەت باسشىسىنىڭ تاپسىرماسىن ورىنداۋ اياسىندا قولعا الىنعان.

بيۋدجەت مۇمكىندىكتەرى مەن مىندەتتەمەلەرىن ەسكەرە وتىرىپ، ءبىرتۇتاس بازالىق مەملەكەتتىك مەديتسينالىق كومەك پاكەتى بىرتىندەپ قالىپتاسادى. ال وسى تىزىمگە كىرمەگەن قىزمەتتەر ساقتاندىرۋ جۇيەسى ارقىلى قارجىلاندىرىلادى، – دەيدى ۆەدومستۆو وكىلى.

پاكەتتى قۇرۋدا حالىقارالىق تاجىريبە ەسكەرىلدى. ماسەلەن، رەسەي مەن ەستونيادا بازالىق پاكەتكە تۋبەركۋلەز، ايتۆ/جيتس، پسيحيكالىق اۋرۋلار مەن سانيتارلىق اۆياتسيا كىرەدى. ليتۆادا تەك جەدەل كومەك ۇسىنىلسا، گەرمانيا مەن نيدەرلاندىدا – مەيىربيكەلىك كۇتىم قامتىلادى. ال قازاقستاندا بۇل ءتىزىم الدەقايدا كەڭەيتىلىپ وتىر.

2025 جىلدان باستاپ نە وزگەرەدى؟

كەلەر جىلدان باستاپ بىرىڭعاي بازالىق مەملەكەتتىك مەديتسينالىق كومەك پاكەتى 13 الەۋمەتتىك ماڭىزى بار اۋرۋدى ەمدەۋدى جالعاستىرادى. بۇل تۋرالى الەۋمەتتىك مەديتسينالىق ساقتاندىرۋ قورىنىڭ رەسمي وكىلى زابيرا ورازاليەۆا ءتۇسىندىرىپ بەردى. ولاردىڭ قاتارىندا:

• تۋبەركۋلەز،
• ايتۆ/جيتس،
• باۋىردىڭ سوزىلمالى ۆيرۋستىق گەپاتيتى مەن تسيرروزى،
• پسيحياتريا/ناركولوگيا،
• ونكولوگيا (ونكوگەماتولوگيا),
• سيرەك كەزدەسەتىن اۋرۋلار،
• جەدەل ميوكارد ينفاركتى،
• قانت ديابەتى،
• رەۆماتيزم،
• دتسپ،
• جۇيكە جۇيەسىنىڭ دەگەنەراتيۆتى جانە دەميەلينيزاتسيالايتىن اۋرۋلارى،
• دانەكەر ءتىننىڭ جۇيەلى زاقىمدانۋى.

سونىمەن بىرگە 9 اۋرۋ توبى ديناميكالىق باقىلاۋعا الىنادى: اريتميا، جۇرەكشەلەردىڭ دىرىلدەۋى، ارتەريالدىق گيپەرتەنزيا، تومەنگى تىنىس جولدارىنىڭ سوزىلمالى اۋرۋلارى، گلومەرۋليارلى اۋرۋلار، براحيوتسەفالدىق ارتەريالاردىڭ ەكستراكرانيالدى اۋرۋلارى، جۇرەكتىڭ يشەميالىق اۋرۋى، سوزىلمالى ينتەرستيتسيالدى نەفريت، جۇرەك قاقپاقتارىنىڭ زاقىمدانۋى، ەپيلەپسيا كىرەدى، - دەپ اتاپ ءوتتى قور وكىلى.

بۇل پاكەتكە جەدەل مەديتسينالىق كومەك، ينفەكتسيالىق اۋرۋلاردى ەمدەۋ، امبۋلاتوريالىق دياليز، شۇعىل جاعدايلاردا جوعارى تەحنولوگيالىق مەديتسينالىق كومەك، شەتەلدە ەمدەلۋ، قان پرەپاراتتارىمەن قامتاماسىز ەتۋ، ءپاللياتيۆتى كومەك، مەيىربيكەلىك كۇتىم، پاتولوگواناتوميالىق دياگنوستيكا جانە ساقتاندىرىلماعاندارعا ارنالعان جەدەل ستاتسيونارلىق كومەك كىرەدى.

