بۇرىنعى باس پروكۋرور قايرات قوجامجاروۆقا قاتىستى قىلمىستىق ءىس جالعاسىپ جاتىر. بىراق ونىڭ قايدا ەكەنى ءالى بەلگىسىز. باس پروكۋروردىڭ ورىنباسارى عالىمجان قويگەلديەۆ ىسكە قاتىستى جۋرناليستەر سۇراعىنا ماردىمدى جاۋاپ بەرە المادى، دەپ حابارلايدى Ulysmedia.

سەنات كۋلۋارىندا عالىمجان قويگەلديەۆ جۋرناليستەردىڭ «قايرات قوجامجاروۆ رەسەي ازاماتتىعىن الدى ما؟» دەگەن سۇراعىنا ناقتى جاۋاپ بەرە المادى.

«سوتقا دەيىنگى تەرگەۋ ءجۇرىپ جاتىر. سونىڭ قورىتىندىسىن كۇتەيىك، بارلىعى انىق بولادى. ونىڭ قايدا ەكەنى تەرگەۋ بارىسىندا انىقتالادى»، – دەدى ول.

بيىل قىركۇيەكتە باس پروكۋراتۋرا قايرات قوجامجاروۆتىڭ ۇستىنەن قىلمىستىق ءىس قوزعالعانىن حابارلاعان.

«ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ بۇرىنعى توراعاسى ق.پ. قوجامجاروۆقا قاتىستى لاۋازىمدىق وكىلەتتىكتەرىن اسىرا پايدالانۋ، سونداي-اق ول باسشىلىق لاۋازىمداردا بولعان ءارتۇرلى كەزەڭدەردە قىلمىستىق جولمەن الىنعان اقشانى زاڭداستىرۋ فاكتىلەرى بويىنشا سوتقا دەيىنگى تەرگەپ-تەكسەرۋ باستالدى»، – دەپ مالىمدەگىن باس پروكۋراتۋرا سول ۋاقىتتا.

60 جاستاعى قايرات قوجامجاروۆ نازارباەۆ تۇسىنداعى ىقپالدى كۇشتىك قۇرىلىم وكىلدەرىنىڭ ءبىرى بولعان. ءبىرىنشى پرەزيدەنت نۇرسۇلتان نازارباەۆ 2019 جىلى وتستاۆكاعا كەتكەن كۇنى قوجامجاروۆ سەنات دەپۋتاتىنا اينالعان. وعان دەيىن ەكى جىل باس پروكۋرور قىزمەتىن اتقاردى. جەمقورلىققا قارسى ءتۇرلى قۇرىلىمدارعا جەتەكشىلىك ەتتى. پرەزيدەنتتىڭ كەڭەسشىسى، قاۋىپسىزدىك كەڭەسىنىڭ حاتشىسى بولعان. اقمولا وبلىسىن باسقارعان.

باق-تا قايرات قوجامجاروۆتىڭ قازىر رەسەي استاناسى ماسكەۋدە تۇرىپ جاتقانى ايتىلادى. جاقىندا ونىڭ رەسەي ازاماتتىعىن العانى تۋرالى دا اقپارات تاراعان. قوجامجاروۆ رەسەي قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆتىڭ كۋرستاسى دەگەن دە اقپارات بار.

Abai.kz