جەتىسۋ وبلىسىنىڭ اكىمى بەيبىت يساباەۆ جۇمىس ساپارى بارىسىندا تالدىقورعان قالاسىنداعى بىرنەشە قۇرىلىس نىساندارىن ارالادى. ءوڭىر باسشىسى قۇرىلىس جۇمىستارىنىڭ ساپاسىن تەكسەرىپ، قالا اكىمى مەن مەردىگەر ۇيىمدارعا بىرقاتار تاپسىرمالار بەردى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ەڭ الدىمەن وبلىس اكىمى 2006 جىلى ورناتىلعان قازاقتىڭ ءۇش تۇلعاسى – ەسكەلدى بي، بالپىق بي جانە قابليسا جىراۋعا ارنالعان «ءۇش اتا» مونۋمەنتىن جانە ونىڭ اينالاسىن اباتتاندىرۋ جۇمىسىن تەكسەردى. جوندەۋ جۇمىستارىنىڭ ساپاسىنا كوڭىلى تولماعان وبلىس باسشىسى مەردىگەر ۇيىم «Qyran qurylysshy» جشس جۇمىسىنا سىن جاسادى. اتاپ ايتقاندا، پليتكا توسەۋ، تروتۋار مەن باسپالداق سالۋ كەزىندە كەمشىلىكتەر انىقتالدى. مەردىگەر كومپانيا ديرەكتورىنىڭ ورىنباسارى اسلان بەكەنوۆ بارلىق ەسكەرتۋلەر ۋاقىتىندا تۇزەتىلىپ، نىسان بەلگىلەنگەن مەرزىمدە تاپسىرىلاتىنىن ايتتى.

سۋرەت: gov.kz سايتىنان الىندى.

كەلەسى نىسان – «جەتىسۋ» شاعىن اۋدانى. مۇندا كوپقاباتتى ۇيلەردىڭ اۋلالارىن جوندەۋ جۇمىستارى جالعاسۋدا. بالالار الاڭدارىنىڭ قۇرىلعىلارى ورناتىلىپ، اسفالت توسەلىپ جاتىر. جالپى بيىل تالدىقورعاندا 59 اۋلا اباتتاندىرىلادى، ونىڭ ىشىندە 11 – «جەتىسۋ» شاعىن اۋدانىندا، 18 –«جۇلدىز» شاعىن اۋدانىندا. سونىمەن قاتار، 39 شاتىرى جوندەلىپ، 20 كوپقاباتتى تۇرعىن ءۇيدىڭ قاسبەتتەرى جاڭارتىلادى، ال بولاشاقتا «عارىشكەر» مەن «مۇشەلتوي» شاعىن اۋداندارىندا دا وسىنداي جوندەۋ جۇمىستارى جۇرگىزىلمەك.

ەسكە سالساق، وبلىس اكىمىنىڭ تاپسىرماسىمەن وتكەن جىلدان بەرى ەسكى كوپقاباتتى ۇيلەردىڭ اۋلالارىن اباتتاندىرۋ جۇمىستارى قولعا الىنعان بولاتىن. العاشقى بولىپ «ۇلان» شاعىن اۋدانىنداعى ۇيلەردىڭ اۋلاسىندا جوندەۋ جۇمىستارى جۇرگىزىلىپ، تۇرعىندار تاراپىنان وڭ باعاسىن الدى. قازىرگى كەزدە بۇل شاعىن اۋدانداعى ۇيلەردىڭ قاسبەتتەرىن، شاتىرلارى مەن ۆيتراج جوندەۋ جۇمىستارى جالعاسۋدا.

مۇنان سوڭ وبلىس اكىمى «قۇلاگەر» شاعىن اۋدانىنداعى جاڭا ساياباققا باردى. قالا كۇنىنە وراي پايدالانۋعا بەرىلگەن ساياباق قازىردىڭ وزىندە تۇرعىندارىنىڭ سۇيىكتى ورنىنا اينالعان. وبلىس اكىمى بۇل نىسانداعى قۇرىلىس پەن اباتتاندىرۋ جۇمىستارىن جوعارى باعالادى. الداعى ۋاقىتتا كەزەڭ-كەزەڭىمەن كوگالداندىرۋ جوسپارلانۋدا.

سۋرەت: gov.kz سايتىنان الىندى.

قالا اكىمى ەرنات ءبازىلدىڭ ايتۋىنشا، «قۇلاگەر» شاعىن اۋدانىندا قۇرىلىس جۇمىستارى قارقىندى تۇردە جۇرگىزىلىپ جاتىر. قازىرگى ۋاقىتتا 500 پاتەرگە ارنالعان ۇيلەر سالىنىپ، سونداي-اق ينۆەستور ەسەبىنەن مەكتەپ پەن بالاباقشا سالۋ جوسپارلانۋدا.

ءوڭىر باسشىسى تۇرعىن ءۇي قۇرىلىسىنا دا نازار اۋداردى. جاڭا سالىنعان ۇيلەردى قاراپ شىققان سوڭ، بەيبىت يساباەۆ مەردىگەر ۇيىم وكىلدەرىنە ساپاعا ەرەكشە كوڭىل ءبولۋدى تاپسىردى.

