ەلدىڭ وڭتۇستىك ايماقتارىندا قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىنباسارى گەنەرال-لەيتەنانت قانىش ابۋباكىروۆ باستاعان جۇمىس توبى اسكەري بولىمدەردىڭ جىلىتۋ ماۋسىمىنا دايىندىعىن، اسكەري نىسانداردىڭ جاعدايىن، سونىمەن بىرگە مەرزىمدى قىزمەتتەگى ساربازداردىڭ تۇرمىسى مەن الەۋمەتتىك قامتاماسىز ەتىلۋىن تەكسەردى.

جۇمىس توبى الماتى، سارىوزەك، جاركەنت، تالدىقورعان، ۇشتوبە، تاراز جانە شىمكەنت گارنيزوندارىنداعى اسكەري بولىمدەر مەن مەكەمەلەردە بولدى. اسكەري بولىمدەردىڭ كومانديرلەرى مەن ولاردىڭ تىل جونىندەگى ورىنباسارلارىنىڭ ەسەپتەرىن تىڭداعان سوڭ گەنەرال-لەيتەنانت قانىش ابۋباكىروۆ شەشىم قابىلداۋدى قاجەت ەتەتىن بىرقاتار ماسەلەلەرگە نازار اۋداردى.

ساپار بارىسىندا تىلدىق جانە تۇرعىن ءۇيدى پايدالانۋدى قامتاماسىز ەتۋ ماسەلەلەرى قارالدى. ماماندار قويمالارداعى ماتەريالدىق قۇرالداردىڭ ساقتالۋ جاعدايىن جانە نىسانداردىڭ ءورت قاۋىپسىزدىگىن تەكسەردى. بۇدان باسقا، ءبولىم باسشىلارىنا قارجىنى باسقارۋدىڭ اقپاراتتىق جۇيەسىن قولدانۋ، ماتەريالدىق قۇندىلىقتاردى ەسەپكە الۋ جانە ازىق-تۇلىك قىزمەتىن ۇيىمداستىرۋ باعىتىندا تاجىريبەلىك كومەك كورسەتىلدى.

گەنەرال-لەيتەنانت قانىش ابۋباكىروۆ مەرزىمدى قىزمەت ساربازدارىنىڭ تۇرمىسى مەن تاماقتانۋىنا، قاجەتتى مۇلىكپەن قامتاماسىز ەتىلۋىنە ەرەكشە نازار اۋداردى. گۆاردەيسك گارنيزونىندا ءمينيستردىڭ ورىنباسارى 2-ءشى اۋىر گاۋبيتسالىق ارتيللەريالىق ديۆيزيوننىڭ مەرزىمدى قىزمەت ساربازدارى ەربولات ايدىناسقاردى، ابدۋللا حاكيموۆ پەن بەكاسىل شالقاروۆتى اسكەري ءبولىمدى اباتتاندىرۋعا قوسقان ۇلەستەرى مەن بەلسەندىلىگى ءۇشىن قىسقا مەرزىمدى دەمالىسپەن ماراپاتتادى.

سونىمەن قاتار، جۇمىس بارىسىندا اسكەري گوسپيتالدەر، لازارەتتەر مەن مەديتسينالىق پۋنكتتەردىڭ باسشىلارى مەكەمەلەردىڭ قۇرال-جابدىقتارمەن، مەديتسينالىق تەحنيكامەن جانە ءدارى-دارمەكپەن قامتاماسىز ەتىلۋى جايىندا باياندادى. گەنەرال-لەيتەنانت ق. ابۋباكىروۆ اسكەري ەمدەۋ مەكەمەلەرىنە مەديتسينالىق اقپاراتتىق جۇيەنىڭ ەنگىزىلۋىن وڭ باعالادى. قۇجات اينالىمىنىڭ اۆتوماتتاندىرىلۋى، ەلەكتروندىق مەديتسينالىق كارتالار مەن زەرتتەۋ ناتيجەلەرىن ساقتاۋ پروتسەستەردى جەڭىلدەتىپ، اسكەري قىزمەتشىلەرگە كورسەتىلەتىن مەديتسينالىق كومەكتىڭ ساپاسى مەن جەدەلدىگىن ارتتىرادى.

ءار گارنيزوندا بولعان كەزىندە ءمينيستردىڭ ورىنباسارى جاڭا جىلىتۋ ماۋسىمىنا دايىندىقتى ساپالى ۇيىمداستىرۋ، عيماراتتار مەن ينجەنەرلىك جۇيەلەردى جوندەۋ، كوممۋنالدىق نىسانداردى رەتكە كەلتىرۋ جونىندە ناقتى تاپسىرمالار بەردى. وعان قوسا اسكەري نىسانداردا جۇرگىزىلىپ جاتقان كۇردەلى جانە اعىمداعى جوندەۋ، مودۋلدىك عيماراتتاردىڭ قۇرىلىسى بويىنشا جۇمىستاردىڭ مەرزىمىن قاتاڭ ساقتاۋ قاجەتتىگىن اتاپ ءوتتى.

تەكسەرۋ قورىتىندىسى بويىنشا گەنەرال-لەيتەنانت قانىش ابۋباكىروۆ ساربازداردى ازىق-تۇلىكپەن، كيىم-كەشەكپەن، بىلىكتى مەديتسينالىق كومەكپەن قامتاماسىز ەتۋ جانە دەمالىس پەن ۇيقىعا قولايلى جاعداي جاساۋ ماسەلەلەرى باسشىلىقتىڭ ەرەكشە باقىلاۋىندا ەكەنىن العا تارتتى.

Abai.kz