بۇگىن تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن وتكەن كەڭەستە جازعى تۋريستىك ماۋسىمنىڭ قورىتىندىسى شىعارىلدى. جيىنعا وبلىس اكىمدەرىنىڭ ورىنباسارلارى مەن وڭىرلىك باسقارما باسشىلارى قاتىستى.

«بيىل تۋريزم تاقىرىبى بىرنەشە رەت كوتەرىلىپ، كەڭىنەن تالقىلاندى. وكىنىشكە قاراي، ءاردايىم وڭ ناتيجە بولا بەرمەدى.

مەملەكەت باسشىسى كۋرورتتى وڭىرلەردى جازعى تۋريستىك ماۋسىمعا دايىندىق دەڭگەيىنىڭ قاناعاتتانارلىقسىز ەكەنىن اتاپ ءوتتى. پرەزيدەنتتىڭ تاپسىرماسى بويىنشا بىرقاتار كۋرورتتى وڭىرگە تەكسەرىس جۇرگىزىلدى. ناتيجەسىندە قاجەتتى جاعدايلاردى ۇيىمداستىرۋدا ەلەۋلى كەمشىلىكتەر بار ەكەنىن انىقتالدى»، – دەدى مينيستر.

بيىل ەلىمىزدىڭ سەگىز ءىرى دەمالىس ايماعىندا، اتاپ ايتقاندا، باياناۋىل، كاتونقاراعاي، كاسپي تەڭىزى جاعالاۋى، بالقاش پەن الاكول كولدەرى (الاكولدىڭ اباي جانە جەتىسۋ وبلىستارىنداعى جاعالاۋى), قاپشاعاي جانە ششۋچە-بۋراباي كۋرورتتى وڭىرلەرىندە كەشەندى تۇگەندەۋ جۇرگىزىلدى. تالداۋ ناتيجەسىندە ينجەنەرلىك ينفراقۇرىلىمنىڭ جەتكىلىكسىزدىگى، بەيبەرەكەت ساۋدانى رەتتەۋ، جاعاجايلاردى ايماقتارعا ءبولۋ، ەلەكترمەن ۇزدىكسىز جابدىقتاۋ، قاۋىپسىزدىك ەرەجەلەرىن قاتاڭ ساقتاۋ جانە قۇتقارۋ بەكەتتەرىنىڭ سانىن كوبەيتۋ قاجەت ەكەنى بەلگىلى بولدى.

تالداۋ قورىتىندىسى بويىنشا، قۇتقارۋشىلار سانىن ارتتىرۋ، قۇتقارۋ بەكەتتەرىن زاماناۋي جابدىقپەن قامتۋ،

ينسپەكتورلاردىڭ تۇراقتى كەزەكشىلىگىن ۇيىمداستىرۋ جانە سۋ كولىگىنە باقىلاۋدى كۇشەيتۋ ۇسىنىلدى.

مەملەكەت باسشىسىنىڭ تاپسىرماسىن ورىنداۋ ماقساتىندا مينيسترلىك 2025-2028 جىلدارعا ارنالعان كۋرورتتى وڭىرلەردى دامىتۋ جونىندەگى جول كارتاسىنىڭ جوباسىن ازىرلەدى. جوباعا 141 ءىس-شارا ەنگىزىلگەن. سونداي-اق جوبانى جۇزەگە اسىرۋ رەسپۋبليكالىق جانە جەرگىلىكتى بيۋدجەتتەردەن جانە جەكە ينۆەستيتسيا ەسەبىنەن قارجىلاندىرۋ كوزدەلگەن.

كەڭەس 25 قىركۇيەكتە ماڭعىستاۋ وبلىسىندا وتەتىن حالىقارالىق تۋريستىك فورۋم اياسىندا ۇيىمداستىرىلدى.

Abai.kz