الەۋمەتتىك جەلىدە قول-اياعىنا كىسەن سالىنىپ، ۆەتنامنىڭ كامران اۋەجايىندا قۇقىق قورعاۋ ورگاندارىنىڭ جەتەلەۋىندە بارا جاتقان بلوگەر قايسار حامزانىڭ (كامزا) فوتوسى تارادى.

بيىلعى جىلدىڭ باسىندا حالىقارالىق ىزدەۋگە جاريالانعان بلوگەردىڭ «ارزان شوۋى» مەن «شات-شادىمان ءومىرى» وسىلايشا استانا اۋەجايىنىڭ كونۆوي بولمەسىندە اياقتالدى.

بۇل كەيىپ — تەك ءبىر بلوگەردىڭ جەكە باسىنىڭ قاسىرەتى ەمەس، قازىرگى مەديا كەڭىستىكتەگى جاۋاپسىزدىق پەن جەڭىل جولمەن بايىعىسى كەلەتىن تەرىس تەندەنتسيانىڭ زاڭدى فينالى.

جەلىدەگى «باتپان قۇيرىق» پايدا مەن زاڭسىز قۇمار ويىن

قايسار حامزا ميلليونداعان اۋديتورياسى بار پاراقشالارىندا ارزان كونتەنت تاراتىپ قانا قويماي، زاڭسىز ونلاين-كازينولار مەن لۋدومانيانى ناسيحاتتادى دەگەن كۇدىككە ءىلىندى. جارنامالىق سىلتەمەلەر مەن جابىق Telegram-كانالدار («قورا ەنتەرتەينمەنت» جانە ت.ب.) ارقىلى مىڭداعان جاستى قۇمار ويىننىڭ شىرماۋىنا تارتتى.

سالدارى قانداي؟

• تاس-تالقانى شىققان تاعدىرلار: سانسىز وتباسىنىڭ ويرانى شىعىپ، قانشاما جاس قارىزعا باتتى.
• سويلەۋ مادەنيەتىنىڭ ۋلانۋى: «اۋزىنا كەلگەنىن ايتىپ»، بوقتىق ءسوزدى ترەندكە اينالدىرۋ ارقىلى جاستاردىڭ تالعامىن بۇزدى، ادەپتەن تىس ارەكەتتى كالىپتى قۇبىلىس سياقتى كورسەتتى.

ازارتتىق ويىندى جارنامالاپ تاپقان جۇزدەگەن مىڭ دوللار مەن كريپتو-اميانعا جينالعان قارجى بلوگەرگە ۋاقىتشا عانا «ەركىندىك» سىيلاعانىمەن، زاڭ الدىنداعى جاۋاپكەرشىلىكتەن قۇتقارا المادى.

اۋىزدان شىققان ءسوز بەن ءىستىڭ الشاقتىعى

شەتەلدە ءجۇرىپ، «مەنى ەشكىم ۇستاعان جوق، ءبارى باقىلاۋدا» دەپ، قوعامدى اداستىرماق بولعان ۆيدەولارى دا اقىرى ءوز ءمانىن جوعالتتى. ينتەرپول ارقىلى جۇرگىزىلگەن ارنايى وپەراتسيا مەن مەملەكەتتىك ورگانداردىڭ (افم، ءىىم، باس پروكۋراتۋرا) ۇيلەسىمدى جۇمىسى ناتيجەسىندە زاڭ بۇزۋشى ەلگە قايتارىلدى.

Abai.kz