بۇگىن شىمكەنت قالاسىندا وتكەن «سۋ ينفراقۇرىلىمىن باسقارۋدىڭ جاڭا ۇلگىسى رەتىندە تسيفرلىق قۇرالدار» اتتى رەسپۋبليكالىق سەمينار اياسىندا قر ونەركاسىپ جانە قۇرىلىس مينيسترلىگى «قازاقستاندىق تۇرعىن ءۇي-كوممۋنالدىق شارۋاشىلىعىن جاڭعىرتۋ جانە دامىتۋ ورتالىعى» اق-مەن، قالا اكىمدىگىمەن، تابيعي مونوپوليا سۋبەكتىلەرىمەن جانە سۋ بۇرۋ مەن سۋمەن جابدىقتاۋ وپەراتورىمەن بىرلەسىپ، تسيفرلىق تەحنولوگيالاردى ۇلتتىق دەڭگەيدە ەنگىزۋ ماسەلەسىن تالقىلادى.

«ەنەرگەتيكا جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا قازاقستاندا جاڭا كەزەڭ باستالدى – تۇرعىن ءۇي-كوممۋنالدىق شارۋاشىلىعىندا زاماناۋي ەسەپكە الۋ جانە باسقارۋ تەحنولوگيالارىن كەڭ كولەمدە ەنگىزۋ. جوبانىڭ ماقساتى – ەسەپتىلىكتىڭ ناقتىلىعىن ارتتىرۋ، ەنەرگيا تيىمدىلىگىن قامتاماسىز ەتۋ، ەسەپ ايىرىسۋدىڭ اشىقتىعىن كۇشەيتۋ جانە كوممۋنالدىق سالاداعى شىعىنداردى ازايتۋ.

«ۇلتتىق جوبا اياسىندا ەسەپتەگىش قۇرالدار وندىرۋشىلەرى، اقپاراتتىق قاۋىپسىزدىك ساراپشىلارى، بايلانىس وپەراتورلارى، اكىمدىكتەر جانە تابيعي مونوپوليا سۋبەكتىلەرى كىرگەن تۇرعىن ءۇي-كوممۋنالدىق شارۋاشىلىعىن تسيفرلاندىرۋ جونىندەگى جۇمىس توبى قۇرىلدى. بۇل نورماتيۆتىك اكتىلەرگە دە، كاسىپورىنداردىڭ ءوز دەڭگەيىندە دە وزگەرىستەر ەنگىزۋدى قاجەت ەتەتىن كەشەندى جۇمىس»، – اتاپ ءوتتى ءوز بايانداماسىندا قر ونەركاسىپ جانە قۇرىلىس ۆيتسە-ءمينيسترى ءجاننات ءدۇبىروۆا.

ۆيتسە-مينيستر قازاقستان بۇكىل ەل كولەمىندە سمارت-تەحنولوگيالاردى ەنگىزۋدى جوسپارلاپ وتىر: ينتەللەكتۋالدى ەسەپتەگىش قۇرالدارى، تپباج جانە جاساندى ينتەللەكت سۋ جانە ەنەرگيا جەلىلەرىن باسقارۋدا ادامي فاكتوردى ازايتۋعا باعىتتالتىنىن اتاپ ءوتتى. كۇتىلەتىن ناتيجە – جاساندى ينتەللەكتتى پايدالانۋ اپاتتىلىقتى تومەندەتۋگە، سۋ مەن ەنەرگيا شىعىنىن 15–30%-عا قىسقارتۋعا، سونداي-اق ينفراقۇرىلىمنىڭ قىزمەت ەتۋ مەرزىمىن ۇزارتۋعا مۇمكىندىك بەرەدى

جوبا اياسىنداعى جۇمىستاردىڭ نەگىزگى باعىتتارى:

ونلاين-دەرەكتەردى بەرەتىن زاماناۋي ەسەپتەگىش قۇرالدارىن جاپپاي ورناتۋ. قۇرىلعىلار حالىقارالىق ستاندارتتارعا ساي بولادى، راديومودۋلدەرمەن جابدىقتالىپ، وتاندىق كاسىپورىنداردا وندىرىلەدى.

كوممۋنالدىق سالا كاسىپورىندارىندا – سۋ ارنالارىندا، جەو-لاردا، ەبك جانە جىلۋ تاسىمالداۋ ۇيىمدارىندا وندىرىستىك پروتسەستەردى باسقارۋدىڭ اۆتوماتتاندىرىلعان جۇيەلەرىن (تپباج) ەنگىزۋ.

«Smart Turmys» تۇرعىن ءۇي-كوممۋنالدىق شارۋاشىلىعىنىڭ بىرىڭعاي تسيفرلىق پلاتفورماسىن ازىرلەۋ جانە ىسكە قوسۋ. بۇل جۇيە ەل بويىنشا مەملەكەتتىك جانە جەكەمەنشىك دەرەكتەر بازاسىن بىرىكتىرىپ، ساپالى ءارى سەنىمدى اقپارات نەگىزىندە ساياسات قالىپتاستىرۋعا مۇمكىندىك بەرەدى.

رەفورمانىڭ باستى ماقساتى – ازاماتتار، بيزنەس جانە مەملەكەت ءۇشىن ەسەپ ايىرىسۋدىڭ اشىقتىعىن، كوممۋنالدىق قىزمەتتەردىڭ ساپاسى مەن قولجەتىمدىلىگىن ارتتىرۋ.

Abai,kz