اباي وبلىسىندا قازاقتىڭ ءداستۇرلى ءان ونەرىن حالىقارالىق دەڭگەيدە ناسيحاتتاۋعا باعىتتالعان مادەني ءىس-شارا ءوتتى. قر مادەنيەت سالاسىنىڭ ۇزدىگى، شاكارىم ۋنيۆەرسيتەتىنىڭ "ونەر" كافەدراسىنىڭ وقىتۋشىسى، ۋنيۆەرسيتەتتىڭ قۇرمەتتى پروفەسسورى قايرات قابىشەۆ ەتنومادەنيەت باعىتى بويىنشا ازيا مەن افريكانىڭ دۇنيەجۇزىلىك رەكوردتار كىتابىنا ەندى.

سۋرەت: Shakarim University سايتىنان الىندى.

رەكوردتى تىركەۋ قورىتىندىسى بويىنشا ونەر يەسىنە رەسمي سەرتيفيكات پەن كۇمىس مەدال تابىستالدى. قايرات ارقاشۇلى رەكورد ورناتۋ بارىسىندا قازاقتىڭ 102 ءداستۇرلى ءانىن 5 ساعات 29 مينۋت بويى ورىندادى. رەكورد تالاپتارىنا سايكەس ءار 25 اننەن كەيىن 15 مينۋتتىق ءۇزىلىس جاساۋ مۇمكىندىگى قاراستىرىلعانىمەن، ورىنداۋشى بۇل قۇقىقتى پايدالانعان جوق. بارلىق شىعارمالار نوتاسىز، ءماتىنسىز، فونوگرامماسىز جانە ورىنداۋشىنىڭ ءوز اسپاپتىق سۇيەمەلدەۋىمەن ورىندالدى.

سۋرەت: Shakarim University سايتىنان الىندى.

ءىس-شاراعا حالىقارالىق Global Best of Records (GBR) ۇيىمىنىڭ ازيا جانە افريكا ديۆيزيونى بويىنشا رەكوردتاردى تىركەۋ جونىندەگى باس وفيتسەرى قۋاندىق قۇدايبەرگەن قاتىسىپ، كورسەتىلگەن ناتيجەنىڭ بىرەگەي سيپاتىن اتاپ ءوتتى.

سۋرەت: Shakarim University سايتىنان الىندى.

ءوز كەزەگىندە قايرات قابىشەۆ بۇل ناتيجەگە ۇلتتىق انشىلىك مەكتەپ ءداستۇرى مەن ۇستازدار تاعىلىمىنىڭ نەگىز بولعانىن ايتتى. سونداي-اق مۇنداي باستامالار جاستار اراسىندا ۇلتتىق ونەردى ناسيحاتتاۋعا سەرپىن بەرەتىنىن جەتكىزدى.

اتالعان رەكورد قازاقتىڭ ءداستۇرلى ءان ونەرىنىڭ حالىقارالىق دەڭگەيدە تانىلۋى مەن ۇلتتىق مادەنيەتتىڭ جاھاندىق كەڭىستىكتەگى بەدەلىنىڭ ارتىپ كەلە جاتقانىن كورسەتەدى.

تالانتتىڭ كوزىن اشقان

سۋرەت: semeylib.kz سايتىنان الىندى.

شايماردان قالياقپاروۆ، قر جۋرناليستەر وداعىنىڭ مۇشەسى:

– 10 ماۋسىم - قازاق حالقى ءۇشىن قۋانىشتى كۇن بولدى. ابايلىق قايرات ارقاشۇلى قابىشەۆ سەمەي فيلارمونياسىنىڭ ساحناسىندا 6 ساعات بويى تاپجىلماي وتىرىپ، قازاقتىڭ ءداستۇرلى 102 ءانىن ورىنداپ شىقتى.

قاتىناس قانجار سانى كوپ بولدى. ءبارىمىز اق تىلەگىمىزبەن باردىق. قايراتىمىز الدىنا قويعان ماقساتىن - الەمدىك رەكوردىن ورىنداپ شىقسىن دەگەن تىلەكتە بولدىق. ول ءار ولەڭگە تۇسىنىكتەمە بەرىپ وتىرعاندا "كۇش-قۋاتىن الادى" ايتپاي-قويساڭشى دەپ وتىردىم. داۋىسى قارلىعىپ، شىقپاي، ايتا الماي قالا ما دەپ كۇدىكتەنىپ وتىردىم. تاڭداپ العان اندەرى دە اۋىر ەكەن. سوزىلمالى، ۇزاق ىرعاقتى تالاپ ەتەدى. ونىڭ ۇستىنە قايرات دەمىن المادى، وتىرعان ورنىنان تۇرمادى. ساۋساقتارى دا قاتىپ قالدى. تاماق تا ىشپەدى، سىرتقا دا شىقپادى. ىشتەي تولعانىپ وتىردىم.

