اباي وبلىسىنىڭ ورتالىعى سەمەي قالاسىندا ءار سەنبى سايىن «سەۆەرنىي» ساۋدا-لوگيستيكالىق ورتالىعىندا (سلو) اۋىل شارۋاشىلىعى جارمەڭكەلەرى تۇراقتى تۇردە وتەدى. جارمەڭكەلەردىڭ باستى ماقساتى - قالا تۇرعىندارىن ساپالى ءارى قولجەتىمدى ازىق-تۇلىكپەن قامتاماسىز ەتۋ.

قالانىڭ وڭ جاعالاۋىندا ورنالاسقان «سەۆەرنىي» سلو (مەكەنجايى: سەۆەرنىي وندىرىستىك تورابى، 2) – زاماناۋي ۇلگىدەگى تۇراقتى ساۋدا الاڭى. اتالعان ورتالىقپەن جاسالعان مەموراندۋم اياسىندا 24 ساۋدا ورنى تەگىن بەرىلىپ وتىر، بۇل ءوز كەزەگىندە ءونىم باعاسىنىڭ تومەن بولۋىنا ىقپال ەتەدى.

جارمەڭكەدە الەۋمەتتىك ماڭىزى بار ازىق-تۇلىك ونىمدەرى، ياعني ەت، ءسۇت ونىمدەرى، كوكونىستەر، ناۋبايحانا بۇيىمدارى مەن جارمالار ۇسىنىلدى. باعالار نارىقتاعى باعادان تومەن:
سيىر ەتى - 3500 تگ/كگ
تاۋىق ەتى - 1500 تگ/كگ
ءبىرىنشى سورتتى ۇن - 180 تگ/كگ
نان - 150 تگ
كۇنباعىس مايى («زارەچنوە») — 850 تگ/ل
سارى ماي («بورودۋليحا اۋدانى») - 2800 تگ/كگ
كارتوپ - 180 تگ/كگ
ءسابىز - 200 تگ/كگ
پياز - 170 تگ/كگ
ورامجاپىراق - 190 تگ/كگ
قانت - 490 تگ/كگ
جۇمىرتقا - 580 تگ/وندىق
قاراقۇمىق - 250 تگ/كگ

بۇگىنگى جارمەڭكەدە 19,5 توننا سيىر ەتى، 1000 كگ كارتوپ، 1000 كگ پياز، 250 كگ ءسابىز، 250 كگ ورامجاپىراق ساتىلىپ، حالىققا ۇسىنىلدى.

بۇل كولەم تۇرعىنداردىڭ جارمەڭكەگە دەگەن سۇرانىسىنىڭ جوعارى ەكەنىن كورسەتەدى. سەمەيلىكتەر قولجەتىمدى باعا مەن ءونىم ساپاسىن وڭ باعالاۋدا.
قازىرگى تاڭدا اباي وبلىسى اكىمدىگى قىركۇيەك-جەلتوقسان ايلارىنا ارنالعان قوسىمشا اۋىل شارۋاشىلىعى جارمەڭكەلەرىنىڭ كەستەسىن ازىرلەۋدە. بۇل كۇز-قىس مەزگىلىندە دە تۇرعىنداردى ۇزدىكسىز ءارى قولجەتىمدى ازىق-تۇلىكپەن قامتاماسىز ەتۋگە مۇمكىندىك بەرەدى.

سەمەيدەگى اۋىل شارۋاشىلىعى جارمەڭكەلەرى - بۇل جاي عانا ساۋدا ەمەس، حالىقتىڭ الەۋمەتتىك قولداۋ تەتىگى.

Abai.kz