جامبىل وبلىسىندا حالىقارالىق ماڭىزى بار «باتىس ەۋروپا – باتىس قىتاي» اۆتوجولى بويىندا، مەركى اۋدانى اقتوعان اۋىلىنىڭ ماڭىندا العاشقى زاماناۋي Keruen Inn قوناقۇيى پايدالانۋعا بەرىلدى.

سالتاناتتى شاراعا وبلىس اكىمىنىڭ ورىنباسارى ءابىلحايىر تامابەك، مەركى اۋدانىنىڭ اكىمى ەربول جيەنقۇلوۆ جانە جەرگىلىكتى تۇرعىندار قاتىستى.

بۇل نىسان پرەزيدەنت تاپسىرماسىنا سايكەس قر ۇكىمەتى جانىنداعى ينۆەستيتسيالار تارتۋ جونىندەگى كەڭەستە ماقۇلدانعان «2025–2029 جىلدارى Qazaq Oil-دىڭ 60 جول بويىنداعى قوناقۇيى» باعدارلاماسى اياسىندا جۇزەگە اسىرىلدى. جوبا تولىقتاي جەكە ينۆەستيتسيالار ەسەبىنەن قارجىلاندىرىلعان.

سۋرەت: gov.kz سايتىنان الىندى.

– مەملەكەت باسشىسىنىڭ باستاماسىمەن ەلىمىزدە كولىك-لوگيستيكالىق ينفراقۇرىلىمدى دامىتۋ، حالىققا ساپالى قىزمەت كورسەتۋ باعىتىندا اۋقىمدى جۇمىستار جۇرگىزىلۋدە. سونىڭ اياسىندا وڭىرىمىزدە دە زاماناۋي تالاپتارعا ساي سەرۆيستىك كەشەندەردىڭ سانى ارتىپ كەلەدى. بۇل كەشەن جول جۇرگىنشىلەرىنە قولايلى جاعداي جاساۋمەن قاتار، جەرگىلىكتى حالىققا جاڭا جۇمىس ورىندارىن ۇسىنىپ، كاسىپكەرلىكتى دامىتۋعا جول اشادى. وسىنداي يگى باستامالار ەل ەكونوميكاسىنىڭ وسۋىنە جانە ازاماتتاردىڭ ءال-اۋقاتىنىڭ ارتۋىنا ۇلەس قوساتىنى ءسوزسىز، – دەدى ءابىلحايىر تامابەك.

ودان كەيىن Qazaq Oil باس ديرەكتورى تولەمىس شوتانوۆ، «قازاۆتوجول» ۇك» اق باسقارما توراعاسى دارحان يماناشەۆ جانە وزگە دە قوناقتار قۇتتىقتاۋ ءسوز سويلەدى.

سۋرەت: gov.kz سايتىنان الىندى.

باعدارلاما اياسىندا الداعى جىلدارى ەلدىڭ نەگىزگى كولىك دالىزدەرى – «باتىس ەۋروپا – باتىس قىتاي»، «سولتۇستىك – وڭتۇستىك»، سونداي-اق شەكارا بەكەتتەرى مەن تۋريستىك الەۋەتى جوعارى ايماقتاردا وسىنداي زاماناۋي قوناقۇيلەر جەلىسى اشىلماق.

Keruen Inn قوناقۇيى – ساپاردا جايلى دەمالۋدىڭ جاڭا مۇمكىندىگى. اۋماعى 900 شارشى مەتردەن اساتىن نىساندا 31 ستاندارتتى ءنومىر بار. ءار بولمە جەكە دۋشپەن، سانيتارلىق توراپپەن، تەلەديدار جانە تەگىن Wi-Fi جەلىسىمەن جابدىقتالعان. قوناقتارعا قاجەتتى بارلىق قولايلى جاعداي جاسالعان، سونىڭ ىشىندە گيگيەنالىق قۇرالدار دا قاراستىرىلعان.

سۋرەت: gov.kz سايتىنان الىندى.

كەشەن اۋماعىندا كەڭ ءمازىر ۇسىناتىن كافە، كۇزەتىلەتىن اۆتوتۇراق، كىر جۋ قىزمەتى، جولعا قاجەتتى تاۋارلار دۇكەنى، جانارماي قۇيۋ ستانتسياسى جانە ەلەكتر كولىكتەرىنە ارنالعان قۋاتتاۋ بەكەتى بار.

جوبانى جۇزەگە اسىرعان Qazaq Oil كومپانياسى ەلىمىزدە زاماناۋي جول بويى سەرۆيسىنىڭ بىرىڭعاي ەكوجۇيەسىن قالىپتاستىرۋدى ماقسات ەتىپ وتىر.

«Qazaq Oil-دىڭ 2025–2029 جىلدارعا ارنالعان 60 جول بويىنداعى قوناقۇي» باعدارلاماسى اياسىندا بوي كوتەرەتىن بارلىق نىسان حالىقارالىق ستاندارتتارعا ساي سالىنىپ، ەنەرگيا تيىمدىلىگى تالاپتارىن ساقتايتىن بولادى.

سۋرەت: gov.kz سايتىنان الىندى.

Abai.kz