پرەزيدەنت قاسىم-جومارت توقاەۆ ورتالىق ازيا جانە ازەربايجان مەملەكەتتەرى باسشىلارىنىڭ بەيرەسمي كونسۋلتاتيۆتىك كەزدەسۋىنە قاتىستى.

مەملەكەت باسشىسى جيىندا سويلەگەن سوزىندە داستۇرگە ساي ايرىقشا ىقىلاسپەن قارسى العانى جانە بەيرەسمي كەزدەسۋدى وتكىزۋ تۋرالى باستاما كوتەرگەنى ءۇشىن قىرعىز رەسپۋبليكاسىنىڭ پرەزيدەنتى سادىر جاپاروۆقا شىنايى ريزاشىلىعىن ءبىلدىردى.

– قىرعىز حالقى – قازاق حالقى ءۇشىن باۋىرلاس ەل. ءبىز ءبارىمىز – ءبىر تۋعان اعايىن حالىقپىز. ءبىزدىڭ ارامىزدا قالىپتاسقان دوستىق، سەنىم، تۋىسقاندىق جانە ءوزارا قولداۋ – اتا-بابامىزدان وسيەت بولىپ قالعان قاسيەتتى امانات ءارى ماڭگى قۇندىلىق. قازىرگى تاڭدا ءبىز قىرعىزستاننىڭ قارقىندى دامۋىنا كۋا بولىپ وتىرمىز. سىزدەر قول جەتكىزىپ جاتقان ءار جەتىستىككە شىن جۇرەكتەن قۋانامىز. قىرعىز ەلىنىڭ ءوسىپ-وركەندەۋى – ورتالىق ازيانىڭ تۇراقتىلىعى مەن باياندى دامۋىنىڭ ماڭىزدى كەپىلى. بۇل قۇرمەتتى پرەزيدەنت سادىر نۇرعوجاۇلى جاپاروۆتىڭ تاباندى ەڭبەگى مەن كورەگەن باسشىلىعىنىڭ ارقاسى ەكەنى ءسوزسىز، – دەدى قازاقستان پرەزيدەنتى.

قاسىم-جومارت توقاەۆ بۇگىنگى كەزدەسۋ قازىرگى كۇن تارتىبىندەگى وزەكتى ماسەلەلەردى تالقىلاۋعا، سان قىرلى سەرىكتەستىكتىڭ الداعى باسىمدىقتارىن ايقىنداۋعا مول مۇمكىندىك بەرەتىنىنە توقتالدى.

– بارلىق دەڭگەيدەگى بايلانىستىڭ جاندانۋى باۋىرلاس حالىقتارىمىزدىڭ يگىلىگى مەن تۇتاس ايماقتىڭ وركەندەۋى جولىندا مەملەكەتتەرىمىزدىڭ جاسامپاز ىقپالداستىققا ورتاق ۇمتىلىسىن ايقىن كورسەتەدى. بۇل ورايدا «ءححى عاسىردا ورتالىق ازيانى دامىتۋ ماقساتىنداعى دوستىق، تاتۋ كورشىلىك جانە ىنتىماقتاستىق تۋرالى شارتقا» قول قويۋ راسىمدەرىنىڭ اياقتالۋى ايتۋلى جەتىستىك بولدى. اتالعان تاريحي قۇجات ستراتەگيالىق سەرىكتەستىگىمىزدەگى جاڭا كەزەڭنىڭ باستالعانىن ايشىقتايدى. ءوزارا سەنىمگە، قۇرمەتكە جانە باۋىرلاس حالىقتارىمىزدىڭ بولاشاعىنا دەگەن ورتاق جاۋاپكەرشىلىككە نەگىزدەلگەن وڭىرلىك ىنتىماقتاستىقتىڭ «ساياسي ارقاۋىن» قالىپتاستىرادى، – دەدى قازاقستان پرەزيدەنتى.

مەملەكەت باسشىسى وسى ماڭىزدى شارتقا قوسىلعانى ءۇشىن تۇرىكمەنستان پرەزيدەنتى سەردار بەردىمۇحامەدوۆكە العىس ايتتى.

– كەلەسى كەزەڭ اتالعان قۇجات ەرەجەلەرىن ناقتى ىسكە اسىرۋ بولۋعا ءتيىس دەپ سانايمىن. وسىعان بايلانىستى دوستىق پەن تاتۋ كورشىلىكتى ودان ءارى نىعايتۋعا، ساۋدا-ەكونوميكالىق، مادەني-گۋمانيتارلىق قارىم-قاتىناستى بەكەمدەۋگە باعىتتالعان ۇزاقمەرزىمدى ءوزارا ىقپالداستىعىمىزدىڭ انىق باعدارلارى كورسەتىلگەن ءىس-شارالار جوسپارىن ازىرلەۋدى جانە قابىلداۋدى ۇسىنامىن. ءوزارا سەنىمنىڭ نىعايۋى مەن وڭىرلىك ىنتىماقتاستىقتىڭ قارقىندى دامۋىنىڭ ارقاسىندا ورتالىق ازيا جاڭا تاريحىنداعى اسا تابىستى كەزەڭدى باستان وتكەرىپ جاتىر دەپ نىق سەنىممەن ايتۋعا بولادى، – دەدى قاسىم-جومارت توقاەۆ.

