ەستونيا تاراپتىڭ تاراتقان مالىمەتى بويىنشا، كەشە رەسەيدىڭ 3 ميك-31سوعىس ۇشاعى ەستونيا اۋە كەڭىستىگىنە باسا كوكتەپ كىرگەن. ناتو مەن ەۋرووداق ولاردىڭ بۇل ارەكەتىن جاڭا ارانداتۋ دەپ باعالاپ قاتاڭ ايىپتادى. كرەمل تارابى ءالى جاۋاپ قايتارعان جوق.

وتكەن اپتادا عانا پولشا جاعى رەسەيدىڭ 20 درونىنىڭ ەل اۋماعىنا سۇعاناقتىق جاساعانىن ايتقان ەدى، رەسەي تارابى ونى مويىندامادى.

ەستونيا سىرتقى ىستەر ءمينيستىرى بۇدان بۇرىن رەسەي ۇشاقتارىنىڭ 4 رەت ەل اۋماعىنا زاڭسىز كىرگەنىن، بۇل جولى ءتىپتى الىنەن اسقانىن، كەڭىستىكتە 12 مينۋت تۇرعانىن اتاپ ءوتتى. ەۋرووداق سىرتقى ىستەر ءمينيسترى كاللاس تا رەسەي تارابىنىڭ بۇل جولعى ارەكەتىنىڭ قاۋىپتى سيگنال ەكەتىنىن اتاپ ءوتىپ، جاعدايدى ودان ارى ۋشىقتىراتىنىن باسا ايتتى.

جاعدايدان كەيىن بالتىق تەڭىزىنە ورنالاسقان يتاليانىڭ F-35 سوعىس ۇشاعى ورىس ۇشاقتارىنىڭ الدىن كەس-كەستەپ ەسكەرتۋ جاساپ، ناتو اۋماعىنان قۋىپ شىققان.

اقش پرەزيدەنتى ترامپ انگلياعا ساپارى كەزىندە پۋتيننەن كوڭىلى قالعانىن جەتكىزگەن ەدى. ونىڭ الدىندا پولشا تۋرالى دا "مەيلى ول دروندار رەسەيدىكى بولسىن، بولماسىن، ول ارادا قاراسىن كورسەتپەۋى كەرەك" دەگەن ەدى.

ەۋرووداق رەسەيگە قارسى 19-كەزەكتى سانكتسياسىن دايىنداپ، داۋىسقا سالۋعا ازىرلەنىپ جاتقانى بەلگىلى. زەلەنسكي ايتقانداي كرەملدىڭ كەزەكتى ارەكەتى ناتو ەلدەرىن وزدەرى ويلاعانداي ەكىۇداي قىلۋدىڭ ورنىنا، كەرىسىنشە بىرىكتىرە تۇسەتىنى، اسكەري قىراعىلىقتى كۇشەيتۋگە يتەرمەلەيتىنى انىق.

Abai.kz