.png)
گولان جوتالارىنان سالەم: قازاقستان بىتىمگەرلەرى نە دەيدى؟
ءتاۋ ەتەر تاۋەلسىزدىككە باستاۋ بولعان رەسپۋبليكا كۇنىندە بۇۇ ميسسياسى اياسىندا جۇرگەن قازاقستان بىتىمگەرلەرى ەلىمىزدى ەرەكشە قۇتتىقتادى.
«جەر شارىنىڭ قاي تۇكپىرىندە جۇرسەك تە، ەلىمىزدىڭ نامىسىن ابىرويمەن قورعاپ، كوك تۋىمىزدى اسقاقتاتا جەلبىرەتىپ ءجۇرۋ – قاسيەتتى پارىزىمىز»، - دەگەن قازاقستاننىڭ بىتىمگەرلىك ميسسياسى بۇگىندە گولان جوتالارىندا تاريحي ميسسيا اتقارۋدا.
«بىرىككەن ۇلتتار ۇيىمىنىڭ گولان جوتالارىندا قىزمەتىن اتقارىپ جاتقان «قازاقستان بىتىمگەرشىلىك كونتينگەنتى» جەكە قۇرامى ەلىمىزدى رەسپۋبليكا كۇنىمەن شىن جۇرەكتەن قۇتتىقتايمىز.
بۇل مەرەكە – ءبىزدىڭ تاۋەلسىزدىگىمىزدىڭ، بىرلىگىمىز بەن وتانعا دەگەن ماقتانىشىمىزدىڭ سيمۆولى. بۇل – قازاقستان حالقىنىڭ ىنتىماعى مەن ەل دامۋىنا دەگەن سەنىمىن بەينەلەيدى»، - دەيدى قزااقستان بىتىمگەرلەرى.
«ءبىز، قازاق بىتىمگەرشىلەرى – الىستاعى ەلدە بىرىككەن ۇلتتار ۇيىمىنىڭ تۋى استىندا ەلىمىزدىڭ اتىن ابىرويمەن تانىتىپ، بەيبىتشىلىكتى ساقتاۋ جولىندا قىزمەت ەتۋدەمىز. اسكەري قىزمەتشىلەرىمىز باقىلاۋ بەكەتتەرىندە تاۋلىك بويى قىزمەت اتقارىپ، جارىلعىش زاتتاردى جويۋمەن اينالىسۋدا. وزىنە جۇكتەلگەن جاۋاپكەرشىلىك ايماعىندا قاۋىپسىزدىك پەن تۇراقتىلىقتى قامتاماسىز ەتۋدە»، - دەيدى بۇۇ اياسىندا قىزمەت ەتىپ جۇرگەن قازاقستان اسكەريلەرى.
ولار بۇگىندە وزگە ەلدەردىڭ بىتىمگەرشىلەرىمەن ىنتىماقتاسا ارەكەت ەتۋدە. جانە وزدەرىنىڭ كاسىبي شەبەرلىگىن كورسەتىپ، ءتارتىپ پەن اسكەري انتقا ادالدىعىن الەمگە ايگىلەۋدە.
مەملەكەت باسشىسى قاسىم-جومارت توقاەۆ گولان جوتالارىنا العاشقى قازاقستان بىتىمگەرلىك ميسسياسىن اتتاندىرىپ تۇرىپ: «بىتىمگەر بولۋ دەگەن ءسوز – بەيبىتشىلىكتىڭ ەلشىسى بولۋ دەگەن ءسوز. بۇل – ۇلكەن ابىروي ءارى زور جاۋاپكەرشىلىك، ناعىز ەرجۇرەك جاۋىنگەرلەردىڭ قولىنان كەلەتىن ءىس. قازاقستان – بەيبىت ەل. ءبىز الەمدە تۇراقتىلىق ورناتۋدى كوزدەيتىن بارلىق باستامانى قولدايمىز»، - دەگەن بولاتىن.
Abai.kz
