قازاقستاننان بولەك تاعى التى ەلدىڭ الدىنداعى بەرەشەگىن تولىق وتەگەن. 

1 قىركۇيەكتەگى جاعداي بويىنشا گرۋزيا پاريج كلۋبى اياسىندا رەسەي، ازەربايجان، تۇركيا، قازاقستان، ارمەنيا، يران جانە نيدەرلاندى الدىنداعى قارىزىن تولىق وتەپ بولدى، دەپ حابارلايدى inbusiness.kz سايتى FINMARKET.RU باسىلىمىنا سىلتەمە جاساپ.

گرۋزيا قارجى مينيسترلىگىنىڭ ايتۋىنشا، بۇل 2004 جىلى قارىزدى قايتا قۇرىلىمداۋ تۋرالى كەلىسىم اياسىندا جۇزەگە اسقان.

2025 جىلعى 1 تامىزداعى جاعداي بويىنشا گرۋزيانىڭ بۇل ەلدەرگە بەرەشەگى 7,32 ملن دوللارعا جەتكەن، سونىڭ ىشىندە رەسەيگە 4 ملن دوللار قارىز بولعان.

قايتارىلعان قارىزعا 1999 جىلعا دەيىن الىنعان 160 ملن دوللار كولەمىندەگى نەگىزگى قارىز، 1999 جىلدان 2004 جىلدىڭ مامىرىنا دەيىن جينالعان پايىزدار جانە 2004-2006 جىلدارى تولەنۋى ءتيىس قارىزدار كىرەدى.

باسىلىمنىڭ جازۋىنشا، قارىزداردى قايتا قۇرىلىمداۋ 2004 جىلدىڭ 1 ماۋسىمى مەن 2006 جىلدىڭ 1 جەلتوقسانى ارالىعىندا جۇرگىزىلگەن. ءتيىستى كەلىسىم حالىقارالىق ۆاليۋتا قورىنىڭ گرۋزياعا كومەك باعدارلاماسىن ماقۇلداعاننان كەيىن جاسالعان.

قارىزداردى قايتا قۇرىلىمداۋ باستالعانعا دەيىن گرۋزيانىڭ سىرتقى قارىزدارى كەلەسىدەي قالىپتاسقان. اتاپ ايتقاندا، قازاقستانعا – 28 ميلليون دوللار، رەسەيگە – 153 ميلليون دوللار، تۇركياعا – 53,4 ميلليون دوللار، ارمەنياعا – 19,6 ميلليون دوللار، ازەربايجانعا – 16,2 ميلليون دوللار، يرانعا – 12,8 ميلليون دوللار.

جالپى تولەنگەن سوما 225 ملن دوللاردان اسىپ وتىر.

گرۋزيانىڭ سىرتقى مەملەكەتتىك قارىزى 9,09 ملرد دوللارعا جەتتى. بۇل  كورسەتكىش جىل باسىنان بەرى 5,8%-عا ارتتى. قارىزدىڭ 70%-ى ەۋرومەن الىنعان.

Abai.kz