جىل سايىن جۋرناليستەر كۇنىنە وراي مەملەكەت باسشىسى قاسىم جومارت كەمەلۇلى توقاەۆ قازاقستاندىق اقپارات سالاسى وكىلدەرىن ءتولمەرەكەلەرىمەن قۇتتىقتاپ، كاسىبي بىلىگى جوعارى مامانداردى ەڭبەگىنە ساي ماراپاتتاپ كەلەدى. بيىلعى مەرەكە قارساڭىندا Abai kz سايتىنىڭ ەڭبەگى ەلەنىپ، سايتىمىز پرەزيدەنتتىڭ «العىس» حاتىنا يە بولدى. بۇل – سايتتىڭ جىلدار بويى اتقارعان تياناقتى ەڭبەگىنىڭ ناتيجەسى. سوندىقتان، بارلىق وقىرماندارىمىزعا قۇتتى بولسىن ايتامىز!

وڭىرلەردەگى باق وكىلدەرىنە باسپانا بەرىلەدى

اق وردادا ءباسپاسوز وكىلدەرىمەن جۇزدەسكەن مەملەكەت باسشىسى جۋرناليستيكا سالاسىندا قاي كەزدە دە ۇلت مۇددەسىن بارىنەن بيىك قوياتىن، پاراساتتى، ناعىز وتانشىل تۇلعالار قىزمەت ەتكەنىن اتاپ ءوتتى.

– ولار حالىقتىڭ سانا-سەزىمىن وياتىپ، ەلدىڭ ەڭسەسىن كوتەرۋگە زور ۇلەس قوستى، اعارتۋشىلىقپەن اينالىسىپ، حالىقتى ءبىلىم مەن عىلىمعا شاقىردى. سىزدەر دە اعا بۋىن سالعان سارا جولدى لايىقتى جالعاستىرىپ كەلەسىزدەر. بارشاڭىزعا تاعى دا زور العىس ايتامىن. مەملەكەت مەديا سالاسى قىزمەتكەرلەرىن ءاردايىم قولدايدى، ولاردىڭ الەۋمەتتىك جاعدايىن جاقسارتۋعا باسا ءمان بەرەدى. بارشاڭىزعا ءمالىم، جىل سايىن كاسىبي مەرەكە قارساڭىندا تىلشىلەر قاۋىمىنا پاتەر كىلتىن تابىستاۋ جاقسى داستۇرگە اينالدى. سوڭعى ءۇش جىلدا استانا قالاسىندا عانا 200 جۋرناليست باسپانالى بولدى. ەندى بۇل باستامانىڭ اۋقىمىن كەڭەيتە ءتۇسۋدى كوزدەپ وتىرمىز. اسىرەسە، ساپالى حابار تاراتىپ، قاجىرلى قىزمەت ەتىپ جۇرگەن ايماق تىلشىلەرىنىڭ ەڭبەگىن ەلەۋسىز قالدىرۋعا بولمايدى دەپ سانايمىن. سوندىقتان مەنىڭ تاپسىرماممەن وسى جىلى العاش رەت وبلىستاردا جۇمىس ىستەيتىن جۋرناليستەرگە دە پاتەر كىلتى تابىستالادى. جالپى، بيىلدىڭ وزىندە بۇكىل ەلىمىز بويىنشا اقپارات سالاسىنىڭ 66 قىزمەتكەرىنە باسپانا بەرىلەدى. بارىڭىزگە قۇتتى بولسىن دەيمىن! – دەدى قاسىم-جومارت توقاەۆ. 

مەديا سالاسى مەملەكەتتىڭ قاۋىپسىزدىگىنە ات سالىسۋعا ءتيىس

ءباسپاسوز وكىلدەرىن وسىنداي قۋانىشقا بولەگەن جيىن بارىسىندا پرەزيدەنت جاڭا كونستيتۋتسيانى قابىلداۋعا جۋرناليستەردىڭ  قوسقان ۇلەسىن جوعارى باعالادى. سونداي-اق ول ءباسپاسوز وكىلدەرىنىڭ قوعام الدىنداعى جاۋاپكەرشىلىگى ارتا تۇسكەندىگىن دە ەسكەرتىپ ءوتتى.

