اقمولا وبلىسىندا قر اۋىل شارۋاشىلىعى مينيسترلىگى مەن ءوڭىر اكىمدىگىنىڭ ۇيىمداستىرۋىمەن رەسپۋبليكالىق باق وكىلدەرىنىڭ قاتىسۋىمەن پرەسس-تۋر ءوتتى. جۋرناليستەر زاماناۋي اگروتەحنولوگيالارمەن، ەگىن جيناۋ ناۋقانىنا دايىندىق بارىسىمەن تانىسىپ، مەملەكەتتىك قولداۋدىڭ اۋىل تۇرعىندارىنا ءوندىرىستى دامىتۋعا قالاي كومەكتەسىپ جاتقانىن ءبىلدى.

زەرەندى اۋدانىنداعى «ۆيكتوروۆسكوە» جشس 23,6 مىڭ گەكتار جەردى وڭدەيدى، ونىڭ ىشىندە 17,8 مىڭ گەكتارى — ەگىستىك، 6,8 مىڭ گەكتارى — جايىلىم. ەگىس قۇرىلىمىندا بيداي، ارپا، سۇلى، بۇرشاق داقىلدارى، زىعىر، راپس جانە مالازىقتىق شوپتەر بار. مۇندا زاماناۋي تەحنيكا پاركى، استىق كەپتىرگىش، مەحانيكالاندىرىلعان توك جانە ءتىپتى ءوز ناۋبايحاناسى دا جۇمىس ىستەيدى. ماۋسىم كەزىندە 200-گە دەيىن ادام ەڭبەك ەتەدى.

كاسىپورىن مەملەكەتتىك قولداۋ شارالارىن بەلسەندى پايدالانادى، جەڭىلدەتىلگەن جانار-جاعارماي مەن تەحنيكا الادى، بۇل تۇراقتى ءونىم الۋعا مۇمكىندىك بەرەدى.

شارۋاشىلىق ديرەكتورى ۆيتالي گونچاروۆتىڭ ايتۋىنشا، بيىل العاش رەت ءتالىمى جەرگە قانت قىزىلشاسى ەگىلگەن.

«بۇل ءىستى ەندى باستادىق، بىراق گەكتارىنا كەم دەگەندە 30 توننا الۋدى جوسپارلاپ وتىرمىز. بۇل — جاقسى ناتيجە. ءبىز اۋرۋلار مەن زيانكەستەرگە قارسى ءتورت رەت وڭدەۋ جۇرگىزدىك. سالىستىرمالى تۇردە ايتساق، بيدايدا ادەتتە ەكى رەت جاسايمىز. جوبا پيلوتتىق، بىراق بولاشاعى زور، اسىرەسە قاسىمىزدا قايتا وڭدەۋ زاۋىتى اشىلسا»، — دەدى ول.

پرەسس-تۋردىڭ كەلەسى نىسانى — «جۋراۆلەۆكا-1» جشس. بۇل — وڭىردەگى ەڭ ءىرى شارۋاشىلىقتاردىڭ ءبىرى. 122,8 مىڭ گەكتار جەردە ءداندى، مايلى، بۇرشاق داقىلدارى، كارتوپ جانە كوكونىس وسىرىلەدى. سونداي-اق، مۇندا مال شارۋاشىلىعى، سونىڭ ىشىندە اسىل تۇقىمدى قازاقتىڭ اقباس سيىرى باعىتى دامىپ كەلەدى.

كاسىپورىن باسشىسى قۋانتاي سۇلتانوۆتىڭ ايتۋىنشا، مەملەكەتتىك قولداۋدىڭ ارقاسىندا شارۋاشىلىق ماشينا-تراكتور پاركىنىڭ 90%-ىن جاڭارتا العان.

«بىزدە 64 جاڭا كومباين بار. «كەڭ دالا» باعدارلاماسى بويىنشا 6 ملرد تەڭگەدەن استام قاراجات الدىق، تىڭايتقىش، جانار-جاعارماي جانە تەحنيكا ساتىپ الدىق. بۇل تىكەلەي ونىمدىلىكتىڭ ارتۋىنا اسەر ەتتى: بيىل گەكتارىنا 23 تسەنتنەر الۋدى جوسپارلاپ وتىرمىز، وتكەن جىلى 18 تسەنتنەر بولدى. قازىر بىزدە 530-دان استام ادام جۇمىس ىستەيدى. وسى اپتادا جيناۋدى باستايمىز»، — دەدى ول.

