وبلىس ورتالىعى – قوناەۆ قالاسىندا مەملەكەتتىك تۋدى كوتەرۋ ءراسىمى جانە سالتاناتتى جيىن ۇيىمداستىرىلدى. كەشكىسىن مەرەكەلىك كونتسەرت كورسەتىلىپ، شارا تاڭعاجايىپ دروندار شوۋىنىڭ كورسەتىلىمىمەن تۇيىندەلىپ، ءوز مارەسىنە جەتتى.

رەسپۋبليكا كۇنى الماتى وبلىسىندا ادەتتەگى قالىپتاسقان ءداستۇر بويىنشا اۋقىمدى ءارى سالتاناتتى تۇردە اتالىپ ءوتتى. ءوڭىردىڭ بارلىق اۋدان، قالالارىندا مىڭداعان تۇرعىندى ەل رامىزدەرى استىندا بىرىكتىرگەن قازاقستاننىڭ تاۋەلسىزدىگى مەن بىرلىگىنىڭ نىشانى بولىپ تابىلاتىن مەملەكەتتىك تۋدى كوتەرۋ راسىمدەرى وتكىزىلدى.

باستى مەرەكەلىك ءىس-شارا الماتى وبلىسىنىڭ ورتالىعى – قوناەۆ قالاسىندا ۇيىمداستىرىلدى. سالتاناتتى شارادا قۇرمەت قاراۋىلىنىڭ قاتىسۋىمەن، قازاقستاننىڭ حالىق ءارتىسى تالعات كۇزەمباەۆتىڭ ورىنداۋىندا قالا اسپانىندا قازاقستان رەسپۋبليكاسىنىڭ مەملەكەتتىك ءانۇرانى اۋەلەي شىرقالدى. ءدال وسى ساتتە ورتالىق الاڭدا مەملەكەتتىك شتاندارت كوككە كوتەرىلدى.

سالتاناتتى ساتتەن سوڭ وتكىزىلگەن مەرەكەلىك جيىندا وبلىس اكىمى مارات سۇلتانعازيەۆ جينالعان قاۋىمدى رەسپۋبليكا كۇنىمەن قۇتتىقتادى.

«1990 جىلدىڭ 25 قازانىندا مەملەكەتتىك ەگەمەندىك تۋرالى دەكلاراتسيا قابىلداندى. ءدال وسى كۇننەن ەلىمىزدىڭ تاۋەلسىزدىككە اپارار جولى باستاۋ الدى. بۇل كۇن بارشا قازاقستاندىقتاردى بىرىكتىرىپ، ازاتتىق پەن مەملەكەتتىلىكتىڭ نىشانىنا اينالدى»، – دەدى ءوز سوزىندە ءوڭىر باسشىسى.

مارات سۇلتانعازيەۆ وبلىستىڭ الەۋمەتتىك-ەكونوميكالىق دامۋىنا جانە ەل يگىلىگىنە ۇلەس قوسقان وبلىس تۇرعىندارىنا مەملەكەتتىك ناگرادالاردى تابىس ەتتى. سونداي-اق، شارا بارىسىندا قازاقستان حالقى اسسامبلەياسىنىڭ ناگرادالارى دا ءوز يەلەرىنە تاپسىرىلدى.

سالتاناتتى ءراسىم كەزىندە «ەليتستروي» كومپانياسى قازاقستاننىڭ حالىق ءارتىسى، «اقجاۋىن» وركەسترىنىڭ كوركەمدىك جەتەكشىسى سەكەن تۇرىسبەككە پاتەر كىلتىن تابىستادى. اتالمىش سىي - ونەر يەسىنىڭ ۇلتتىق مادەنيەتتى دامىتۋعا قوسقان زور ەڭبەگىنىڭ جوعارى باعالانعاندىعىنىڭ بەلگىسى.

مەرەكەنىڭ شارىقتاۋ شەگى - ورتالىق الاڭدا وتكەن وتاندىق ەسترادا جۇلدىزدارىنىڭ قاتىسۋىمەن ۇيىمداستىرىلعان كونتسەرت بولدى. كونتسەرت سوڭىندا الماتى وبلىسىندا العاش رەت تاڭعاجايىپ مەرەكەلىك دروندار شوۋى حالىق نازارىنا ۇسىنىلدى. جۇزدەگەن درون قوناەۆ اسپانىنا كوتەرىلىپ، ءتۇرلى-ءتۇستى جارىقتارمەن قازاقستاننىڭ رامىزدەرى مەن مەرەكەلىك بەينەلەردى بەينەلەپ، كورەرمەندەر ءۇشىن مەرەكەلىك كەشتىڭ كوزايىم كورىنىسىنە اينالدى.

Abai.kz