– زاماناۋي تەحنولوگيالار تسيفرلىق الاڭدا الاۋىزدىقتى ادەيى ۋشىقتىراتىن «بوتوفەرمالاردىڭ» پايدا بولۋىنا تۇرتكى بولدى. كوپە-كورىنەۋ جالعان اقپارات تاراتۋ، ادامدى قارالاۋ، وتىرىكتى شىنداي سوعاتىن قاۋىپتى قۇبىلىس قالىپتاستى. ونى قازىر ديپفەيك دەپ اتايدى. ياعني وبەكتيۆتى فاكتىلەر ەموتسيانىڭ كولەڭكەسىندە قالىپ، قاساقانا ارانداتۋشىلىق تۋعىزادى. قوعامنىڭ ىنتىماق-بىرلىگىنە سىنا قاعىپ، مەملەكەتتىك ينستيتۋتتاردىڭ اتىنا كىر كەلتىرۋ ءۇشىن جاساندى ينتەللەكت قۇرالدارى قولدانىلادى. تانىمال تۇلعالاردىڭ جاساندى تسيفرلىق بەينەلەرىن تۇپنۇسقادان اجىراتۋ مۇمكىن ەمەس. مۇنداي تەحنولوگيالاردى ءتۇرلى الاياقتار مەن دەسترۋكتيۆتى كۇشتەر بەلسەندى پايدالانادى. سوندىقتان مەديا سالاسىنىڭ قىزمەتكەرلەرى جاۋاپكەرشىلىك تانىتىپ، مەملەكەتتىڭ اتالعان گيبريدتى، اسا قاۋىپتى قاتەرلەرگە توتەپ بەرۋىنە اتسالىسۋعا ءتيىس. وسى ورايدا سىزدەردىڭ ەڭبەكتەرىڭىز وراسان, – دەدى پرەزيدەنت.

«قالام ەلدى تۇزەيدى»

– جاستار مەدياكەڭىستىكتەن ىسىراپشىلدىق پەن ءمانسىز ىردۋ-دىردۋعا تولى الدامشى ءومىردى ەمەس، كەرىسىنشە، جاسامپاز ەڭبەكتىڭ، ادال تابىستىڭ، ىشكى مادەنيەتتىڭ ناعىز ۇلگىسىن كورۋى كەرەك, – دەدى پرەزيدەنت اتالعان جيىندا. – بۇگىنگى جۋرناليستەر ەكى ماڭىزدى ءرولدى قوسا اتقارۋعا ءتيىس: ياعني ولار شىندىقتى بوياماسىز كورسەتەتىن اينا، سونىمەن قاتار ۇلتتى وركەنيەتكە جەتەلەيتىن اعارتۋشىلىق جولداعى شامشىراق بولۋى كەرەك. قازىر ءبىز ءبىرتۇتاس ۇلت بولىپ، وركەندەگەن، زاماناۋي، ياعني وزىق مەملەكەت قۇرىپ جاتىرمىز. بىراق بۇل – ءتول قۇندىلىقتارىمىزدى ۇمىتۋ دەگەن ۇعىم ەمەس. ءبىز جۇرتىمىزعا ءتان يگى قاسيەتتەردى جاڭعىرتا ءتۇسۋىمىز كەرەك. مۇنى ازاماتتارىمىز، اسىرەسە، جاستارىمىز تەرەڭ ءتۇسىنۋى قاجەت. مادەنيەتى جوعارى ەلدىڭ الەمدەگى مارتەبەسى دە، بەدەلى دە بيىك بولارى ايقىن. ال ناعىز مادەنيەت ۇيدە دە، تۇزدە دە ادەپ ساقتاۋ، كوپشىلىك ورتادا ءوزىن دۇرىس ۇستاۋ، باسقا ادامداردى قۇرمەتتەۋ، سىيلاۋ سياقتى قاراپايىم قاعيدالاردان باستالادى. قازاق حالقى ادەپتەن اتتاماعان، ءاردايىم ۇلكەنگە قۇرمەت، كىشىگە ىزەت كورسەتە بىلگەن. جاقىنىنا جاناشىر كوزبەن قاراپ، جىعىلعانعا دەمەۋ، سۇرىنگەنگە سۇيەۋ بولعان. ءبىزدىڭ شىنايى بولمىسىمىز – وسى. سوندىقتان ادامنىڭ ار-نامىسىنا نۇقسان كەلتىرەتىن، قاۋىپسىزدىگىنە قاتەر توندىرەتىن كەز كەلگەن ارەكەتكە جول بەرمەۋ قاجەت. ءبىز وزىق ەل رەتىندە قوعامدا سالت-داستۇرىمىزگە نەگىزدەلگەن وركەنيەتتى ەتيكالىق نورمالاردى ورنىقتىرا ءتۇسۋىمىز كەرەك. مەن بۇل تۋرالى ۇنەمى ايتىپ ءجۇرمىن. وسى باعىتتاعى جۇمىستى كۇشەيتۋ – ايرىقشا ماڭىزى بار مىندەت. «قالام ەلدى تۇزەيدى» دەگەن ءسوز بەكەر ايتىلماعان. وسى ورايدا، ءبىز سىزدەرگە – جۋرناليستەر قاۋىمىنا زور ءۇمىت ارتامىز. اقپارات سالاسىنىڭ قىزمەتكەرلەرى قاشاندا ۇلت ساپاسىن جاقسارتاتىن قۇندىلىقتاردى دارىپتەۋ ىسىنە بەلسەنە اتسالىسۋى قاجەت دەپ سانايمىن.  

