سەمەي قالاسىندا 25 جىلدان بەرى شەبەرحانادا ۇزبەي ەڭبەك ەتىپ كەلە جاتقان ابىلايحان اسىلباي تاعدىردىڭ سىناعىنا مويىماعان حاس شەبەر.

1997 جىلى اۋىر جاراقات الىپ، ءۇش جىل توسەك تارتىپ جاتسا دا، ول ومىردەن قول ۇزبەي، قولونەرگە دەن قويادى. كەيىن بەلگىلى ۇستاز، قازاقستاننىڭ ەڭبەك سىڭىرگەن قايراتكەرى داركەمباي شوقپارۇلىنان ءتالىم الىپ، ۇلتتىق ونەردىڭ قىر-سىرىن مەڭگەرەدى.

ابىلايحان اسىلباي كەز كەلگەن قاراپايىم ماتەريالدان ەرەكشە بۇيىم جاسايدى. قازاق باتىرلارىنىڭ دۋلىعا، ساۋىت-سايماندارى مەن قارۋ-جاراعىنان باستاپ، تۇرمىستىق زاتتار مەن ايەلدەردىڭ اشەكەيلەرىن دە قولىنان شىعارادى. ءتىپتى كونسەرۆى بانكىسىن دە ونەر تۋىندىسىنا اينالدىرادى.

«بۇل ونەر ءبىزدىڭ قانىمىزدا بار. بۇگىندە اتا-بابامنىڭ ءىسىن جالعاستىرىپ وتىرعانىما قۋانامىن»، – دەيدى شەبەر.

ەڭبەككە دەگەن ادالدىعى مەن ونەرگە دەگەن سۇيىسپەنشىلىگىنىڭ ارقاسىندا ول ەلگە تانىمال بولىپ، قيىندىقتى جەڭۋدىڭ ۇلگىسىنە اينالدى.

ايتا كەتەيىك، شەبەر 25 جىل بويى كولىك گاراجىنىڭ جارتىسىن شەبەرحاناعا اينالدىرىپ، ونەرىن حالىققا پاش ەتىپ كەلەدى.

Abai.kz