پارلامەنت شەتەل ازاماتتارىنىڭ قازاقستاندىق انالاردىڭ جاتىرىن جالداۋىنا بىردەن شەكتەۋ قوياتىن نورما ەنگىزۋى كەرەك!!!

قازاقستان رەسپۋبليكاسىنىڭ
مەملەكەتتiك كەڭەسشىسى
ە.ت. قارين مىرزانىڭ نازارىنا!

كەشە – ءبىرىنشى جەلتوقساندا «الماتى اۋەجايىندا قولىندا سۋرروگات انالاردان تۋعان سابيلەرى بار شەتەلدىكتەر قازاقستاننان كەتپەك بولعاندا ۇستالدى...» دەگەن سۇمدىق اقپارات تارادى.

اتالعان جاڭا تۋعان نارەستەنى قازاقستاننان اكەتپەك بولعانداردىڭ قىتاي ازاماتتارى ەكەنىن باق جارىسا جازۋدا.

بۇل اقپاراتتى الماتى قالاسى پوليتسيا دەپارتامەنتىنىڭ ءباسپاسوز قىزمەتى دە راستاپ، وسى فاكت بويىنشا الماتى قالاسى پوليتسيا دەپارتامەنتىنىڭ تەرگەۋ باسقارماسى قر قك-ءنىڭ 135-بابىنىڭ 1-بولىگى (كامەلەتكە تولماعانداردى ساتۋ) بويىنشا قىلمىستىق ءىس جۇرگىزىپ جاتقانىن مالىمدەپتى...

بۇل ەندى سۇمدىق وقيعا!

قولدانىستاعى زاڭدارعا ۇڭىلسەك، سۋرروگات انالارعا قاتىستى قۇقىقتىق ماسەلەلەر «نەكە (ەرلى-زايىپتىلىق) جانە وتباسى تۋرالى» قازاقستان رەسپۋبليكاسىنىڭ 2011 جىلعى 26 جەلتوقسانداعى №518-ءىV كودەكسىمەن رەتتەلەدى ەكەن.

اتالعان كودەكستە سۋرروگات انا بولۋ شارتى، سۋرروگات اناعا قويىلاتىن تالاپتار جانە سۋرروگات انا بولۋ شارتى تاراپتارىنىڭ قۇقىقتارى مەن مىندەتتەرى تاستاي ەتىپ بەكىتىلگەن.

بىراق، شەتەل ازاماتتارىنىڭ قازاقستاندىق سۋرروگات انالارعا تاپسىرىس بەرۋىنە شەكتەۋ قويىلماعان. ناقتىلاپ ايتساق، قازاقستاندا سۋرروگات انا قىزمەتىن پايدالانۋشىلاردىڭ قاي ەلدىڭ ازاماتى بولۋىن تەكتەيتىن نورما اتىمەن جوق!

بۇل دەگەنىڭىز – كەز كەلگەن شەتەلدىك قازاقستانعا كەلەدى دە، قازاق انانىڭ جاتىرىن جالعا الىپ، بالا تۋعىزىپ الا بەرەدى دەگەن ءسوز!

بۇگىنگى قازاقستاندىق سۋرروگات انالاردان تۋعان سابيلەردى قىتاي ازاماتتارىنىڭ شەتەل اسىرماق بولعانى تۋرالى بۇل وقيعا ءبىزدىڭ زاڭنامانىڭ – «نەكە (ەرلى-زايىپتىلىق) جانە وتباسى تۋرالى» كودەكستىڭ دە، «قازاقستان رەسپۋبليكاسىنىڭ ازاماتتىعى تۋرالى» قازاقستان رەسپۋبليكاسىنىڭ 1991 جىلعى 20 جەلتوقسانداعى № 1017-XII زاڭىنىڭ دا شيكىلىگىن كورسەتتى.

«نەكە (ەرلى-زايىپتىلىق) جانە وتباسى تۋرالى» كودەكستىڭ 59-بابىنا ساي، ەرلى-زايىپتىلار (تاپسىرىس بەرۋشىلەر) سۋرروگات انا بولۋ شارتى نەگىزىندە قوسالقى رەپرودۋكتيۆتىك ادىستەر مەن تەحنولوگيالاردى قولدانۋ ناتيجەسىندە تۋعان بالانىڭ اتا-انالارى بولىپ تانىلادى.

مۇنداي ادىستەر مەن تەحنولوگيالاردى قولدانۋ ناتيجەسىندە نە سۋرروگات انا بولۋ شارتىنا سايكەس ەكى جانە ودان دا كوپ بالا تۋعان جاعدايدا ەرلى-زايىپتىلار (تاپسىرىس بەرۋشىلەر) ءاربىر تۋعان بالا ءۇشىن تەڭ جاۋاپتىلىقتا بولادى.