اقمولا وبلىسى اۋىل شارۋاشىلىعى باسقارماسى باسشىسىنىڭ ورىنباسارى رەنات قاسەنوۆتىڭ ايتۋىنشا، وڭىردەگى ەگىن جيناۋ اۋماعى 5,3 ملن گەكتاردى قۇرايدى، بۇل 2024 جىلمەن سالىستىرعاندا 128 مىڭ گەكتارعا كوپ. ونىڭ ىشىندە ءداندى جانە ءداندى-بۇرشاقتى داقىلدار — 4,7 ملن گا، مايلى داقىلدار — 495,4 مىڭ گا، كارتوپ — 8,7 مىڭ گا، كوكونىس — 1,4 مىڭ گا.

«قولايلى اۋا رايى مەن ۋاقىتىلى اگروتەحنيكالىق شارالار ەگىستىك القاپتارىنىڭ 80%-ىندا جاقسى جاعدايدى قامتاماسىز ەتتى. 4,2 ملن گەكتاردا حيميالىق ارامشوپكە قارسى وڭدەۋ اياقتالدى، 273 مىڭ توننا مينەرالدى تىڭايتقىش ەنگىزىلدى. مۇنىڭ ءبارى كوكتەمگى ەگىس جۇمىستارىنا جەڭىلدەتىلگەن نەسيە بەرۋ باعدارلامالارىنىڭ ارقاسىندا مۇمكىن بولدى. بيىل 905 فەرمەر 116 ملرد تەڭگەدەن استام قولداۋ الدى»، — دەدى ول.

قر اشم ستراتەگيا دەپارتامەنتى ديرەكتورىنىڭ ورىنباسارى ارايلىم الىمبەكوۆانىڭ ايتۋىنشا، بيىل اگرارشىلارعا جەڭىلدەتىلگەن نەسيەگە شامامەن 700 ملرد تەڭگە بولىنگەن، بۇل ون جىل بۇرىنعىدان 10 ەسە كوپ. ال جەڭىلدەتىلگەن ليزينگكە — 250 ملرد تەڭگە قاراستىرىلعان. بۇل شارالار شارۋاشىلىقتارعا ەگىس جۇمىستارىن ۋاقىتىلى جۇرگىزۋگە جانە زاماناۋي تەحنولوگيالاردى ەنگىزۋگە مۇمكىندىك بەرەدى.

ايتا كەتەيىك، بيىل قازاقستاندا اۋىل شارۋاشىلىعى داقىلدارىن جيناۋ اۋماعى 23,6 ملن گەكتاردى قۇرايدى، ونىڭ ىشىندە 16 ملن گەكتار — ءداندى جانە ءداندى-بۇرشاقتى داقىلدار. تامىز ايىنىڭ باسىندا ەلدە 880 مىڭ گەكتار جينالىپ، 1,2 ملن توننا استىق باستىرىلدى. سولتۇستىك وڭىرلەردە جاپپاي جيناۋ تامىزدىڭ ورتاسىندا باستالادى.

قر اشم ەگىنشىلىك دەپارتامەنتى باسقارماسىنىڭ باسشىسى باقىت ءىلياسوۆ جۋرناليستەرگە بيىلعى جيىن-تەرىم ناۋقانىنا 38 مىڭ كومباين، 138 مىڭ تراكتور جانە 50 مىڭ وراق دايىندالعانىن ايتتى.

«ليترىنە 274 تەڭگە باعامەن 402 مىڭ توننا جەڭىلدەتىلگەن ديزەل وتىنى ءبولىندى، بۇل نارىقتىق باعادان 20% ارزان. وتكەن جىلدان باستاپ اۋقىمدى جەڭىلدەتىلگەن تەحنيكا ليزينگى باعدارلاماسى جۇمىس ىستەپ جاتىر جانە وعان قىزىعۋشىلىق ارتىپ كەلەدى. 250 ملرد تەڭگەنىڭ جارتىسى يگەرىلدى. سونىمەن قاتار، قازاقستاندا John Deere تەحنيكاسىن شىعارۋ باستالدى، ونى 30% سۋبسيديامەن الۋعا مۇمكىندىك بار»، — دەدى ول.

Abai.kz