جاقىندا، 2025 جىلى 13 قاراشادا الماتىدا مەكەمە باسشىسىنا مەملەكەتتىك تىلدە سويلەۋدى تالاپ ەتكەن ميربولات مىرزاتايۇلى بيشۋينوۆتى الماتى كالاسى مەدەۋ اۋدانىنىن، №2 اۋداندىك سوتى قر قك 174-بابىنىڭ 1-بولىگىندە كوزدەلگەن قىلمىستى جاساۋعا كىنالى دەپ ساناپ، 4 جىل مەرزىمگە باس بوستاندىعىنان ايىرۋ تۇرىندەگى جازا كەسكەن ەدى.

الدىندا ەكى اي بۇرىن ميربولات بيشۋينوۆتى تالعار تاس جولىندا قۇقىق ورگاندارى ۇستاپ، تۋىستارىنا حابار بەرمەي ەكى اي مەرزىمگە قاماۋعا العان بولاتىن.

سوتتىڭ بۇل شەشىمىنە نارازى بولعان كوپتەگەن قوعام قايراتكەرلەرى مەن ونەر قايراتكەرلەرى ءوز قارسىلىقتارىن الەۋمەتتىك جەلىدە كورسەتۋدە.

ال قازاقستان رەسپۋبليكاسى پارلامەنت ماجىلىسىنە، دەپۋتات قازىبەك يساعا قازاقستان رەسپۋبليكاسىنىڭ 261 ازاماتىنىڭ اتىنان ۇجىمدىق ءوتىنىش حات وسىمەن ەكىنشى رەت كەلىپ ءتۇسىپ وتىر.

قازىبەك يسا وسىمەن ەكىنشى رەت قر باس پروكۋرورى ب.ن.اسىلوۆقا دەپۋتاتتىق حات جولداپ وتىر. تومەندە پارلامەنتكە كەلگەن 261 ادامنىڭ ءوتىنىشى مەن باس پروكۋرورعا جازىلعان حاتتى جاريالاپ وتىرمىز.

مەملەكەتتىك ءتىلدى زاڭدى تالاپ ەتكەنى ءۇشىن سوتتاۋ – ەشقانداي زاڭنامادا جوق!

قر باس پروكۋرورى

ب.ن.اسىلوۆقا

قۇرمەتتى بەرىك نوعايۇلى!

قازاقستان رەسپۋبليكاسى پارلامەنت ماجىلىسىنە، قازاقستان رەسپۋبليكاسىنىڭ 260 ازاماتىنىڭ اتىنان الماتى قالاسىنىڭ تۇرعىنى بيشۋينوۆا گۇلشات توقتاسىنقىزى باستاعان ۇجىمدىق ءوتىنىش حاتى ەكىنشى رەت كەلىپ ءتۇسىپ وتىر.

اۆتور، بيشۋينوۆ ميربولات مىرزاتايۇلىنا 13.11.2025 جىلى الماتى كالاسى مەدەۋ اۋدانىنىن، №2 اۋداندىك سوتى سۋديا ج.ا. مۇحامبەتجاننىڭ توراعالىق ەتۋىمەن، №1-402-25 ءىس بويىنشا ۇكىم شىققان. ۇكىم بويىنشا، ميربولات مىرزاتايۇلى بيشۋينوۆتى قر قك 174-بابىنىڭ 1-بولىگىندە كوزدەلگەن قىلمىستى جاساۋعا كىنالى دەپ تابىلىپ، وعان اتالعان باپ بويىنشا 4 جىل مەرزىمگە باس بوستاندىعىنان ايىرۋ تۇرىندەگى جازا تاعايىندالعان. بيشۋينوۆتى 02.09.2025 جىلى تالعار تاس جولىندا قۇقىق ورگاندارىمەن ۇستاپ، تۋىستارىنا حابار بەرمەي ەكى اي مەرزىمگە قاماۋعا العان بولاتىن.

260 ادام ۇكىممەن كەلىسپەي، ميربولات بيشۋينوۆ ەشكىمدى بالاعاتتاپ، ەش بىرەۋدىڭ ار-نامىسىنا تيەتىندەي ارەكەت جاسامادى دەپ حات جولداپ وتىر. سونىمەن قاتار، بيشۋينوۆتىڭ كامەلەت جاسقا تولماعان ەكى بالاسىنىڭ بارىن، 8 جاستاعى ءبىر بالاسى سويلەۋ كەمىستىگىنە بايلانىستى ارنايى مەكتەپ-ينتەرناتتا وقيتىنى جايلى بارلىق ماعلۇماتتى سوتقا بەرگەن. سوتتا فيلولوگيا عىلىمدارىنىڭ كانديداتى تاۋسوعاروۆا اياۋجان قايراتقىزىنىڭ ساراپتاماسى مەن قايىرجانوۆ اباي قايىرجانۇلى - فيلولوگيا عىلىمدارىنڭ دوكتورى عىلىمي دارەجەسى بار جەتەكشى مامان-فيلولوگ، پسيحولينگۆيستتىڭ ساراپتامالارىن كارالماعانىن جەتكىزىپ وتىر. م.بيشۋينوۆتىڭ، زاڭ بويىنشا بەلگىلەنگەن جوعارى رادياتسيالىك ايماق اياكوز قالاسىندا تۋىپ، سەمەي يادرولىق سىناقتارى سالدارىنان زارداپ شەگىپ، باسىندا كيستا بارىن جانە سول جاق مويىن تامىرى (ارتەريا) 50 %-عا بىتەلىپ، ينسۋلت الۋ قاۋپى بارىن جانە باسقا دا كوپتەگەن سوزىلمالى اۋىرۋىنىڭ بارىن قوسىمشا جەتكىزىپ وتىر.

