نيۋ-يورككە جاساعان جۇمىس ساپارى بارىسىندا قازاقستان پرەزيدەنتى قاسىم-جومارت توقاەۆ بىرقاتار جەتەكشى حالىقارالىق ۇيىمدار مەن كومپانيالاردىڭ باسشىلارىمەن كەلىسسوزدەر وتكىزدى. كەزدەسۋلەردىڭ كۇن ءتارتىبى مادەني ديپلوماتيادان باستاپ، ءبىلىم بەرۋ، قارجى جانە ەنەرگەتيكا سالالارىنداعى ىنتىماقتاستىقتى قامتىدى.

سۋرەت: اقوردا تەلەگرام ارناسىنان الىندى.

سميتسون ينستيتۋتىمەن مادەني ارىپتەستىك

مەملەكەت باسشىسى الدىمەن سميتسون ورتالىعىنىڭ حالىق شىعارماشىلىعى جانە مادەني مۇرا ارنايى جوبالارى جونىندەگى ديرەكتورى حاللە باتۆينمەن جۇزدەستى. پرەزيدەنت قازاقستان مادەنيەتىن اقش-تا بەلسەندى ناسيحاتتاپ جۇرگەنى ءۇشىن العىسىن ءبىلدىرىپ، مادەني ديپلوماتيا ەكى ەل اراسىنداعى قارىم-قاتىناستى جاڭا دەڭگەيگە كوتەرەتىنىنە سەنىم ارتتى. قازىردىڭ وزىندە ورتالىق جانىنان قۇرىلعان قازاقستاننىڭ مادەني مۇرا قورى ۇلتتىق مادەنيەت پەن ونەردى تانىتۋ، تاريح، سالت-ءداستۇر مەن رۋحاني ءومىردى زەرتتەۋ باعىتىندا بىرلەسكەن عىلىمي جوبالارعا باستاماشى بولىپ وتىر.

سۋرەت: اقوردا تەلەگرام ارناسىنان الىندى.

ءبىلىم بەرۋ سالاسىندا ETS تاجىريبەسى

ودان كەيىن ق.توقاەۆ الەمدەگى ءبىلىمدى باعالاۋ سالاسىنىڭ كوشباسشىسى سانالاتىن Educational Testing Service (ETS) كومپانياسىنىڭ پرەزيدەنتى ءارى باس اتقارۋشى ديرەكتورى اميت سەۆاكپەن كەزدەستى. پرەزيدەنت قازاقستاننىڭ ءبىلىم بەرۋ جۇيەسىن دامىتۋدا كومپانيا تاجىريبەسىن زەردەلەۋگە مۇددەلىلىك تانىتاتىنىن اتاپ ءوتتى. ءوز كەزەگىندە اميت سەۆاك ETS-ءتىڭ جىل سايىن 180 ەلگە 50 ميلليوننان استام تەست دايىنداپ، اكىمشىلەندىرەتىنىن، سونداي-اق ۇلتتىق ءبىلىم بەرۋ جۇيەلەرىنە ارنالعان بەيىندىك شەشىمدەر ۇسىناتىنىن جەتكىزدى.

سۋرەت: اقوردا تەلەگرام ارناسىنان الىندى.

Goldman Sachs-پەن تسيفرلىق قارجى سالاسىنداعى ىنتىماقتاستىق
قازاقستان پرەزيدەنتى Goldman Sachs Global Institute پرەزيدەنتى دجارەد كوەنمەن دە كەلىسسوز جۇرگىزدى. اڭگىمە بارىسىندا توقاەۆ امەريكالىق جەتەكشى ينۆەستيتسيالىق بانكتىڭ قازاقستان ۇلتتىق بانكىمەن ۇزاق مەرزىمدى ارىپتەستىك ورناتقانىن اتاپ ءوتىپ، ىقپالداستىق دەڭگەيىنە جوعارى باعا بەردى. ول قازاقستاننىڭ تولىق تسيفرلىق مەملەكەتكە اينالۋ ماقساتىن ەسكە سالا وتىرىپ، جاساندى ينتەللەكت پەن قارجى ەكوجۇيەسىن تسيفرلاندىرۋعا ەرەكشە قىزىعۋشىلىق ءبىلدىردى. ال دجارەد كوەن Goldman Sachs Digital Asset Platform تاجىريبەسىن تانىستىردى.

سۋرەت: اقوردا تەلەگرام ارناسىنان الىندى.

Cameco-مەن ەنەرگەتيكالىق سەرىكتەستىك

جۇمىس ساپارى كانادالىق Cameco كورپوراتسياسىنىڭ پرەزيدەنتى تيم گيتتسەلمەن كەزدەسۋدەن باستالدى. تاراپتار ۋران ءوندىرۋ سالاسىنداعى ارىپتەستىكتىڭ جاڭا مۇمكىندىكتەرىن تالقىلادى. پرەزيدەنت توقاەۆ Cameco-نىڭ «قازاتومونەركاسىپتىڭ» سەنىمدى سەرىكتەسى ەكەنىن ايتا كەلە، كومپانيانىڭ قازاقستاندا 500 ميلليون دوللاردان استام ينۆەستيتسيا سالىپ، تەحنولوگيا ترانسفەرىنە ىقپال ەتكەنىن جەتكىزدى. ول سونداي-اق ەلدىڭ ەنەرگەتيكا سالاسىندا جاڭا كەزەڭ باستالىپ، الداعى ۋاقىتتا ءۇش اتوم ەلەكتر ستانساسى سالىناتىنىن اتاپ ءوتتى. تيم گيتتسەل پرەزيدەنتكە تۇركىستان وبلىسىنداعى «ينكاي» بىرلەسكەن كاسىپورنىنىڭ شيرەك عاسىرلىق قىزمەتى مەن الداعى جوسپارلارى تۋرالى باياندادى.

اقش-تا وتكەن بۇل كەزدەسۋلەر قازاقستاننىڭ حالىقارالىق ارىپتەستىگىن كەڭەيتۋگە، مادەني مۇرانى دارىپتەۋگە، ءبىلىم بەرۋ جۇيەسىن جەتىلدىرۋگە، تسيفرلىق قارجىنى دامىتۋعا جانە ەنەرگەتيكا سالاسىندا جاڭا مۇمكىندىكتەر اشۋعا باعىتتالدى. پرەزيدەنتتىڭ باستامالارى قازاقستاندى زاماناۋي، يننوۆاتسيالىق ءارى اشىق مەملەكەت رەتىندە تانىتۋعا قىزمەت ەتەدى.

Abai.kz