P.S. پرەزيدەنت ايتقانداي، مەملەكەتتىڭ قاۋىپسىزدىگى مەن تۇتاستىعىن تەرەڭ ويلايتىن، ءارى اعارتۋشىلىق باعىتتاعى مەملەكەتشىل، وتانشىل باق-تىڭ ءبىرى – Abai.kz اقپاراتتىق پورتالى.

بۇگىندە Abai.kz اقپاراتتىق پورتالىنداعى كونتەنتتى ۇزبەي تۇتىناتىن وقىرمان سانى – 1,5 ميلليونعا جۋىقتادى.

تاۋلىگىنە ورتا ەسەپپەن 30-40 مىڭعا جۋىق وقىرمان وقيتىن بۇل باسىلىم – تەك قازاقستان اۋماعىندا عانا ەمەس، اقش، انگليا، فرانتسيا، جاپونيا، قىتاي، موڭعوليا، مالايازيا، سينگاپۋر، تۇركيا، رەسەي سەكىلدى الەمنىڭ ۇلكەن مەملەكەتتەرىنەن ءوز وقىرمانىن تاپقان بىردەن ءبىر پورتال.

Abai.kz اقپاراتتىق پورتالىنىڭ جانىنا ءبىلىمدى، بىلىكتى اۆتورلار شوعىرى قالىپتاسقان. مۇنداي ساپالى ءارى تۇراقتى كولۋمنيستەر كلۋبى سايتتاردى بىلاي قويىپ،  بايىرعى ءداستۇرلى ءباسپاسوزدىڭ قاسىنان تابىلا بەرمەيدى.

پورتالدا سۇرىپتالعان، وقىرمان قاۋىمدى سانالى وي بيىگىنە جەتەلەيتىن اقپاراتتار مەن ماتەريالدار عانا جاريالاناتىنىنا وقىرمان قاۋىمى ءوزى كۋا.

سوندىقتان، Abai.kz اقپاراتتىق پورتالىنىڭ پرەزيدەنتتىڭ «العىس» حاتىنا يە بولۋى – پورتال قىزمەتكەرلەرىن قاناتتاندىرادى ءارى جاڭا جاۋاپكەرشىلىكتەر جۇكتەيدى دەپ سەنىممەن ايتا الامىز.

Abai.kz پورتالىنىڭ ۇجىمى

Abai.kz