قازاقستاندىق بوكستىڭ ءتىرى اڭىزى گەننادي گولوۆكين تۋعان ەلىندە قوشتاسۋ جەكپە-جەگىن وتكىزۋ مۇمكىندىگىن قاراستىرۋدا، دەپ حابارلايدى Prosports.kz.

بۇل تۋرالى «سپورت شرەدينگەرا» اقپاراتتىق پورتالى جازدى. 43 جاسقا تولعانىنا قاراماستان، GGG ءالى رەسمي تۇردە مانسابىن اياقتاعانىن جاريالاعان جوق.

Asia Boxing پرەزيدەنتى پيچاي چۋنحاۆادجيرامەن كەزدەسۋ بارىسىندا گولوۆكين تاعى ءبىر جەكپە-جەك تۋرالى ويلانىپ جۇرگەنىن، ءارى ونىڭ قازاقستاندا وتكەنىن قالايتىنىن ايتتى. اڭگىمە كەزىندە پيچاي گولوۆكيننىڭ World Boxing ۇيىمى پرەزيدەنتى قىزمەتىنە ۇمىتكەر بولۋعا نيەت بىلدىرگەنىن دە اتاپ ءوتتى.

«مۇنى ەستىگەنىمە قۋانىشتىمىن، ويتكەنى ءسىز — دۇرىس ادامسىز. بوكستى جەتىك بىلەسىز!»، — دەدى پيچاي چۋنحاۆادجيرا.

گولوۆكين وعان العىس ءبىلدىرىپ:

«ۇلكەن راقمەت! مەن بوكستى بىلەمىن. بوكس — مەنىڭ ءومىرىم. وسى جولدا كوپ ەڭبەك ەتكىم كەلەدى»، — دەپ جاۋاپ بەردى.

كەزدەسۋ سوڭىندا GGG جانكۇيەرلەرىنە تاعى ءبىر جەكپە-جەك بولۋى مۇمكىن ەكەنىن ايتتى:

«مۇمكىن، تاعى ءبىر جەكپە-جەك وتكىزگىم كەلەتىن شىعار»، — دەدى ول.

پيچاي ونىڭ بۇل ويىن قولداپ، ءازىل ارالاس:

«مەن دە، كوپتەگەن جانكۇيەر سياقتى، YouTube-تا GGG-ءدىڭ حايلايتتارىن قايتا-قايتا كورگەندى جاقسى كورەمىن»، — دەپ قوشتادى.

گەننادي گولوۆكين بۇعان دەيىن دە رينگكە ورالۋ تۋرالى اڭگىمە قوزعاعان بولاتىن. وسى جىلى انگليادا World Boxing اياسىندا وتكەن تاريحي الەم چەمپيوناتى كەزىندە جۋرناليستەرگە سۇحبات بەرگەن گولوۆكين: «ءيا، نەگە بولماسقا؟ مۇندا مەن ەسكى ەموتسيالارىمدى قايتا سەزىندىم»، – دەپ جاۋاپ بەردى.

Abai.kz