"بالاسى اتقا شاپسا، اناسى تاقىمىن قىسادى" دەگەن قالىپتا وتىردىم. ءار ولەڭىن ناقىشىنا كەلتىرىپ، داۋىسىن ۇنەمدەي، شىعارىپ ايتىپ وتىردى. ءار ءاننىڭ ورىندالعانى مەن قوسا سانىن قاداعالاپ وتىردىم. "مارەسىنە جەتسە ەكەن" دەپ تىلەپ وتىردىم. قايرات ءار ءاندى تولىعىمەن، ءبىر كەشتە اسىقپاي وتىرىپ ايتقانىنداي، ايتىپ شىقتى. شارا بارىسىندا كوميسسيا مۇشەلەرى دە، تىڭداۋشىلار دا قولىمىزدان كەلگەنشە قولداپ وتىردىق. قايراتتى قولداماعان ادام بولعان جوق. ول ءانىن ورىنداعاندا ءبارىمىز دە جەرىمىزدى ىسىمىزگە الىپ تىنىش وتىردىق. بوگەت جاسامايتىن دەگەن نيەتتە بولدىق.

ول 100-ءى ءانىن ورىندادى. تاعى دا ەكى ءاندى ايتىپ شىقتى. ءالى دە شاماسى بار. بىراق 102 انمەن توقتادى. كورەرمەندەر تاعى 20 مينۋت الەمدەگى، ازيا مەن افريكا، ساۋد ارابياسىنداعى كوميسسيانىڭ شەشىمىن كۇتتىك. ولار دا قايراتتىڭ ورىنداۋلارىن قاراپ، قاداعالاپ وتىرىپتى. سول كوميسسيانىڭ قازاقستانداعى وكىلى قۋانىش دەگەن ازامات كوميسسيانىڭ قايرات قابىشەۆتىڭ تالاپقا ساي ورىنداعانىن، 102 قازاق ءانىن ورىنداعانىن قابىلداپتى. قايراتتىڭ رەكورد قويعانىن مويىنداپتى. ءبىزدىڭ دە كۇتكەنىمىز سول ەدى. بۇكىل قازاقستاندىقتار ءۇشىن، قازاق حالقى ءۇشىن قۋانىش. قۇتتى بولسىن!

كيەلى اباي توپىراعى پەرزەنتىن رەكوردقا جەتكىزدى. قۋانىش ماراپاتتارىن بەردى. كوميسسيانىڭ شەشىمىن جەتكىزدى. قايراتتىڭ ورىنداعانى الەم دەڭگەيىندە قابىلداندى، 100-دەن ارتىق ەلگە تارادى. مەنىڭ قاسىمدا قايراتتىڭ ءىنىسى اسەت وتىردى. ول قايراتتىڭ كىشكەنتاي كەزىنەن انگە اۋەس ەكەنىن، كەشكە جاتسا دا، كوزى ىلىنگەنشە ولەڭ ايتاتىن، وعان اكە-شەشەسىنىڭ "ۇيقى بەرمەيسىڭ" دەپ رەنجىمەي تىندەرىن ايتىپ وتىردى.

سەمەي پەداگوگيكالىق ينستيتۋتىنا تۇسەردە، قايرات الدىندا قابىلداناتىن 5 بالانىڭ قاتارىنا ىلىنبەپتى. وسىنداي شەشىم الدىن-الا تىڭداۋدان وتكەندە بولىپتى. قايرات ستۋدەنت بولا المايتىنىن ءبىلىپ، كوڭىلسىز وتىرعان. ءبىر ۋاقىتتا قابىلداۋ كوميسسياسى ونىڭ تىزىمگە ەنگىزىلگەنىن تابلودان كورسەتىپتى. وندا 5 سانى 6-عا وزگەرتىلىپتى. وسىلاي قايراتتىڭ كوڭىلى كوتەرىلىپ ستۋدەنت بولىپ شىعا كەلىپتى. زور تالپىنىستارعا يە بولعان قايرات ينستيتۋتتى بىتىرگەن. وسىلاي كوميسسيا مۇشەلەرى "بۇلاقتىڭ كوزىن اشىپ" وقۋعا جىبەرىپتى. تالانتتىڭ ىسكە اسۋىنا كومەگىن تيگىزىپتى. ەگەر كوميسسيا بۇرىنعى شەشىمىندە تۇرسا، نە بولار ەدى؟..