سۋرەت: gov.kz سايتىنان الىندى.

«جاستار-3» شاعىن اۋدانىندا ءبىر مەزگىلدە ونداعان كوتتەدج سالىنىپ جاتىر. بۇل ۇيلەر بىرنەشە ۇيىمدارمەن سالىنىپ، كەيىن مەملەكەت تاراپىنان تۇرعىن ءۇي كەزەگىندە تۇرعاندارعا ساتىپ الىنادى. ەگەر بىلتىر 56 ءۇي ساتىپ الىنعان بولسا، بيىل تاعى 220 ءۇي الۋ جوسپارلانۋدا، ال جالپى بۇل اۋداندا 780-نەن استام كوتتەدج بوي كوتەرمەك. سونىمەن قاتار بۇل شاعىن اۋدان دا كەزەڭ-كەزەڭىمەن اباتتاندىرىلىپ، الەۋمەتتىك نىساندار سالىنباق، قازىرگى ۋاقىتتا جول توسەۋ جۇمىستارى جۇرگىزىلۋدە.

جاقىندا سالىنعان كوتتەدجدەردىڭ ءبىرىن ارالاپ شىققان بەيبىت يساباەۆ جوسپارلاۋ مەن قۇرىلىس ساپاسىنىڭ جوعارى دەڭگەيدە ەكەنىنە كوز جەتكىزدى.

سۋرەت: gov.kz سايتىنان الىندى.

سونىمەن قاتار، وبلىس اكىمى ۇزىندىعى 2,3 كم بولاتىن قابانباي باتىر كوشەسىندەگى جول جوندەۋ جۇمىستارىنىڭ بارىسىمەن تانىستى. قازىرگى ۋاقىتتا جۇمىس رۇستەمبەكوۆ كوشەسىنىڭ قيىلىسىندا جۇرگىزىلۋدە. ايتا كەتەيىك، بۇل ۋچاسكەدە 30-عا جۋىق جۇمىسشى مەن 13 تەحنيكا تارتىلعان، نىسان قازان ايىنىڭ سوڭىنا دەيىن اياقتالماق.

بۇگىنگى تاڭدا ەلىمىزدىك بارلىق وڭىرلەرىندە تۇرعىن ءۇي قۇرىلىسى تەك سان جاعىنان ەمەس، ساپا تۇرعىسىنان دا جاڭا دەڭگەيگە كوتەرىلۋدە. قۇرىلىس ماتەريالدارىنىڭ وتاندىق ءوندىرىسى جولعا قويىلىپ، ەكولوگيالىق تازا ءارى ەنەرگيا ۇنەمدەيتىن تەحنولوگيالار ەنگىزىلۋدە. بۇل ءوز كەزەگىندە تۇرعىن ۇيلەردىڭ قولجەتىمدىلىگىن ارتتىرىپ، ازاماتتاردىڭ ءومىر سۇرۋىنە جايلى جاعداي جاساۋعا مۇمكىندىك بەرەدى. اسىرەسە، اۋىلدىق جەرلەر مەن شاعىن قالالاردا جەكە تۇرعىن ۇيلەر سالۋ جوبالارى جۇزەگە اسىپ، ينفراقۇرىلىمدىق جۇيەلەر جاڭارتىلۋدا — جول، جارىق، سۋ جانە گاز جەلىلەرى تارتىلىپ، جاڭا الەۋمەتتىك نىساندار بوي كوتەرىپ جاتىر. مۇنداي وزگەرىستەر جاستاردىڭ وڭىردە قالىپ، ەڭبەك ەتۋىنە ىقپال ەتىپ، ۋربانيزاتسيا ۇدەرىسىن تۇراقتاندىرۋعا اسەر ەتۋدە.

سونىمەن قاتار، مەملەكەتتىك قولداۋ باعدارلامالارى ارقىلى الەۋمەتتىك وسال توپتار مەن جاستار ءۇشىن جالدامالى پاتەرلەردىڭ سانى ارتىپ كەلەدى. ونىڭ مىسالى، رەسپۋبليكانىڭ بارلىق وڭىرلەرىندەگى ارنايى مەملەكەتتىك تۇرعىن ءۇي باعدارلامالارىنداعى ورىن سانىنىڭ جىل سايىن ارتۋى. بۇل ساياساتتىڭ باستى ماقساتى – ءاربىر ازاماتتىڭ ءوز باسپاناسىنا يە بولىپ، ەل يگىلىگىنە ۇلەس قوساتىن بەلسەندى ازاماتقا اينالۋىنا جاعداي جاساۋ. تۇراقتى تۇرعىن ۇيمەن قامتاماسىز ەتۋ – مەملەكەت پەن قوعامنىڭ ءوزارا سەنىمىن نىعايتاتىن، ءومىر ساپاسىن جاقسارتاتىن ەڭ ماڭىزدى شەشىمدەردىڭ ءبىرى.

Abai.kz