قازاقستاننىڭ عىلىم جانە جوعارى ءبىلىم مينيسترلىگى ءبىلىم مەن تالانتتى دامىتۋ سالاسىنداعى حالىقارالىق ۇيىم – ETS (Educational Testing Service) كومپانياسىمەن ىنتىماقتاستىق ورناتقانىن حابارلادى. بۇل قادام ۇلتتىق بىرىڭعاي تەستىلەۋ (ۇبت) جۇيەسىن تۇبەگەيلى جاڭعىرتۋعا باعىتتالعان، دەپ حابارلايدى Ulysmedia.kz.

مينيسترلىكتىڭ مالىمەتىنشە، الداعى ۋاقىتتا ۇبت فورماتى وزگەرەدى. ەندى تەستىلەۋ تەك اكادەميالىق ءبىلىمدى عانا ەمەس، سونىمەن بىرگە ومىرلىك ماڭىزدى داعدىلاردى دا باعالايتىن جۇيەگە اينالماق.

جاڭارتىلعان فورماتتىڭ باستى ماقساتى – بارلىق تالاپكەرلەرگە تەڭ مۇمكىندىك پەن ءادىل باعالاۋ جۇيەسىن قامتاماسىز ەتۋ. بۇل ءۇشىن تەست كومبيناتسيالارى يكەمدى، باعالاۋ جۇيەسى بىرىڭعاي، ال قولجەتىمدىلىك — ايماق، مەكتەپ نەمەسە وقىتۋ تىلىنە قاراماستان تەڭ بولماق.

جاساندى ينتەللەكت پەن جاڭا تەحنولوگيالار ەنگىزىلەدى

– جاساندى ينتەللەكت تەحنولوگيالارىن پايدالانۋ، سونىڭ ىشىندە بەيىمدەلمەلى تەستىلەۋ، اۆتوماتتاندىرىلعان باعالاۋ جانە ينتەللەكتۋالدى اناليتيكا ادىستەرى تەستىلەۋ پروتسەسىنىڭ ادىلدىگىن، سەنىمدىلىگىن جانە وبەكتيۆتىلىگىن ارتتىرادى. بارلىق تەست زاماناۋي پسيحومەتريالىق ادىستەرمەن دايىندالادى، بۇل ولاردىڭ عىلىمي نەگىزدىلىگىن، دالدىگىن جانە ستۋدەنتتەر، جوعارى وقۋ ورىندارى مەن جۇمىس بەرۋشىلەر تاراپىنان حالىقارالىق دەڭگەيدە مويىندالۋىن قامتاماسىز ەتەدى، – دەلىنگەن مينيسترلىك حابارلاماسىندا.

ETS – الەمدىك دەڭگەيدە TOEFL جانە GRE سياقتى تەستىلەردى ازىرلەيتىن جەتەكشى ۇيىم. قازاقستانمەن ارىپتەستىك اياسىندا ۇبت فورماتىنىڭ ساپاسى مەن سەنىمدىلىگىن حالىقارالىق ستاندارتتارعا سايكەستەندىرۋ كوزدەلگەن.

Abai.kz