استانا قالاسىنىڭ اكىمى جەڭىس قاسىمبەك Instagram پاراقشاسىندا ەلوردانى سۋمەن قامتۋ ماسەلەسى قالاي شەشىلەتىنى تۋرالى جازدى، دەپ حابارلايدى قالا اكىمدىگىنىڭ رەسمي سايتى.

«ەلوردا تۇرعىندارىنىڭ جىل سايىنعى ءوسىمىن ەسكەرە وتىرىپ، تىرشىلىكتى قامتاماسىز ەتۋ نىساندارىنىڭ قۋاتىن جوسپارلى ءارى كەزەڭ-كەزەڭىمەن ارتتىرۋ جۇمىسىن جۇرگىزىپ جاتىرمىز. ءبىز قازىردىڭ وزىندە گاز جىلۋ ستانتسيالارىنىڭ (گجس) قۇرىلىسى ەسەبىنەن قالانىڭ جىلۋ قۋاتىن ۇلعايتتىق. بۇل ءوز كەزەگىندە جاڭا نىسانداردى پايدالانۋعا بەرۋگە مۇمكىندىك جاسايدى. سول سياقتى جاڭا گجس، قوسالقى ەلەكتر ستانتسيالارى سالىنۋدا، ولاردىڭ اراسىندا قولدانىستاعى نىساندار دا جاڭعىرتىلىپ جاتىر.

سۋرەت: gov.kz سايتىنان الىندى.

وزدەرىڭىز بىلەتىندەي، 2023 جىلدىڭ كوكتەمىندە سۋ ماسەلەسى بولدى. سول جىلى جازدا جاڭا سۋ قۇبىرى مەن ءۇشىنشى سورعى-سۇزگى ستانتسياسى (سسس-3) ىسكە قوسىلدى. قازىرگى ۋاقىتتا قالادا قۋات تاپشىلىعى جوق. بۇدان بولەك، الداعى جىلدارعا ارنالعان قور دا بار.

استانانى قوسىمشا تۇراقتى سۋمەن قامتاماسىز ەتۋ ءۇشىن «تەلمان» سورعى ستانتسياسىندا تەحنيكالىق سۋ قۇبىرىن سالۋ جوباسىن جۇزەگە اسىرىپ جاتىرمىز. تەحنيكالىق سۋ قۇبىرىنىڭ ەكىنشى جەلىسىن سالۋ ارقىلى «تەلمان» ءبىرىنشى كوتەرۋ سورعى ستانتسياسى تاۋلىگىنە 160 مىڭ م³ جوبالىق قۋاتىنا تولىقتاي شىعادى.

سونىمەن قاتار، نۇرا جەراستى سۋ ورنىندا سۋ قۇبىرىن سالۋ جوباسىن ازىرلەدىك.

سۋرەت: gov.kz سايتىنان الىندى.

بۇدان بولەك، ۇزاقمەرزىمدى شارالار اياسىندا ق.ساتباەۆ اتىنداعى ارنادان جاڭا سۋ قۇبىرى مەن ءتورتىنشى سورعى-سۇزگى ستانتسياسىن (سسس-4) سالۋدى باستادىق. سۋ الۋ نىسانىنىڭ ونىمدىلىگى – تاۋلىگىنە 342 مىڭ م³. سسس-4 قۋاتى – تاۋلىگىنە 210 مىڭ م³. اتالعان جوبانى ىسكە اسىرۋ 2035 جىلعا دەيىن حالىقتى تازا اۋىز سۋمەن قامتاماسىز ەتۋگە قاجەتتى قۋات بەرەدى.

سونداي-اق، حۋسەين بەن تالال كوشەسىنەن سىعاناق كوشەسىنە دەيىنگى سۋ قۇبىرىن تۇيىقتاۋ جوباسى ازىرلەنىپ جاتىر. بۇل جوبا تۇران داڭعىلىنىڭ باتىسىنداعى اۋداندى سۋمەن قامتاماسىز ەتەدى. جوبالاۋ جۇمىسى 2025 جىلدىڭ جەلتوقسانىندا اياقتالادى دەپ جوسپارلانىپ وتىر»، – دەپ جازدى جەڭىس قاسىمبەك.

Abai.kz