قازاقستاندىق فۋتبول كلۋبتارىن 2-3 جىلدا تولىق جەكەمەنشىككە وتكىزۋ كەرەك. بيىل 4 كلۋب جەكە ينۆەستورعا ساتىلادى. بۇل جايىندا قازاقستان فۋتبول فەدەراتسياسى كاسىبي جارىستاردى ۇيىمداستىرۋ ديرەكتسياسىنىڭ باسشىسى باقىتجان پازىلحايىر «ءتۇيىن» اقپاراتتىق-ساراپتامالىق باعدارلاماسىنا بەرگەن سۇحباتىندا ايتتى.

- وسى جىلدىڭ وزىندە 4 فۋتبول كلۋبى جەكە ينۆەستورلاردىڭ قاراماعىنا كەتىپ جاتىر. كۇنى كەشە عانا قىزىلوردانىڭ «قايسار» فۋتبول كلۋبى جەكە كاسىپكەرگە بەرىلدى. ول ينۆەستور 2 جىلدا 12 ملرد تەڭگەگە جاڭا اكادەميا قۇرۋ جايىندا جۇكتەمە الدى. ياعني فۋتبولدىڭ نەگىزى – بالالار فۋتبولىنا جانە باپكەرلەردى دايىنداۋعا ەرەكشە نازار اۋدارىلادى. ۋاقىت وتە بارلىق ءوڭىر وسى جولمەن ءجۇرىپ وتەدى. مەنىڭ ويىمشا 2-3 جىلدا كوماندالاردى تولىقتاي جەكەمەنشىككە وتكىزۋ كەرەك. ينۆەستورلاردىڭ كلۋبتى الۋىنا بارلىق جاعداي جاسالعان، - دەدى ول.

قازاقستاندا 32 كاسىبي فۋتبول كلۋبى بار. ونىڭ 35%-ى جەكەمەنشىك كلۋب. جەكەشەلەندىرۋ ارقىلى كلۋبتاعى باسقارۋ جۇيەسى وزگەرەدى. كلۋبقا كەلگەن ينۆەستور بىرىنشىدەن ناتيجەنى جانە تابىس تابۋدى العا قويادى. وسى نەگىزدە فۋتبول كلۋبتارىنداعى بارلىق جۇيە وزگەرەدى.

قفف 2025-2030 جىلدارعا ارنالعان 11 باعىتتان تۇراتىن ستراتەگيالىق جوسپارىن ازىرلەگەن. الداعى ماقسات -   2030 جىلعى الەم چەمپيوناتىنىڭ ىرىكتەۋ كەزەڭىنەن ءوتۋ. بىلتىر قفف ەل اۋماعىنداعى جارىستاردى ۇيىمداستىرۋ قۇقىعىن قايتا الدى. «قايرات» فك كەلەر جىلى ەۋروپا چەمپيوندار ليگاسىندا ونەر كورسەتەدى.

Abai.kz