الەمدە جۋرناليستەر ءولىمىنىڭ 90 پايىزى اشىلماعان كۇيى قالىپ وتىر. ال گازا جۋرناليستەر ءۇشىن تاريحتاعى اسكەري قاقتىعىستار اراسىندا ەڭ قاۋىپتىسى بولىپ وتىر.

بۇل تۋرالى تىلشىلەرگە بۇۇ باس حاتشىسىنىڭ رەسمي وكىلى ستەفان ديۋجارريك اپتالىق بريفينگ بارىسىندا ءمالىم ەتتى، دەپ حابارلايدى بەلتا.

2 قاراشادا جۋرناليستەرگە قارسى قىلمىستار ءۇشىن جازاسىزدىقتى توقتاتۋدىڭ حالىقارالىق كۇنى اتالىپ وتۋىنە بايلانىستى ديۋجارريك الەم بويىنشا باق وكىلدەرى بەتپە-بەت كەلىپ جاتاتىن جەرلەر، اسىرەسە گازاداعى قاۋىپتەر تۋرالى ەسكەرتتى.

- جۋرناليستەر ولىمىمەن بايلانىستى 10 قىلمىستىڭ 9-ى اشىلماي قالىپ جاتادى. گازا بارلىق قاقتىعىس ايماقتارىنىڭ ىشىندە جۋرناليستەر ءۇشىن ەڭ قاۋىپتىسى بولىپ قالىپ وتىر، - دەدى ول.

ديۋجارريك بۇۇ باس حاتشىسى انتونيۋ گۋتەرريشتىڭ جازالانباۋ ءباسپاسوز بوستاندىعى مەن دەموكراتيانىڭ وزىنە كەلتىرىلگەن زالال ەكەنىن ايتىپ، جۋرناليستەردىڭ ولىمىنە قاتىستى تەرگەۋدى تاۋەلسىز ءارى ءادىل جۇرگىزۋگە شاقىرعانىن جەتكىزدى.

-تىلشىلەر ءۇنسىز قالعان جەردە ءبارىمىزدىڭ داۋسىمىز شىقپايدى،-دەدى ول.

يزرايلگە گازاعا جاساعان ەكى جىلدىق شابۋىلدارى بارىسىندا 250 جۋرناليست ءولتىرىلدى دەگەن ايىپ تاعىلىپ وتىر. ولاردىڭ كوپشىلىگىنە وزدەرىنىڭ كاسىبي مىندەتتەرىن اتقارۋ بارىسىندا ادەيى قاستاندىق جاسالعان.

ايتا كەتەيىك، تۇركيا پرەزيدەنتى رەجەپ تايىپ ەردوعان ىستانبۇلدا 31 قازان كۇنى وتكەن TRT World حالىقارالىق فورۋمىندا سويلەگەن سوزىندە بۇقارالىق اقپارات قۇرالىنىڭ 270 قىزمەتكەرى ءومىرىن قاۋىپگە تىگە وتىرىپ، الەمگە وندا نە بولىپ جاتقانىن وقيعا ورنىنان كورسەتۋگە تىرىسقانىن ايتتى.

دەرەككوزى: inform.kz

Abai.kz