قازاقستاندا 15 ميلليون ادامنىڭ جەكە دەرەگى داركنەتتە ساتىلىمعا شىعارىلعانى تۋرالى اقپارات تارادى. حاكەردىڭ مالىمدەۋىنشە، كولەمى 2,7 گب بولاتىن بازا مەملەكەتتىك eGov جۇيەسىن بۇزۋ ارقىلى الىنعان. بۇل تۋرالى Stan.kz اقپارات اگەنتتىگى حابارلايدى. 

Mash Telegram ارناسىنىڭ مالىمەتىنشە, shymzz13 لاقاپ اتىنداعى قولدانۋشى فايلدى 0,5 بيتكوينگە، ياعني شامامەن 32 مىڭ دوللارعا باعالاعان. كولەمى 2,7 گب بولاتىن بازادا 47 ميلليون جول اقپارات بار. ونىڭ ىشىندە تولقۇجات دەرەكتەرى، تەلەفون نومىرلەرى، ەلەكتروندى پوشتا مەكەنجايلارى، جۇمىس ورىندارى، قۇجاتتاردىڭ سكان-كوشىرمەلەرى جانە قۇپياسوزدەر قامتىلعانى ايتىلعان.

ەگەر اقپارات راستالسا، وندا ەل حالقىنىڭ تورتتەن ۇشىنە جۋىق ازاماتىنىڭ جەكە دەرەكتەرى تەلەفون نومىرىنەن باستاپ قۇجاتتارى مەن قۇپياسوزدەرىنە دەيىن الاياقتاردىڭ قولىنا ءتۇسۋى مۇمكىن.

جاساندى ينتەللەكت جانە تسيفرلىق دامۋ مينيسترلىگى بۇل اقپاراتقا بايلانىستى پىكىر ءبىلدىردى. ۆەدومستۆو بۇل اقپاراتتاردىڭ eGov جۇيەسىنەن الىنعانىنا دالەل جوق ەكەنىن العا تارتتى.

“ونىڭ ىشىندە ۇسىنىلعان دەرەكتەر ۇلگىلەرىن تالداۋ جانە ولاردىڭ ىقتيمال شىعۋ كوزىن انىقتاۋ جۇمىستارى جۇرگىزىلىپ جاتىر. قازىرگى تاڭدا ەلەكتروندىق ۇكىمەتتىڭ اقپاراتتىق جۇيەلەرىنىڭ بۇزىلعانى جانە اتالعان دەرەكتەر بازاسىنىڭ تىكەلەي eGov جۇيەسىنەن الىنعانى تۋرالى راستالعان اقپارات جوق. سونىمەن قاتار جاريالانىمداردا كورسەتىلگەن اقپاراتتىڭ ءبىر بولىگى ەلەكتروندىق ۇكىمەت دەرەكتەرىنىڭ قۇرىلىمى مەن فورماتىنا سايكەس كەلمەيتىنىن اتاپ وتەمىز. اتاپ ايتقاندا، eGov جۇيەسىندە جاريالانىمداردا كورسەتىلگەن فورماتتاعى پاسپورتتاردىڭ سكان-كوشىرمەلەرى ساقتالمايدى. ال تسيفرلىق قۇجاتتاردىڭ فورماتى وزگەشە. داركنەت پايدالانۋشىسىنىڭ دەرەكتەر بازاسىنىڭ شىعۋ تەگىنە قاتىستى مالىمدەمەسى eGov جۇيەسىنىڭ بۇزىلعانىن راستايتىن دالەل بولا المايدى”، – دەدى مينيسترلىك.

ۆەدومستۆو تەحنيكالىق تەكسەرۋ ءالى دە جالعاسىپ، ونىڭ قورىتىندىسى بويىنشا قوسىمشا اقپارات بەرىلەتىنىن العا تارتتى.

“مينيسترلىك ازاماتتارعا تسيفرلىق قاۋىپسىزدىكتىڭ نەگىزگى تالاپتارىن ساقتاۋدى ۇسىنادى: SMS-كودتاردى، پارولدەر مەن ەتسق دەرەكتەرىن ءۇشىنشى تۇلعالارعا بەرمەۋ، كۇماندى سىلتەمەلەرگە وتپەۋ جانە ءارتۇرلى سەرۆيستەر ءۇشىن ءتۇرلى پارولدەردى پايدالانۋ”، – دەلىنگەن حابارلامادا.

ەسكە سالساق، eGov-قا قاتىستى ماسەلەلەر بۇعان دەيىن دە بولعان. تامىزدىڭ باسىندا سەرۆيس كەيبىر قولدانۋشىلارعا باسقا ادامداردىڭ جەكە پاراقشالارىن كورسەتىپ قويعان. ال كوكتەمدە قازاقستاندىق قارجىگەر eGov ارقىلى كومپانيانى تىركەگەننەن كەيىن بىرنەشە ساعاتتان سوڭ جارنامالىق قوڭىراۋلار الا باستاعان. كيبەرقاۋىپسىزدىك ماماندارى بۇل بازانى ۋكراينالىق كولل-ورتالىقتار ساتىپ الۋى مۇمكىن دەپ الاڭدايدى.

Abai.kz