قاراعاندى وبلىسى ەكونوميكالىق ءوسىمنىڭ تۇراقتى قارقىنىن ۇستاپ تۇر: بيىلعى 10 ايدىڭ قورىتىندىسى بويىنشا ينۆەستيتسيالار كولەمى 932,9 ميلليارد تەڭگەدەن استى، ال ونەركاسىپتىك ءوندىرىس كولەمى 4 تريلليون تەڭگەگە جەتتى.

ءوڭىردىڭ ەكونوميكالىق دامۋى مەن كاسىپكەرلىكتى قولداۋ شارالارى تۋرالى وبلىس اكىمى ەرماعانبەت بولەكپاەۆ پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە باياندادى.

– ءبىزدىڭ ءوڭىر تۇراقتى كورسەتكىشتەرىن ساقتاپ كەلەدى: بولات ءوندىرۋ كولەمى بويىنشا – ءبىرىنشى، كومىر ءوندىرۋ جانە كارتوپ ءوسىرۋ بويىنشا – ەكىنشى، جۇمىرتقا ءوندىرۋ بويىنشا – ءۇشىنشى، استىق جيناۋ بويىنشا – ءتورتىنشى ورىندامىز. ەل بويىنشا جۇمىسسىزدىق دەڭگەيى ەڭ تومەن وڭىرلەردىڭ ءبىرى – نەبارى 4 پايىز، – دەدى ايماق باسشىسى.

اكىم اتاپ وتكەندەي، ونەركاسىپ دامۋى، شاعىن جانە ورتا بيزنەستى قولداۋ، سونداي-اق ينۆەستيتسيا تارتۋ — ءوڭىر ەكونوميكاسىنىڭ باستى باسىمدىقتارى بولىپ قالا بەرەدى.

قاراعاندى وبلىسىندا يندۋستريالىق ايماقتار بەلسەندى دامىپ، شاعىن ونەركاسىپتىك الاڭدار قۇرىلىپ جاتىر.

اكىمنىڭ ايتۋىنشا، Qarmet كومپانياسى ءوندىرىستى جاڭعىرتۋعا 2028 جىلعا دەيىن 1,6 تريلليون تەڭگە ينۆەستيتسيا سالۋدى جوسپارلاپ وتىر. كاسىپورىن تابيعي گازعا كوشىپ، تسيفرلىق تەحنولوگيالاردى ەنگىزۋدە.

(سۋرەت:ۇيىمداستىرۋشىلاردان الىندى )

سونىمەن قاتار، وڭىردە جاڭا ءوندىرىس ورىندارى اشىلىپ، ماشينا جاساۋ، وڭدەۋ ونەركاسىبى جانە باسقا دا سالالاردا جوبالار جۇزەگە اسىرىلۋدا. مىسالى، ساران يندۋستريالىق ايماعىندا كەلەسى جىلى Howo, Sitrak جانە Shantui ماركالى جۇك جانە ارنايى تەحنيكا شىعارۋ جوسپارلانعان.

– شاعىن جانە ورتا بيزنەس سالاسىندا باستى نازار — ءوسۋ نۇكتەلەرىن قالىپتاستىرۋ مەن كاسىپكەرلىكتى قولداۋعا باعىتتالعان. ءبىزدىڭ وبلىس العاشقى بولىپ بولشەك سالىق مولشەرلەمەسىن 2%-عا دەيىن تومەندەتتى. سونىڭ ناتيجەسىندە سالىق تولەۋشىلەردىڭ سانى 30 ەسەگە ءوسىپ، بۇگىندە ءتورت مىڭنان استى. ال وسى جىلى ارنايى سالىق رەجيمى بويىنشا 5,6 ميلليارد تەڭگە بيۋدجەتكە ءتۇستى. جاڭا سالىق كودەكسى كۇشىنە ەنگەننەن كەيىن دە، ماسليحاتتارعا 2%-دىق مولشەرلەمەنى ساقتاپ قالۋ جونىندە ۇسىنىم بەرەتىن بولامىز، – دەدى ەرماعانبەت بولەكپاەۆ.

Abai.kz