مۇمكىن، ينستيتۋتقا قابىلدانباعان ول اۋىلدا قويشى بولىپ قالار ما ەدى؟ كوميسسيانىڭ ىشىندەگى ءبىر ادامنىڭ كورەگەندىگى بولار. مىنە، سونداي ءبىر كىسىنىڭ ۇسىنىسىمەن قايرات قابىشەۆ ءبىلىم الىپ، ءان ونەرىنىڭ ۇزدىگى بولىپ، الەم رەكوردسمەنى بولدى. ءبىز، سەمەيلىكتەر، قازاقستاندىقتار بولىپ قايراتتى الەمدىك جەڭىسىمەن قۇتتىقتايمىز. ءالى دە الەمدىك تابىستارعا جەتسىن، ۇستازدىعى شىڭدالا بەرسىن. تۇلەكتەرى دە وزىندەي جەتىستىكتەرگە جەتسىن. تۇلەكتەرى ۇستازىنان وزىپ شىقسىن. اباي ەلىنىڭ توپىراعىنان قايراتتاي الەم كولەمىندە جەتىستىككە جەتىپ، جۇرتىن قۋانتا بەرسىن. قايراتتىڭ جەتىستىگىنە ءبارىمىز  قۋانامىز. قايرات سياقتى ۇلدارىمىزدىڭ ارقاسىندا قازاقستان الەمگە قاناتىن جايىپ تانىلا بەرسىن. جەڭىستى، ءساتتى كۇندەرىمىز كوپ بولسىن!

بۇل – اتا-بابادان كەلە جاتقان ءداستۇردىڭ بۇگىنگى زامانداعى جاڭعىرىعى!

سۋرەت: massaget.kz سايتىنان الىندى.

ەرلان رىسقالي، قازاقستاننىڭ ەڭبەك سىڭىرگەن قايراتكەرى:

– قايرات قابىشەۆ اعامىزدىڭ 100 ءاندى جاندى داۋىستا ورىنداپ، گيننەس رەكوردتار كىتابىنا ەنۋگە جاساعان تالپىنىسىن شىن جۇرەكتەن قولدايمىن. بۇل – جاي عانا رەكورد قۋالاۋ ەمەس. بۇل – قازاقتىڭ ءداستۇرلى ءان ونەرىنىڭ قۋاتىن، ءان قورجىنىمىزدىڭ بايلىعىن جانە حالقىمىزدىڭ عاسىرلار بويى قالىپتاسقان ونەرىن الەمگە تانىتۋعا باعىتتالعان يگى باستاما. بۇل – اتا-بابادان كەلە جاتقان تاڭدى تاڭعا ۇرىپ ءان سالعان ءداستۇردىڭ بۇگىنگى زامانداعى جاڭعىرىعى.

ءان – حالقىمىزدىڭ رۋحاني قازىناسى. وسىنداي ونەرپازداردىڭ ەڭبەگى ارقىلى ۇلتتىق ونەردىڭ قادىرى ارتىپ، جاستاردىڭ قىزىعۋشىلىعى ويانادى. سوندىقتان قايرات قابىشەۆتىڭ بۇل قادامىن قازاق ونەرىنە كورسەتىلگەن قۇرمەت ءارى ۇلتتىق مۇرانى ناسيحاتتاۋدىڭ زاماناۋي ۇلگىسى دەپ باعالايمىن. سونىمەن بىرگە، مۇنداي رەكوردتاردىڭ حالىقارالىق دەڭگەيدە مويىندالۋى ءۇشىن ونىڭ تالاپتارى مەن قابىلداۋ ءتارتىبى قاتاڭ ساقتالۋى قاجەت ەكەنىن دە ەستەن شىعارماعان ءجون. ويتكەنى الەمدىك رەكوردتىڭ قۇندىلىعى ونىڭ ءادىل باعالانىپ، رەسمي تالاپتارعا تولىق سايكەس تىركەلۋىندە. جالپى، مۇنداي باستامالاردىڭ قازاق ونەرىندە تاريحي ۇلگىلەرى دە بار.

كەزىندە حالقىمىزدىڭ كورنەكتى ونەر قايراتكەرى قۇرمانبەك جانداربەكوۆ عاني مۇراتباەۆقا ەسكەرتكىش ورناتۋ ماقساتىندا حالىقتىڭ نازارىن اۋدارىپ، قولداۋىن ۇيىمداستىرۋ ءۇشىن “قۇرمانبەك ءبىر كەشتە 100 ءان ورىندايدى”  دەپ جارناما بەرىپ ەلۋدەن استام ءان سالعان دەگەن دەرەك بار. ياعني ونەر ارقىلى قوعامدىق وي قالىپتاستىرۋ، ۇلتتىق مۇراتقا قىزمەت ەتۋ ءبىزدىڭ داستۇرىمىزدە بۇرىننان بار قۇبىلىس. سوندىقتان قايرات اعامىزدىڭ بۇل باستاماسىن جەكە ادامنىڭ جەتىستىگى عانا ەمەس، قازاق ءان ونەرىنىڭ مۇمكىندىگىن كورسەتەتىن مادەني وقيعا رەتىندە باعالاۋىمىز كەرەك. ىسىڭىزگە ساتتىلىك تىلەيمىن! قازاق ءانىنىڭ مەرەيى ۇستەم بولىپ، ۇلتتىق ونەرىمىزدىڭ ابىرويى اسقاقتاي بەرسىن!

Abai.kz