«زاڭ مەن ءتارتىپ» تۇجىرىمداماسى اياسىندا حالىقتىڭ قۇقىقتىق ساۋاتتىلىعىن ارتتىرۋ جانە ازاماتتارعا تەگىن زاڭ كومەگىن كورسەتۋ ماقساتىندا شىمكەنت قالاسىندا اۋقىمدى «حالىق زاڭگەرى» رەسپۋبليكالىق اكتسياسى ءوتتى.

ءىس-شاراعا بارلىق سالالىق ۆەدومستۆولاردىڭ ءبىرىنشى باسشىلارى, ادۆوكاتتار, تاجىريبەلى زاڭگەرلەر, سونداي-اق جوعارى وقۋ ورىندارىنىڭ ستۋدەنتتەرى قاتىستى.

اكتسيا قالا تۇرعىندارىنىڭ ۇلكەن قىزىعۋشىلىعىن تۋدىردى — شارا بارىسىندا 1000-نان استام ازامات وتباسىلىق، ەڭبەك، جەر، ازاماتتىق جانە اكىمشىلىك زاڭناما سالالارى بويىنشا بىلىكتى زاڭگەرلىك كەڭەس الدى.

ازاماتتارعا ءوز قۇقىقتارىن قورعاۋ تەتىكتەرى، مەملەكەتتىك ورگاندارعا جۇگىنۋ ءتارتىبى جانە تەگىن زاڭ كومەگىن الۋ مۇمكىندىكتەرى ەگجەي-تەگجەيلى ءتۇسىندىرىلدى.

شىمكەنت قالاسىنىڭ پروكۋرورى عابيت مۇقانوۆ ءوز سوزىندە اتاپ ءوتتى:

«ەجەلگى گرەك فيلوسوفى پلاتون ايتقانداي: «كۇشتى مەملەكەت – قورعالعان ازاماتتان باستالادى!». سوندىقتان بۇگىن وسىندا بارلىق مەملەكەتتىك جانە قۇقىق قورعاۋ ورگاندارىنىڭ وكىلدەرى ءار ازاماتقا تەگىن ءارى قولجەتىمدى زاڭ كومەگىن كورسەتۋ ءۇشىن ءبىر الاڭدا جينالىپ وتىر», – دەدى ول.

«حالىق زاڭگەرى» اكتسياسى – حالىقتىڭ قۇقىقتىق مادەنيەتىن ارتتىرۋعا، ازاماتتاردىڭ زاڭ سالاسىنداعى ساۋاتتىلىعىن كۇشەيتۋگە جانە الەۋمەتتىك ادىلدىكتى قامتاماسىز ەتۋگە باعىتتالعان جىل سايىنعى رەسپۋبليكالىق باستاما.

شارا بارىسىندا تۇرعىندارعا پراكتيكالىق كەڭەستەر بەرىلىپ، قۇقىقتىق كومەك كورسەتۋ بويىنشا ناقتى تەتىكتەر ۇسىنىلدى.

«حالىق زاڭگەرى» اكتسياسى ءوز جۇمىسىن جالعاستىرىپ, ءاربىر ازاماتقا كاسىبي كومەك پەن ءوز قۇقىقتارىن قورعاۋ مۇمكىندىگىن ۇسىناتىن بولادى.

Abai.kz