قاتاڭ كواليتسيانىڭ جەتەكشىلەرى ۋكرايناعا قاۋىپسىزدىكتى قولداۋ ماقساتىندا كوپۇلتتى كۇشتەر جىبەرۋگە دايىن ەكەنىن ءبىلدىردى، دەپ حابارلايدى Ulysmedia.kz.

17 تامىز كۇنى سەرىكتەس ەلدەر كواليتسياسىنىڭ باسشىلارى اقش پرەزيدەنتى دونالد ترامپ پەن ۆلاديمير ءپۋتيننىڭ الياسكاداعى كەلىسسوزدەرىنەن كەيىن ۋكرايناعا قولداۋ كورسەتۋ بويىنشا كەلەسى قادامداردى تالقىلادى. بىرلەسكەن مالىمدەمەدە ەۋروپا مەن وداقتاستاردىڭ ۋكراينانىڭ قاۋىپسىزدىگىن قامتاماسىز ەتۋدە نەگىزگى ءرول اتقارۋعا دايىن ەكەنى اتاپ ءوتىلدى.

ۇلىبريتانيا ۇكىمەتىنىڭ سايتىنداعى دەرەكتەرگە سايكەس، كواليتسيا اقش-تىڭ قاۋىپسىزدىك كەپىلدىكتەرىن بەرۋ جونىندەگى كۇش-جىگەرىن جوعارى باعالاعان. قۇجاتتا سوعىس قيمىلدارى اياقتالعاننان كەيىن ۋكراينادا كوپۇلتتى كۇشتەردى ورنالاستىرۋ مۇمكىندىگى قاراستىرىلاتىنى باسا كورسەتىلگەن. مالىمدەمەدە كواليتسيا ۋكراينا اۋە جانە تەڭىز كەڭىستىگىن باقىلاۋدى قامتاماسىز ەتۋگە، سونداي-اق ونىڭ قارۋلى كۇشتەرىن قالپىنا كەلتىرۋگە جاردەم بەرۋگە دايىن ەكەنى ايتىلعان.

وسىلايشا، سەرىكتەستەر قاقتىعىس اياقتالعاننان كەيىن ەلدىڭ ۇزاق مەرزىمدى تۇراقتىلىعىنا كەپىلدىكتى كۇشەيتۋدى كوزدەپ وتىر. بۇعان قوسا، كوشباسشىلار كيەۆكە بەرىلەتىن قولداۋدىڭ وزگەرمەيتىنىن راستادى جانە ۋكراينا پرەزيدەنتى ۆلاديمير زەلەنسكيدىڭ ءادىل بەيبىتشىلىككە قول جەتكىزۋگە باعىتتالعان كۇش-جىگەرىن جالعاستىرۋدىڭ ماڭىزدىلىعىن اتاپ ءوتتى.

Abai.kz