الماتى قالاسى ىشكى ساياسات باسقارماسىنىڭ قوعامدىق دامۋ ورتالىعى باستاماسىمەن جاريالانعان «جۇمىسشى ماماندىقتار جىلى» اياسىندا «WORKSHOP: ەڭبەك پەن شەبەرلىك» جوباسى شەڭبەرىندە «مانساپ جولى» اتتى كەلەلى كەزدەسۋ ۇيىمداستىرىلدى.

ءىس-شارانىڭ نەگىزگى ماقساتى – جاستاردى ەڭبەككە باۋلۋ، ولاردىڭ كاسىبي باعدارىن قالىپتاستىرۋ، ءوندىرىس، قۇرىلىس، ساندىك-قولدانبالى ونەر سىندى ءتۇرلى باعىتتارداعى سۇرانىسقا يە ماماندىقتارمەن تەرەڭىرەك تانىستىرۋ. سونىمەن قاتار، تابىستى كاسىپكەرلەردىڭ ومىرلىك جولىن مىسال ەتە وتىرىپ، جاس بۋىنعا موتيۆاتسيا بەرۋ، شابىتتاندىرۋ جانە ەڭبەك نارىعىنداعى ءوز ورنىن تابۋعا باعىت-باعدار كورسەتۋ.

كەزدەسۋگە ارنايى شاقىرىلعان قوناقتار – ءتۇرلى سالالاردا تابىسقا جەتىپ، ءوز كاسىبىن دوڭگەلەتىپ وتىرعان وتاندىق كومپانيا باسشىلارى:

«SHERTER» كومپانياسىنىڭ جەتەكشىسى – ديلمانوۆ باحىت اليەۆيچ،

«ورىنباسارۇلى» كومپانياسىنىڭ باسشىسى – ورىنباسارۇلى ەلجاس،

«Zamanauy» كومپانياسىنىڭ نەگىزىن قالاۋشى – سارسەبەك زامانبەك ءسابيتۇلى.

ولار ءوز كاسىبي جولدارىنداعى العاشقى قادامدار، كەزدەسكەن قيىندىقتار مەن جەتىستىككە جەتۋ جولىنداعى تاجىريبەلەرىمەن اشىق ءبولىستى. قوناقتار ەڭبەك سۇيگىشتىك، تاباندىلىق، ۇنەمى ىزدەنۋ جانە جاڭاشىل بولۋ سەكىلدى قاسيەتتەردىڭ مانساپ جولىندا شەشۋشى ءرول اتقاراتىنىن ەرەكشە اتاپ ءوتتى.

كەزدەسۋ فورماتىندا قاتىسۋشىلارمەن ەركىن پىكىر الماسۋ، سۇراق-جاۋاپ سەسسياسى ۇيىمداستىرىلىپ، جاستار كاسىپكەرلىك، ماماندىق تاڭداۋى، كاسىپ اشۋدىڭ العاشقى ساتىلارى جونىندە ناقتى ءارى پايدالى اقپارات الدى.

شارا سوڭىندا وقۋشىلار مەن ستۋدەنتتەر جۇمىسشى ماماندىقتارىنىڭ قوعامداعى ماڭىزى مەن ارتىقشىلىقتارى جايلى تىڭ مالىمەتتەرمەن تانىسىپ، ومىردە ناقتى جەتىستىككە جەتكەن كاسىپكەرلەردىڭ تاجىريبەسىنەن مول اسەر الدى. مۇنداي كەزدەسۋلەر – جاستاردى كاسىبي دامۋعا ىنتالاندىرىپ قانا قويماي، ەڭبەككە دەگەن دۇرىس كوزقاراس قالىپتاستىرۋدا ۇلكەن ءرول اتقارادى.

كەلەشەكتە وسىنداي ءىس-شارالار ءجيى ۇيىمداستىرىلىپ، جاس ۇرپاقتىڭ سانالى ءارى ماقساتتى كاسىبي جول تاڭداۋىنا ىقپال ەتەتىن ماڭىزدى الاڭعا اينالارىنا سەنىم مول.

Abai.kz