سونداي-اق، سۋرروگات انا بولۋ شارتىن جاساسقان جۇباي (تاپسىرىس بەرۋشى) بالا تۋعاننان كەيىن تۋ تۋرالى مەديتسينالىق كۋالىكتە ونىڭ اناسى بولىپ جازىلادى.

دەمەك، سۋرروگات انا بولۋ شارتىن جاساسقان جۇبايلاردىڭ (تاپسىرىس بەرۋشىلەردىڭ) ەكەۋى دە قازاقستان رەسپۋبليكاسىنىڭ ازاماتتارى بولسا، وندا ولاردىڭ سۋرروگات انا بولۋ شارتى نەگىزىندە قوسالقى رەپرودۋكتيۆتىك ادىستەر مەن تەحنولوگيالاردى قولدانۋ ناتيجەسىندە تۋعان بالا اۆتوماتتى تۇردە قازاقستان ازاماتى بولارى انىق.

ال، «قازاقستاندا سۋرروگات انا قىزمەتىن پايدالانۋشى شەتەل ازاماتى بولسا، وندا ونىڭ سۋرروگات انا بولۋ شارتى نەگىزىندە قوسالقى رەپرودۋكتيۆتىك ادىستەر مەن تەحنولوگيالاردى قولدانۋ ناتيجەسىندە تۋعان «بالاسى» قاي ەلدىڭ ازاماتى بولادى؟!» دەگەن سۇراق تۋىندايدى.

بۇل – وتە ۇلكەن جانە اسا ماڭىزدى سۇراق!

سەبەبى، «قازاقستان رەسپۋبليكاسىنىڭ ازاماتتىعى تۋرالى» زاڭىندا ەرلى-زايىپتىلار (تاپسىرىس بەرۋشىلەر) سۋرروگات انا بولۋ شارتى نەگىزىندە قوسالقى رەپرودۋكتيۆتىك ادىستەر مەن تەحنولوگيالاردى قولدانۋ ناتيجەسىندە تۋعان بالانىڭ ازاماتتىعىن رەتتەيتىن نورما قاراستىرىلماعان...

ەندەشە، جەمقورلىققا بەلشەدەن ەمەس، كەڭىردەكتەن باتقان قازاقستان سىندى ەلدە مۇنداي بالالاردىڭ زاڭسىز جولمەن شەتەل اسىرىلۋى – تۇك تە قيىن ەمەس!

مىنە، بۇگىنگى وقيعا سونىڭ ايقىن دالەلى.

11 قاراشادا تۋىلعان وقيعا تۋرالى شىندىق، اراعا جيىرا كۇن سالىپ، بۇگىن – 1 جەلتوقساندا اشىققا شىعىپ وتىر.

ال، ادام ساۋداسى قىزىپ تۇرعان مىنا زاماندا، وسىعان دەيىن قازاقستاندىق سۋرروگات انادان تۋعان بالالاردى شەتەلدىك تاپسىرىس بەرۋشىلەر ءوز ەلىنە الىپ كەتپەدى دەپ ايتا الاسىز با؟!

ءوز باسىم ايتا المايمىن!

سوندا، بۇل كەلەڭسىزدىككە جول بەرىپ وتىرعان كىم؟!

ارينە، ءبىرىنشى كەزەكتە شەتەلدىك تاپسىرىس بەرۋشىلەرگە داڭعىل جول اشىپ بەرگەن قازاق پارلامەنتى!

ماقۇلبايلار سول باياعى ادەتپەن تيمۋر قۇلىباەۆ پەن كارىم ءماسىموۆ قۇرعان ۇلتتىق كاسىپكەرلەر پالاتاسىنىڭ ساراپتامالىق كەڭەسى دايىنداپ بەرگەن زاڭ جوباسىن ءبىر اۋىزدان ماقۇلداي سالعان...

ارى قاراي قازبالاپ، كوپ ءسوزدى كوپىرپەي-اق قويايىن...

سوندىقتان، پارلامەنت ەرتەڭنەن باستاپ «نەكە (ەرلى-زايىپتىلىق) جانە وتباسى تۋرالى» كودەكستى قايتا قاراپ، شەتەل ازاماتتارىنىڭ قازاقستاندىق انالاردىڭ جاتىرىن جالداۋىنا بىردەن شەكتەۋ قوياتىن نورما ەنگىزۋى كەرەك!

اۋىت مۇقيبەك

Abai.kz