پرەمەر-ءمينيستردىڭ ورىنباسارى قانات بوزىمباەۆ دەنساۋلىق ساقتاۋ سالاسىنداعى قازىرگى وزگەرىستەر تۋرالى اقپارات بەردى. 

ونىڭ ايتۋىنشا، بۇل قادامدار مەديتسينالىق كومەكتىڭ ساپاسىن جاقسارتۋعا باعىتتالعان. پرەمەر-ءمينيستردىڭ ورىنباسارى مىندەتتى مەديتسينالىق ساقتاندىرۋ جۇيەسى ەنگىزىلگەننەن بەرى سالانى قارجىلاندىرۋ ءۇش ەسەگە وسكەنىن اتاپ ءوتتى.

— بيىل مەديتسينالىق كومەكتىڭ بىرىڭعاي پاكەتى تۋرالى زاڭ قابىلداندى. وندا 2027 جىلدان باستاپ بىرىڭعاي ساقتاندىرۋ مودەلىنە كەزەڭ-كەزەڭىمەن كوشۋ كوزدەلگەن. وسى ورايدا مىندەتتەمەلەردىڭ 35 پايىزى تەگىن مەديتسينالىق كومەكتىڭ كەپىلدى كولەمى جۇيەسىمەن جانە 65 پايىزى ءمامس جۇيەسىمەن قارجىلاندىرىلادى. سالانى تسيفرلاندىرۋ اياسىندا E-Densaulyk ەكوجۇيەسى دامىپ، 17 اقپاراتتىق جۇيە وڭتايلاندىرىلادى، — دەدى قانات بوزىمباەۆ پارلامەنت ءماجىلىسىنىڭ جالپى وتىرىسىندا.

سونىمەن قاتار ول بۇكىل ەل بويىنشا دەنساۋلىق ساقتاۋ ينفراقۇرىلىمىن دامىتۋ جۇمىستارى ءجۇرىپ جاتقانىن ايتتى.

— سوڭعى ءۇش جىلدا ۇلتتىق ونكولوگيا ورتالىعى، جەدەل مەديتسينالىق كومەك جانە جۇقپالى اۋرۋلار ورتالىقتارى جانە باسقا دا ۇيىمدارعا ارنالعان نىساندار سالىندى. اۋىلداردا دەنساۋلىق ساقتاۋدى جاڭعىرتۋدىڭ ۇلتتىق جوباسى اياسىندا وسى جىلدىڭ سوڭىنا دەيىن 655 باستاپقى مەديتسينالىق-سانيتارلىق كومەك نىسانىن اياقتاۋ جوسپارلانعان، ونىڭ 637-ءسى سالىندى، — دەدى ۇكىمەت باسشىسىنىڭ ورىنباسارى.

Abai.kz