پرەزيدەنت ازەربايجاننىڭ كونسۋلتاتيۆتى كەزدەسۋلەردىڭ تولىق مۇشەسى بولۋى بۇل فورماتتى نىعايتۋداعى وڭ ەۆوليۋتسيانىڭ جاڭا دەڭگەيىن كورسەتەتىنىن مالىمدەدى.

– بىرلەسكەن كۇش-جىگەرىمىز ارقىلى ساياسي ديالوگتى ودان ءارى تەرەڭدەتۋگە، ينۆەستيتسيا، ەنەرگەتيكا، ونەركاسىپ سالالارىنداعى قارىم-قاتىناستى جانداندىرۋعا، بىرىڭعاي كولىك-لوگيستيكا جۇيەسىن قالىپتاستىرۋعا قولايلى جاعداي جاسالۋدا. سوڭعى جىلدارى وڭىرىشىلىك ساۋدا ۇدايى ءوسىپ، ىسكەرلىك بايلانىس كەڭەيە ءتۇستى. بىرلەسكەن كاسىپورىندار قۇرىلىپ، ورتاق ينۆەستيتسيالىق جوبالار ىسكە اسىرىلۋدا. سونىمەن قاتار گۋمانيتارلىق قارىم-قاتىناس جاندانا ءتۇستى. مادەنيەت، ءبىلىم سالالارىنداعى، جاستار اراسىنداعى ىقپالداستىقتىڭ مازمۇنى بايىپ كەلەدى. وسى وڭ ناتيجەلەردىڭ بارلىعى باۋىرلاس حالىقتارىمىزدى ودان ءارى جاقىنداتۋعا، جانە ايماقتىڭ بەدەلىن نىعايتۋعا ىقپال ەتەدى، – دەدى مەملەكەت باسشىسى.

قاسىم-جومارت توقاەۆ جاھاندىق ۇدەرىستەردە ورتالىق ازيانىڭ ءرولى سەنىمدى تۇردە ارتىپ، الەمدىك ارەناداعى ايماقتىڭ ءۇنى ايقىن ءارى سالماقتىراق شىعا باستادى دەپ سانايدى.

– بۇعان قىرعىزستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە سايلانۋى (2027-2028 جىلدارعا) جارقىن مىسال بولا الادى. ورايلى ءساتتى پايدالانا وتىرىپ قىرعىز پرەزيدەنتى قۇرمەتتى سادىر نۇرعوجاۇلى جاپاروۆتى جانە بارشا قىرعىز حالقىن وسى تاريحي جەتىستىكپەن قۇتتىقتايمىن، – دەدى پرەزيدەنت.

مەملەكەت باسشىسى ىقپالداستىقتىڭ بارلىق نەگىزگى ماسەلەسى بىلتىر تاشكەنتتە وتكەن كەزدەسۋدە ەگجەي-تەگجەيلى تالقىلانعانىن اتاپ ءوتتى.

– سول كەزدە ايتىلعان باستامالار، سونىڭ ىشىندە كونسۋلتاتيۆتىك كەزدەسۋلەردى ينستيتۋتسيونالدىق تۇرعىدان دامىتۋ ماسەلەسى ءالى دە وزەكتى جانە ونى ىسكە اسىرۋ ماقساتىندا بىرلەسە جۇمىس ىستەۋىمىز قاجەت. قازاقستان قول جەتكىزگەن كەلىسىمدەرگە ىنتالى، ەلدەرىمىز اراسىنداعى دوستىق، تاتۋ كورشىلىك جانە ستراتەگيالىق سەرىكتەستىكتى نىعايتۋعا باعىتتالعان جاسامپاز باستامالاردى ودان ءارى ىلگەرىلەتۋدى كوزدەيدى. بىرلەسكەن كۇش-جىگەر ارقىلى ورتاق پروگرەسس جولىندا بۇدان دا بيىك بەلەستەردى باعىندىراتىنىمىزعا سەنىمدىمىن. ءسوز سوڭىندا تۇرىكمەن دوس-باۋىرلارىمىزعا كونسۋلتاتيۆتىك كەزدەسۋلەر فورماتىنداعى الداعى ءىس-شارالاردى وتكىزۋدە تابىس تىلەيمىن، – دەدى قاسىم-جومارت توقاەۆ.

جيىندا قىرعىزستان پرەزيدەنتى سادىر جاپاروۆ، ازەربايجان پرەزيدەنتى يلحام اليەۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيوەۆ ءسوز سويلەدى.

ورتالىق ازيا جانە ازەربايجان مەملەكەتتەرى باسشىلارىنىڭ بەيرەسمي كونسۋلتاتيۆتىك كەزدەسۋىنىڭ قورىتىندىسى بويىنشا شولپان-اتا دەكلاراتسياسى قابىلداندى.

Abai.kz