ەگەر، ءتىل تۋرالى زاڭدى تالاپ ەتكەن ازاماتتاردى وسىنداي جالامەن سوتتاي بەرەتىن بولسا، قر كەز كەلگەن ازاماتىن سوتتاپ جىبەرۋگە بولاتىنىن جەتكىزىپ، بەينەنى الىپ تاستاۋعا دا دايىن ەكەنىن جاسىرماي ايتىپ وتىر.

ءيا، 260 ادام قول قويعان حاتتا دۇرىس ايتىلعانداي، بيشۋينوۆ ميربولات مىرزاتايۇلىنىڭ ارەكەتىندە ەشقانداي قىلمىستىق ارەكەت جوق دەپ سانايمىز.

1.اتالمىش ۆيدەوداعى م.بيشيۋنوۆتىڭ سوزىندە ەشقانداي قر قك-ءنىڭ 174-بابىنىڭ 1 تارماعىن قولداناتىنداي قىلمىستى ءسوز جوق. ەشبىر تىلگە، ۇلتقا ءتىل تيگىزبەي، ءتىل تۋرالى زاڭدى تالاپ ەتىپ وتىر. مەملەكەتتىك ءتىلدى زاڭدى تالاپ ەتۋ – ەشقانداي قىلمىسقا جاتپايدى! مەملەكەتتىك ءتىلدى زاڭدى تالاپ ەتكەنى ءۇشىن سوتتاۋ – قازاقستان رەسپۋبليكاسىنىڭ ەشقانداي زاڭناماسىندا جوق!

2.بيشۋينوۆ ميربولات مىرزاتايۇلىنا قاتىستى قىلمىستىق ءىستى مۇقيات تەكسەرۋدى; ۇستالۋ بارىسىنداعى زاڭ بۇزۋشىلىقتاردى انىقتاپ، كىنالىلەردى جاۋاپكەرشىلىككە تارتۋدى; قر قك-ءنىڭ 174-بابىن ورىنسىز قولدانۋ فاكتىسىنە قۇقىقتىق باعا بەرۋدى; ازاماتتىق قۇقىقتارىنىڭ بۇزىلۋىنا جول بەرمەۋدى تالاپ ەتىپ وتىرعان 260 ازاماتتىڭ حاتىن ورىندى دەپ ساناپ، سىزدەرگە جولدايمىز.

وسىعان وراي، ءبىزدىڭ تاراپىمىزدان تۋىنداپ وتىرعان باستى سۇراق - ەشبىر تىلگە، ۇلتقا ءتىل تيگىزبەي، ءتىل تۋرالى زاڭدى تالاپ ەتىپ قويىلعان سۇراققا بولا پاتريوت ازاماتتارعا قر قك 174 بابىن قولدانىپ، قىلمىستىق ءىس قوزعاپ، سوتتاي بەرەتىن بولسا، مۇنىڭ ارتى نە بولادى؟!

قۇرمەتتى بەرىك نوعايۇلى!

وسىعان بايلانىستى، سىزگە ەكىنشى رەت جولدانىپ وتىرعان اتالعان ماسەلەنى قر پرەزيدەنتى ق.توقاەۆتىڭ «ادىلەتتى قازاقستان» قاعيداسى اتىنا ساي ەلىمىزدىڭ زاڭدىلىقتى قاداعالاۋشى باس پروكۋرورى رەتىندە زاڭ شەڭبەرىڭدە جان جاقتى قاراستىرىپ، ادىلدىك ورناۋى ءۇشىن ءتيىستى شارا قولدانۋىڭىزدى جانە ناتيجەسى تۋرالى حات يەسىنە، قازاقستان رەسپۋبليكاسى پارلامەنتىنىڭ ماجىلىسىنە زاڭدا بەلگىلەنگەن مەرزىمدە جازباشا تۇردە حابارلاۋىڭىزدى سۇرايمىن.

قۇرمەتپەن،

دەپۋتات قازىبەك يسا

Abai.kz