ىشكى ىستەر مينيسترلىگى ەسىرتكى قىلمىسىنا قارسى كۇرەستى جالعاستىرۋدا.

- 2026 جىلدىڭ بەس ايىندا ءۇش مىڭنان استام ەسىرتكىگە قاتىستى قۇقىق بۇزۋشىلىقتىڭ جولى كەسىلدى، ونىڭ ىشىندە شامامەن 1,5 مىڭ ەسىرتكى قىلمىسى انىقتالدى. سونىمەن قاتار التى ۇيىمداسقان قىلمىستىق توپتىڭ، ونىڭ ىشىندە ءبىر ترانسۇلتتىق توپتىڭ قىزمەتى توقتاتىلدى. سينتەتيكالىق ەسىرتكى وندىرەتىن 12 زەرتحانا جانە 42 فيتوزەرتحانا جويىلدى. 12 مىڭعا جۋىق زاڭسىز ونلاين-رەسۋرس بۇعاتتاۋعا جىبەرىلدى. ۇلتتىق بانكپەن بىرلەسىپ، ەسىرتكى بيزنەسىنە قاتىستى قارجىلىق وپەراتسيالارعا توسقاۋىل قويىلۋدا. ناتيجەسىندە 107 ميلليون تەڭگەدەن استام كۇماندى قارجى اۋدارىمى توقتاتىلدى. 125 مىڭعا جۋىق شەتەلدىك تولەم كارتاسى بۇعاتتالدى. سونداي-اق 20 مىڭ كريپتواميان تەكسەرىلۋدە. ۇلكەن قاۋىپتىڭ ءبىرى - سينتەتيكالىق ەسىرتكىلەر. زاڭسىز اينالىمنان 466 كيلوگرامم سينتەتيكالىق ەسىرتكى جانە 11 توننادان استام پرەكۋرسور تاركىلەندى. الدىن الۋ جۇمىستارى دا جالعاسۋدا. جىل باسىنان بەرى مەكتەپتەر مەن جوعارى وقۋ ورىندارىندا 6,5 مىڭنان استام ەسىرتكىگە قارسى ءىس-شارا وتكىزىلدى. سەگىز مىڭنان استام اقپاراتتىق ماتەريال جاريالاندى. حالىقارالىق ىنتىماقتاستىق دامىپ كەلەدى. قازاقستان شەتەلدىك ارىپتەستەرىمەن بىرلەسىپ، ترانسۇلتتىق ەسىرتكى قىلمىسىنا توسقاۋىل قويۋدا. قوعامدىق قاۋىپسىزدىكتى نىعايتۋ، ازاماتتاردىڭ دەنساۋلىعىن قورعاۋ جانە جاس ۇرپاقتىڭ بولاشاعىن ساقتاۋ ماقساتىندا ەسىرتكى قىلمىسىنا قارسى كەشەندى جۇمىستار جالعاساتىن بولادى، - دەدى ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى ەلدار ابدىكەنوۆ.

Abai.kz