ءمامس-كە وتەتىن قىزمەتتەر

2025 جىلدان باستاپ تمككك (تەگىن مەديتسينالىق كومەكتىڭ كەپىلدەندىرىلگەن كولەمى) پاكەتىنىڭ ءبىر بولىگى ءمامس جۇيەسىنە اۋىسادى. ماسەلەن، 13 اۋرۋ ءتۇرى – ارتروپاتيا، دورسوپاتيا، باۋىر اۋرۋلارى، قالقانشا بەزىنىڭ اۋرۋلارى، وتادان كەيىنگى جۇرەك اقاۋلارى جانە باسقالارى ساقتاندىرۋ ەسەبىنەن كورسەتىلەتىن بولادى.

بيىل 1 قىركۇيەكتەن باستاپ بارلىق ونكوسكرينينگتەر تمككك پاكەتى اياسىندا تەگىن جۇرگىزىلەدى. سونداي-اق جاڭا قىزمەتتەر قاتارىندا براحيوتسەفالدىق ارتەريالاردىڭ ۋلترادىبىستىق زەرتتەۋى مەن امبۋلاتوريالىق كوروناروگرافيا بار.

2026–2027 جىلدارعا جوسپار قانداي؟

2026 جىلدان باستاپ 11 الەۋمەتتىك ماڭىزى بار اۋرۋعا كۇدىك تۋىنداعان جاعدايدا تەگىن دياگنوستيكا قولجەتىمدى بولادى. سكرينينگ اۋقىمى دا كەڭەيەدى: قان اينالىمى جۇيەسىنىڭ اۋرۋلارى، قانت ديابەتى، گلاۋكوما، ۆ جانە س گەپاتيتتەرىن تەكسەرۋ ەنگىزىلەدى. ءمامس پاكەتىنە رەۆماتيزم، جۇيكە جۇيەسىنىڭ اۋرۋلارى، دتسپ، قانت ديابەتى سياقتى 26 سوزىلمالى اۋرۋ ەنەدى.

2027 جىلى ءمامس اياسىندا العاشقى مەديتسينالىق-سانيتارلىق كومەك (مساك) جانە 11 الەۋمەتتىك ماڭىزى بار اۋرۋدى ەمدەۋ مەن ءدارى-دارمەكپەن قامتاماسىز ەتۋ قوسىلادى.

ناتيجەسىندە قارجىلاندىرۋ ەكى بولىككە بولىنەدى:

• مەملەكەت كەپىلدىك بەرەتىن پاكەت – 35%،
• ساقتاندىرۋ جۇيەسى ارقىلى قارجىلاندىرىلاتىن بولىك – 65%.

بۇل – مەديتسينالىق كومەكتى قولجەتىمدى، ءادىل جانە ۇزاق مەرزىمدى تۇراقتى ەتۋگە مۇمكىندىك بەرەتىن تەڭدەستىرىلگەن شەشىم، - دەيدى الەۋمەتتىك مەديتسينالىق ساقتاندىرۋ قورىنىڭ رەسمي وكىلى زابيرا ورازاليەۆا.

ءمامس قامتۋ اۋقىمى ارتادى

قازىر قازاقستاندا شامامەن 3,4 ملن ادام ساقتاندىرىلماعان. ونىڭ 1 ميلليونى الەۋمەتتىك ءالسىز توپتار مەن جۇمىسسىزدار ساناتىندا (D جانە E) جانە ولاردىڭ ساقتاندىرۋى جەرگىلىكتى بيۋدجەت ەسەبىنەن جۇزەگە اسىرىلادى. بۇل قادام ۇكىمەت پەن قارجى مينيسترلىگىنىڭ قولداۋىمەن اتقارىلىپ جاتىر.

2025 جىلى ءمامس جۇيەسىمەن قامتۋ 95%-عا جەتەدى دەپ كۇتىلۋدە (2024 جىلى – 83%). 15 جەڭىلدىك ساناتىنداعى 12,1 ملن ازاماتتىڭ جارناسىن مەملەكەت تولەيدى.

مەملەكەتتىك كەپىلدىك پەن ساقتاندىرۋ جۇيەسىنىڭ ۇيلەسىمدى جۇمىسى ناتيجەسىندە قازاقستاندىقتار ءۇشىن مەديتسينالىق قىزمەتتەردىڭ قولجەتىمدىلىگى ارتىپ، الەۋمەتتىك ادىلدىك قاعيداتى كۇشەيەدى. بۇل – دەنساۋلىق ساقتاۋ جۇيەسىنىڭ تۇراقتىلىعى مەن حالىقتىڭ ءومىر ساپاسىن جاقسارتۋعا باعىتتالعان كەشەندى قادام.